Jerbal
22 “Em̦m̦aan ran̦ jeiũ im jatũ im jema, kom̦win roñjake naanin jojomar kein aõ.” 2 Ke rar roñ an kõnono ñan er ilo kajin Hibru, ear l̦apl̦o̦k wõt aer ikõñ, innem ear ba ñan er: 3 “Ña ij juon ri-Ju, iar l̦otak ilo Tarsus ilo Silisia, bõtab iar jikuul̦ ippãn Gameliel ilo jikin in, im ear katakin eõ bwe in lukkuun l̦oore Kien eo an ro jim̦m̦aad, im iar kijejeto ñan Anij ãinwõt kom̦ aolep ijin rainin. 4 Iar kaeñtaan ñan mej ro uwaan Ial̦ Eo, iar lukwõj er im bõkl̦o̦k er ñan kalbuuj, kõrã im em̦m̦aan jim̦or, 5 im bũrij l̦apl̦ap eo im aolep ro uwaan ri-tõl ro remaroñ kam̦oole men in. Iar ebbõk lõta jãn er ñan ri-Ju ro jeid im jatid ilo Damaskõs, im iar etal bwe in jibwe ri-kal̦oor ro ijen̦ im lukwõj er im bõktok er ñan Jerusalem bwe ren bõk kaje.
6 “Bõtab ke iar etal ilo ial̦ eo aõ l̦o̦k im epaakel̦o̦k Damaskõs ke ear raelep, juon meram el̦ap jãn lañ ear wal̦o̦k ilo jidimkij im rome aolepen pel̦aakũ, 7 im iar buñ n̦a ioon bwidej im iar roñ an juon ainikien ba ñan ña: ‘Saul, Saul, etke kwõj kaeñtaan eõ?’ 8 Iar uwaak im ba: ‘Irooj, wõn kwe?’ Im ear ba ñan ña: ‘Ña Jesus, ri-Nazeret, eo kwõj kaeñtaane.’ 9 Em̦m̦aan ro rar pãd ippa rar lo meram eo, bõtab rar jab roñ an ainikien eo kõnono ñan ña. 10 Innem iar ba: ‘Irooj, ta eo ij aikuj kõm̦m̦ane?’ Im Irooj ear ba ñan ña: ‘Kwõn jerkak im etal ñan Damaskõs, naaj jiroñ eok ilo ijen̦ kõn aolep men ko em̦õj karõk bwe kwõn kõm̦m̦ani.’ 11 Bõtab kõnke iar jab maroñ lo im̦aan kõn wõt kajoor in meram eo, ro rar pãd ippa rar jibwe peiũ im tõl eõ ñan Damaskõs.
12 “Innem juon em̦m̦aan etan Anenaiõs, juon eo el̦ap an tiljek ñan Kien Moses im el̦ap an aolep ri-Ju ro rej jokwe ijo kautieje, 13 ear itok ñan ippa im jutak iturũ im ba ñan ña: ‘Jatũ Saul, kwõn bar lol̦o̦kjen̦!’ Ilo iien eo wõt, iar reilõñl̦o̦k ñane im iar loe. 14 Im ear ba: ‘Anij eo an ro jim̦m̦aad ear kããlõt eok bwe kwõn jel̦ã kõn ankilaan im bwe kwõn lo eo ewãnõk im roñ ainikien, 15 kõnke kwõnaaj kwal̦o̦k kõn e ñan aolep armej kõn men ko kwaar loi im roñ. 16 Innem etke kwõj aepedped? Kwõn jutak im etal im peptaij, im kwal̦il̦o̦k jerawiwi ko am̦ ikijjeen am̦ kũr ñan ãt eo etan.’
17 “Ak ke iar jepl̦aak ñan Jerusalem im jar ilo tampel̦ eo, iar lo juon pijen 18 im iar loe Irooj, im ear ba ñan ña: ‘Kwõn m̦õkaj im diwõjl̦o̦k jãn Jerusalem kõnke armej ro reban roñjake am̦ kwal̦o̦k kõn ña.’ 19 Innem iar ba: ‘Irooj, armej ran̦ relukkuun jel̦ã bwe ikõn ilo̦k ñan kajjojo im̦õn kabuñ im bõk ro rej tõmak ilo kwe im kalbuuji er im deñl̦o̦ke er. 20 Im ke rar kato̦o̦rl̦o̦k bõtõktõkin Stipen, eo ear kwal̦o̦k kõn kwe, iar jutak ijo im rejetak er im iar lale kopã ko an ro rar m̦ane.’ 21 Meñe ãindein ak ear ba ñan ña: ‘Kwõn ilo̦k kõnke inaaj jilkinl̦o̦k eok ñan aelõñ ko rettol̦o̦k.’”
22 Armej ro rar roñjake wõt an kõnnaan, im ej m̦õj wõt an ba naan kein ak rar kõl̦l̦aaj ainikieer im ba: “Jol̦o̦k l̦õn̦e jãn lal̦ in bwe ejjel̦o̦k tokjãn an mour!” 23 Kõn an armej ro ellam̦õjm̦õj im kadkad kaki kopã ko aer im joto jotak bũñal imejatoto, 24 ri-tõlin jarin tarin̦ae eo ear ba ren bõkl̦o̦k Paul ñan ijo jikin rũttarin̦ae ro. Innem ear ba bwe ren kajitũkini im deñl̦o̦ke, bwe en lukkuun jel̦ã unin an armej ro ellam̦õjm̦õj n̦ae Paul ilo wãween in. 25 Bõtab ãlikin aer kar lukwõje bwe ren itõn deñl̦o̦ke, Paul ear kajjitõk ippãn kapen eo ej jutak ijo im ba: “Emãlim ke ñan ami deñl̦o̦ke juon ri-Rom* meñe ejjel̦o̦k ruõn?”* 26 Ke kapen eo ear roñ men in, ear etal ñan ippãn ri-tõlin jarin tarin̦ae eo im kõnnaanek e im ba: “Em̦m̦aan en̦ ej juon ri-Rom. Ta n̦e kwõj l̦õmn̦ak in kõm̦m̦ane kiiõ?” 27 Kõn men in, ri-tõlin jarin tarin̦ae eo ear etal ippãn Paul im kajjitõk: “Kwõn m̦õk ba ñan ña, kwe ke ri-Rom?” Ear uwaak im ba: “Aet.” 28 Innem ri-tõl eo ear ba: “Ña ke iar jol̦o̦k el̦ap jããn bwe in maroñ erom ri-Rom.”* Bõtab Paul ear ba: “Eokwe ña ri-Rom jãn ke iar l̦otak.”
29 Ej ba wõt men in ak l̦õm̦aro rar itõn deñl̦o̦ke im kajitũkini rar kajju kãlikl̦o̦k jãn ippãn, im ri-tõlin jarin tarin̦ae eo ear lõl̦ño̦ñ ke ear jel̦ã bwe Paul ej juon ri-Rom im kõn an kar ba bwe ren lukwõje kõn jeen.
30 Raan eo tok juon, kõn an lukkuun kõn̦aan jel̦ã unin an kar ri-Ju ro liaakel̦o̦k Paul, ear karõl̦o̦ke im ear jiroñ bũrij ro reutiej im aolep ro uwaan Im̦õn Ekajet eo El̦ap an ri-Ju* bwe ren kweilo̦kl̦o̦k. Innem ear bõktok Paul im kajutake ibwiljier.