2 Korint

13 Eñin ej alen eo kein kajilu in aõ pojakin iwõj ñan ippemi. “Ej aikuj wõr ennaan jãn ruo ak jilu ri-kam̦ool ñan kõm̦m̦an bwe en alikkar men otemjej.” 2 Meñe ijako jãn ippemi kiiõ, ak ej ãinwõt ñe ij pãd ippemi alen kein karuo, im ij lel̦o̦k naanin kakkõl l̦o̦k im̦aan ñan ro rar jerawiwi m̦oktal̦o̦k im ñan aolep ro jet bwe el̦aññe inaaj bar iwõj, iban dãpij er jãn aer bõk kauwe. 3 Unin ej kõnke kom̦ij kappok kein kam̦ool ñan lale el̦aññe Christ ej lukkuun kõjerbal ña bwe in kõnono ñan kom̦. Im Christ ejjab m̦õjn̦o̦ ilo an kõm̦m̦an ñan kom̦, bõtab ej kwal̦o̦k an kajoor. 4 Meñe ekar m̦õjn̦o̦ ke rekar m̦ane ilo aer dilaiki ilo jurõn al̦al̦, bõtab ej mour kiiõ kõn wõt kajoor eo an Anij. Ilo m̦ool, kõmij bareinwõt m̦õjn̦o̦ ippãn, bõtab kõm naaj mour ippãn kõn wõt kajoor eo an Anij, eo ej jerbal ippemi.

5 Kom̦win wõnm̦aanl̦o̦k wõt im lale el̦aññe kom̦ij pãd ilo tõmak, im kom̦win wõnm̦aanl̦o̦k wõt im etale kain armej rot kom̦. Ta kom̦ij jab kile bwe Jesus Christ ej juon wõt ippemi ke? Kom̦ ban kile men in el̦aññe Anij ejjab buñbũruon ippemi. 6 Ij lukkuun kõjatdikdik bwe kom̦ naaj kile bwe Anij ebuñbũruon kake kõm.

7 Kiiõ kõmij jar ñan Anij bwe kom̦win jab kõm̦m̦ani men ko rebõd, ejjab ñan kwal̦o̦k bwe armej rej buñbũrueer kake kõm, ak ej bwe kom̦win kõm̦m̦ani men ko rem̦m̦an, jekdo̦o̦n ñe ro jet remaroñ jab buñbũrueer kake kõm. 8 Kõm ban kõm̦m̦ane jabdewõt men n̦ae m̦ool eo, bõtab kõm naaj kowõnm̦aanl̦o̦k wõt m̦ool eo. 9 Jabdewõt iien ñe kõmij m̦õjn̦o̦ bõtab kom̦ kajoor, kõmij lukkuun m̦õn̦õn̦õ. Men eo kõmij jar kake in, ej bwe kom̦win kõm̦m̦an oktak. 10 Unin aõ je men kein ilo tõre in ijako jãn ippemi, ej kõnke in l̦ak pãd, en jab l̦e jãn joñan aõ kõjerbale maroñ eo Irooj ear letok ñan ña, maroñ eo ñan kõkajoor kom̦ im jab ñan ko̦kkure kom̦.

11 Ro jeiũ im jatũ, men eo ãliktata ikõn̦aan ba ñan kom̦ in, ej bwe kom̦win wõnm̦aanl̦o̦k wõt im lañlõñ, kõm̦m̦an oktak, bõk kaenõm̦m̦an, errã ippãn doon, im mour ilo aenõm̦m̦an. Innem Anij in yokwe im aenõm̦m̦an enaaj pãd ippemi. 12 Kom̦win yokyokwe doon kõn mejenma eokkwõjarjar. 13 Aolep ro rekkwõjarjar rej lewaj aer yokwe kom̦.

14 Jouj eo el̦ap an ad Irooj Jesus Christ im yokwe eo an Anij im kõjeraam̦m̦an ko jãn jetõb kwõjarjar* ren pãd ippemi aolep.