Rom
10 Ro jeiũ im jatũ, kõn̦aan eo aõ in jãn bũruõ im men eo ij akwel̦ap kake ñan Anij in, ej bwe armej rein ren bõk lo̦mo̦o̦r. 2 Ij kam̦ool bwe el̦ap an armej rein kijejeto ñan Anij, bõtab kijejeto in aer ejjab pedped ioon jel̦ãl̦o̦kjen̦ eo ejim̦we. 3 Innem kõnke rejjab jel̦ã kõn pedpedin an Anij kõwãnõk juon armej, im kõn aer kajjioñ kõwãnõk er make ekkar ñan l̦õmn̦ak ko aer make, rejjab kõttãik er ñan wãween an Anij kõwãnõk armej. 4 Christ ej jem̦l̦o̦kin Kien Moses, innem aolep ro rej kwal̦o̦k aer tõmak naaj kõwãnõk er.
5 Moses ear jeje kõn an juon armej maroñ wãnõk ekkar ñan Kien* eo, ear ba: “Armej eo ej kõm̦m̦ane men ko Kien eo ej ba, enaaj mour ikijjeen men ko Kien eo ej ba.” 6 Bõtab ikijjeen an juon maroñ wãnõk itok wõt jãn tõmak, Jeje ko rej ba: “Kwõn jab ba ilo bũruom̦, ‘Wõn enaaj wanlõñl̦o̦k ñan lañ?’ mel̦el̦ein, wõn enaaj wanlõñl̦o̦k bwe en bõklal̦tak Christ? 7 Ak, ‘Wõn enaaj wanlal̦l̦o̦k ñan ilowaan abyss* eo?’ mel̦el̦ein, wõn enaaj wanlal̦l̦o̦k bwe en bõklõñtak Christ jãn mej?” 8 Ak ta eo Jeje ko rej ba? Rej ba: “Ennaan eo epãd iturum̦, epãd ilo lo̦ñiim̦ im ilo bũruom̦.” Eñin ej “ennaan eo” jej kwal̦o̦k kake, im ej aikuj wõr tõmak bwe juon en maroñ bõk ennaan in. 9 El̦aññe kwõj kwal̦o̦k naan ilo̦bwilej kõn lo̦ñiim̦ bwe Jesus ej Irooj im kwal̦o̦k am̦ tõmak ilo bũruom̦ bwe Anij ear kõjerkake jãn mej, innem kwõnaaj bõk lo̦mo̦o̦r. 10 El̦aññe juon ej kwal̦o̦k an tõmak ilo bũruon, enaaj wãnõk im̦aan mejãn Anij, ak el̦aññe ej kwal̦o̦k naan ilo̦bwilej kõn lo̦ñiin, enaaj bõk lo̦mo̦o̦r.
11 Bwe Jeje ko rej ba: “Jabdewõt eo ej likũt an tõmak ilo e eban ajl̦o̦k.” 12 Ejjel̦o̦k oktak ikõtaan ri-Ju im ri-Grik. Juon wõt aer Irooj, eo el̦ap an jouj ñan aolep ro rej kũr ñane. 13 Bwe “aolep ro rej kũr etan Jeova* renaaj bõk lo̦mo̦o̦r.” 14 Ijoke ekõjkan aer maroñ kũr ñane el̦aññe rejjab likũt aer tõmak ilo E? Im ekõjkan aer maroñ likũt aer tõmak ilo E el̦aññe rejjañin roñ kõn E? Im ekõjkan aer maroñ roñ el̦aññe ejjel̦o̦k ej kwal̦o̦k naan ñan er? 15 Im ekõjkan aer maroñ kwal̦o̦k el̦aññe kar jab jilkinl̦o̦k er? Jeje ko rej ba: “Ekanooj in ol̦eo̦ neen ro rej kwal̦o̦k kõn ennaan eo em̦m̦an kõn men ko rem̦m̦an!”
16 Meñe ãindein, ak er aolep rar jab pokake ennaan eo em̦m̦an. Aiseia ear ba: “Jeova,* ewõr ke en̦ ej likũt an tõmak ilo men eo ear roñ jãn kõm?”* 17 Tõmak ej wal̦o̦k ãlikin an juon roñ kõn ennaan eo, im juon ej roñ kõn ennaan eo ñe juon armej ej kwal̦o̦k kõn Christ. 18 Ak in m̦õk kajjitõk, M̦ool ke bwe rar jab roñ? Ilo m̦ool, “em̦õj an ainikieer diwõjl̦o̦k ñan aolepen lal̦ in, im ennaan eo aer ear ajeeded ñan jikin ko rettol̦o̦ktata ilo lal̦ in.” 19 Im ij kajjitõk, M̦ool ke bwe ri-Israel ro rar jab jel̦ã? M̦oktata, Moses ear ba: “Inaaj kõjerbal ri-aelõñ ko jet ñan kõm̦m̦an ami ebbanban, im inaaj kõjerbal juon aelõñ ejajel̦o̦kjen̦ ñan kõm̦m̦an ami lukkuun illu.” 20 Im Aiseia ear peran im ba: “Ro rar jab pukot eõ rar lo eõ, im ro rar jab kajjitõk kake ña rar jel̦ã kõn ña.” 21 Bõtab ikijjeen ri-Israel ro, ear ba: “Raan otemjej iar erl̦o̦ke peiũ ñan armej ro rekipiliia im penawiia.”