Jon
4 Irooj ear jel̦ã bwe Parisi ro rar roñ kõn an lõñl̦o̦k ri-kal̦ooran im lõñl̦o̦k ro ear* peptaiji er jãn Jon. 2 (Ilo m̦ool, ri-kal̦oor ro an Jesus rar peptaiji armej ro, ejjab e.) 3 Ke ear jel̦ã men in, ear ilo̦k jãn Judia im bar etal ñan Galili. 4 Bõtab, ear aikuj ilo̦k ilujenl̦o̦k Sameria. 5 Innem ear etal ñan juon bukwõn ilo Sameria etan Saikar, eo ej pãd iturin wãto eo Jekob ear lel̦o̦k ñan Josep, l̦eo nejin. 6 Aebõj lal̦ eo an Jekob ear pãd ijo, im kõn an Jesus m̦õk jãn an kar itoitak, ear jijetl̦o̦k iturin aebõj lal̦ eo. Ilo tõre in, ear 12 awa jim̦a* ilo raelep.
7 Juon kõrã in Sameria ear itok bwe en itõk dãn, im Jesus ear ba ñane: “Jouj im letok lim̦õ aebõj.” 8 (Ri-kal̦oor ro an remootl̦o̦k in wia m̦õñã ilo bukwõn eo.) 9 Kõn men in, kõrã in Sameria eo ear ba ñane: “Etke kwõj kajjitõk ippa bwe in lewaj lim̦õm̦ aebõj ke kwe juon ri-Ju im ña juon kõrã in Sameria?” (Unin an ba men in kõnke ri-Ju ro rejjab kõnnaan ippãn ri-Sameria ro.) 10 Im Jesus ear uwaake im ba: “El̦aññe kwõn kar jel̦ã kõn menin letok eo ejjel̦o̦k on̦ããn jãn Anij im kõn eo ej kajjitõk im ba, ‘Jouj im letok lim̦õ aebõj,’ kwõnaaj kar kajjitõk lim̦õm̦ ippãn im enaaj kar lewaj ñan kwe dãnnin mour.” 11 Innem kõrã eo ear ba: “Em̦m̦aan en̦, ejjel̦o̦k am̦ keikõb ñan itõk dãn ak aebõj lal̦ in em̦wilal̦. Ak kiiõ, kwõnaaj bõk jãn ia dãnnin mour n̦e kwõj kõnnaan kake? 12 Ta kwõutiejl̦o̦k jãn jim̦m̦aam Jekob ke? E eo ear letok aebõj lal̦ in ñan kõm, im e kab l̦õm̦aro nejin im kau ko nejin rar idaak jãne.” 13 Im Jesus ear uwaake im ba: “Aolep ro rej idaak jãn dãn in renaaj bar maro, 14 bõtab jabdewõt eo ej idaak jãn dãn eo inaaj lel̦o̦k ñane, eban bar maro. Dãn eo inaaj lel̦o̦k ñane enaaj ãinwõt juon unin dãn ej pãd ilo e me ej lel̦o̦k ñane mour indeeo.” 15 Innem kõrã eo ear ba ñane: “Eokwe kwõn letok ñan eõ dãn n̦e bwe in jab bar maro, im in jab bar itok ñan ijin im itõk dãn.”
16 Ear ba ñane: “Kwõn etal im kũrtok l̦eo pãleem̦ im komiro itok ñan ijin.” 17 Kõrã eo ear uwaak im ba: “Ejjel̦o̦k pãleõ.” Im Jesus ear ba ñane: “Ejim̦we am̦ ba, ‘Ejjel̦o̦k pãleõ,’ 18 kõnke kar l̦alem pãleem̦, im l̦eo kwõj pãd ippãn kiiõ ejjab pãleem̦. Kwaar kwal̦o̦k m̦ool.” 19 Im kõrã eo ear ba ñane: “Em̦m̦aan en̦, kiiõ ij kab kile ke kwe juon ri-kanaan. 20 Ro jim̦m̦aam rekõn kabuñ ilo tol̦ in, bõtab kom̦ij ba bwe armej rej aikuj in kabuñ wõt ilo Jerusalem.” 21 Jesus ear ba ñane: “Kõrã en̦, kwõn tõmak men in ij ba ñan kwe. Ej itok wõt iien eo ñe kom̦ ban bar kabuñ ñan Jemãdwõj ilañ ilo tol̦ in ak ilo Jerusalem. 22 Kom̦ jaje wõn eo kom̦ij kabuñ ñane, ak kõm jel̦ã wõn eo kõmij kabuñ ñane, kõnke lo̦mo̦o̦r ej itok ikijjeen ri-Ju ro.* 23 Meñe ãindein ak ej itok wõt iien eo, jino jãn kiiõ, ñe ro em̦ool aer karejar ñan Jemãdwõj ilañ renaaj kabuñ ñane ekkar ñan tõl eo an jetõb kwõjarjar* im ekkar ñan m̦ool eo. Jemãdwõj ilañ ej kappukot ro rekõn̦aan kabuñ ñane ilo wãween in. 24 Anij ej juon Jetõb, im ro rej kabuñ ñane rej aikuj kabuñ ñane ekkar ñan tõl eo an jetõb kwõjarjar* im ekkar ñan m̦ool eo.” 25 Innem kõrã eo ear ba ñane: “Ijel̦ã bwe Messaia eo enaaj itok, eo rej n̦aetan Christ. Ñe enaaj itok, enaaj kaalikkar men otemjej ñan kõm.” 26 Jesus ear ba ñane: “Ña em̦m̦aan n̦e.”
27 Iien eo wõt, ri-kal̦oor ro an rar jepl̦aaktok im rar bwilõñ kõnke ear kõnnaan ippãn juon kõrã. Bõtab, ejjel̦o̦k juon ear ba: “Kwõj ita ijin?” ak “Etke kwõj kõnnaan ippãn kõrã n̦e?” 28 Innem kõrã eo ear likũti nien dãn eo an ijo im etal ñan bukwõn eo im kõnnaanek armej ro im ba: 29 “Kom̦win itok im lale em̦m̦aan en̦ ear kwal̦o̦ktok ñan ña men otemjej iar kõm̦m̦ani. Wõn ejjab ba e Christ?” 30 Kõn men in, armej ro rar etal jãn bukwõn eo im jino jibadekl̦o̦k Jesus.
31 Ilo tõre in, ri-kal̦oor ro an rar akwel̦ap ñane im ba: “Rabbai,* kwõn m̦õñã.” 32 Ak ear ba ñan er: “Ewõr kijõ m̦õñã im kom̦ jaje kake.” 33 Im ri-kal̦oor ro rar ba ñan doon: “Ta ewõr en̦ ear bõktok kijen ke?” 34 Jesus ear ba ñan er: “M̦õñã eo kijõ in ej bwe in kõm̦anm̦an ankilaan eo ear jilkintok eõ im kadedel̦o̦k jerbal eo ear letok ñan eõ. 35 Kom̦ij ba bwe m̦õttan wõt emãn allõñ im ejejjet iien m̦adm̦õd, bõtab ij ba ñan kom̦ men in: Kom̦win reilo̦k im lale jikin kallib ko, rekalo* im repojak ñan m̦adm̦õd. Kiiõ, 36 ri-m̦adm̦õd eo ej bõk on̦ããn im aini leen keinikkan ko ñan mour indeeo. Innem eo ej jeor kab eo ej m̦adm̦õd renaaj lañlõñ ippãn doon. 37 Ilo wãween in, em̦ool aer kõn ba: Juon ej jeor im eo juon ej m̦adm̦õd. 38 Iar jilkinl̦o̦k kom̦ bwe kom̦win aini leen men ko kom̦ar jab eñtaan kaki. Ro jet rar jerbal, im kom̦ar kobal̦o̦k ippãer im bõk tokjãn jerbal ko aer.”
39 Elõñ iaan ri-Sameria ro ilo bukwõn eo rar kwal̦o̦k aer tõmak ilo Jesus kõn wõt naan ko an kõrã eo, ke ear ba: “Ear kwal̦o̦ktok ñan ña men otemjej iar kõm̦m̦ani.” 40 Innem ke ri-Sameria ro rar itok ñan ippãn Jesus, rar kajjitõk bwe en pãdwõt ippãer, im ear pãd ijo ium̦win ruo raan. 41 Kõn men in, elõñl̦o̦k wõt ro rar tõmak kõn wõt men ko ear ba, 42 im rar ba ñan kõrã eo: “Kõmij kiiõ tõmak, ejjab kõn wõt men ko kwaar ba, bõtab kõnke em̦õj ammim make roñ jãne. Kõm jel̦ã bwe em̦m̦aan in ej lukkuun ri-lo̦mo̦o̦r eo an lal̦ in.”
43 Ãlikin ruo raan, ear ilo̦k jãn ijo im etal ñan Galili. 44 Jesus make ear ba bwe armej rejjab kautieje jabdewõt ri-kanaan ñe ej jãn bukwõn eo aer. 45 Ke ear tõparl̦o̦k Galili, armej in Galili rar karwaineneiki kõnke rar loe aolep men ko ear kõm̦m̦ani ilo Jerusalem ilo kar iien kwõjkwõj eo. Armej rein rar bar etal ñan iien kwõjkwõj eo.
46 Innem ear bar itok ñan Cana ilo Galili, ijo ear ukot dãn ñan wain. Ekar wõr juon ri-jerbal an kiiñ eo, im l̦adik eo nejin ear nañinmej ilo Kaperneum. 47 Ke em̦m̦aan in ear roñ bwe Jesus emoottok jãn Judia ñan Galili, ear ilo̦k ñan ippãn im kajjitõk bwe en etal im kõmouri l̦adik eo nejin, kõnke m̦õttan jidik emej. 48 Bõtab Jesus ear ba ñane: “Kom̦ ban tõmak m̦ae iien kom̦ij ellolo kõkal̦l̦e im menin bwilõñ.” 49 Ri-jerbal eo an kiiñ eo ear ba ñane: “Irooj, kwõn m̦õkaj im itok m̦okta jãn an ajri en̦ nejũ mej.” 50 Innem Jesus ear ba ñane: “Kwõn ilo̦k. Emour l̦adik eo nejũm̦.” Em̦m̦aan eo ear tõmake naan kein Jesus ear ba ñane, im ear ilo̦k. 51 Ke em̦m̦aan eo ear etal ilo ial̦ eo an l̦o̦k, ri-karejar* ro an rar iioone im ba ñane bwe emour l̦adik eo nejin.* 52 Innem ear kajjitõk ippãer jete awa eo ear jino em̦m̦anl̦o̦k an l̦adik eo mour, im rar uwaak im ba: “Ear jako an piba inne ke ej 1 awa jim̦a* ãlikin raelep.” 53 Innem jemãn l̦adik eo ear jel̦ã bwe eñin ej awa eo Jesus ear jiroñl̦o̦ke im ba: “Emour l̦adik eo nejũm̦.” Kõn men in, e im aolep ro ilo m̦weo im̦õn rar erom rũttõmak. 54 Eñin ej menin kabwilõñlõñ* eo kein karuo Jesus ear kõm̦m̦ane ke ear itok jãn Judia ñan Galili.