Luk

13 Kiiõ jet iaan armej ro ijo rar kõnnaanek Jesus kõn an kar Pail̦at m̦an ri-Galili ro ilo iien eo rar katok. 2 Im ear ba ñan er: “Kom̦ij l̦õmn̦ak bwe unin an kar ri-Galili ro mej ej kõnke el̦apl̦o̦k aer jerawiwi jãn ri-Galili ro jet ke? 3 Ejjab! Bõtab el̦aññe kom̦ij jab ukel̦o̦k, kom̦ aolep naaj bar mej ãinwõt er. 4 Ak ta kõn armej ro 18 me rar mej ke im̦õn waj eo eutiej ilo Siloam ear ure er? Kom̦ij l̦õmn̦ak ke bwe el̦apl̦o̦k rueer jãn armej ro jet rej jokwe ilo Jerusalem? 5 Ejjab! Bõtab el̦aññe kom̦ij jab ukel̦o̦k, kom̦ aolep naaj bar mej ãinwõt er.”

6 Innem ear etal wõt im kwal̦o̦k waanjoñak in: “Ewõr juon em̦m̦aan me ewõr juon nejin wõjke fig ilo jikin kallib kũreep eo an. Em̦m̦aan in ear etal im lale el̦aññe ewõr leen, ak ear jab ellolo. 7 Kõn men in, ear ba ñan ri-jerbal eo ilo jikin kallib eo an im ba, ‘El̦o̦k de jilu iiõ in aõ itok im kappok leen wõjke fig in ak ejjañin de wõr. Kwõn jeke! Kein ta an pãd ilo bwidej n̦e ke ejjel̦o̦k tokjãn?’ 8 Innem ear uwaak im ba: ‘Irooj, kwõn bar kõtl̦o̦k an pãd juon iiõ bwe in kũbwiji tõrerein im kanne l̦o̦k kõn kõn̦. 9 Im tokãlik ñe enaaj kalle, eokwe em̦m̦an, bõtab el̦aññe ejjab kalle, innem kwõn ba ren jeke.’”

10 Kiiõ Jesus ear katakin armej ro ilo juon iaan im̦õn kabuñ ko ilo raanin Jabõt.* 11 Ekar wõr juon kõrã ijin me juon jetõb ettoon ear kõm̦m̦an an nañinmej ium̦win 18 iiõ. Kõrã in ekob diin im ejjab maroñ kajim̦we an jutak. 12 Ke Jesus ear loe, ear kũrtok im ba: “Kõrã en̦, enaaj jako am̦ nañinmej.” 13 Innem ear likũt pein ioon kõrã eo im ear kajju jim̦we diin, im kõrã eo ear jino nõbar Anij. 14 Bõtab, eo ej lale im̦õn kabuñ eo ear kanooj illu kõn an Jesus kõmour ri-nañinmej ilo raanin Jabõt. Kõn men in, ear jiroñl̦o̦k jarlepju eo im ba: “Ewõr jiljino wõt raanin kõm̦m̦an jerbal. Raan ko de kein kom̦ maroñ kajjitõk aer kõmour kom̦ jãn nañinmej ko ami, ejjab ilo raanin Jabõt.” 15 Ak Irooj ear uwaake im ba: “Kom̦ ri-etao, ta kajjojo iaami ejjab mejal̦e kau kom̦aan ak donkey eo nejin im bõke bwe en kaidaake ilo raanin Jabõt ke? 16 Kõrã in ej jãn bwijjin Ebream im 18 iiõ in an Setan kaeñtaane, ta ejjab ekkar ñan kõmouri jãn nañinmej in an ilo raanin Jabõt ke?” 17 Ke ear ba men kein, ro rar jum̦aiki rar jook, ak armej ro wõj rar lañlõñ kõn aolep men ko rekanooj em̦m̦an ear kõm̦m̦ani.

18 Innem ear wõnm̦aanl̦o̦k im ba: “Aelõñ eo an Anij* ej ãinwõt ta, im ta eo imaroñ keidi ñane? 19 Ej ãinwõt juon ineen mustard* me juon em̦m̦aan ear kalibwini ilo jikin kallib eo an. Innem ear eddekl̦o̦k im erom juon wõjke, im bao in mejatoto ko rej el ilo ra ko raan.”

20 Im ear bar ba: “Ta eo imaroñ keidi Aelõñ eo an Anij ñane? 21 Ej ãinwõt juon iij me juon kõrã ej bõke im iiõke ippãn jilu joñak* in pilawã im euwe aolepen pilawã eo.”

22 Innem Jesus ear etal jãn jikin ñan jikin im bukwõn ñan bukwõn im katakin armej ro ke ej ilo̦k ilo ial̦ eo an l̦o̦k ñan Jerusalem. 23 Im juon em̦m̦aan ear kajjitõk ippãn im ba: “Irooj, jet wõt renaaj bõk lo̦mo̦o̦r ke?” Im ear uwaake er im ba: 24 “Kom̦win lukkuun kate kom̦ bwe kom̦win del̦o̦ñ ilo kõjãm eo eaidik, kõnke ij ba ñan kom̦ bwe elõñ renaaj kajjioñ in del̦o̦ñ ak reban del̦o̦ñ. 25 Ñe armej eo m̦weo enaaj jutak im l̦ake kõjãm eo, kom̦ naaj jutak inabõj im kal̦l̦al̦l̦al̦ im ba, ‘Irooj, kõpel̦l̦o̦k kõjãm e ñan kõm.’ Bõtab enaaj uwaak im ba: ‘Ijaje kom̦ armej in ia.’ 26 Im kom̦ naaj jino ba, ‘Kõm kõn m̦õñã im idaak ippam̦, im kwaar katakin kõm ilo ial̦leplep ko ilo bukwõn eo ammim.’ 27 Bõtab enaaj ba ñan kom̦, ‘Ijaje kom̦ armej in ia. Kom̦win aolep etal jãn ña bwe kom̦ij kõm̦m̦ani men ko renana!’ 28 Naaj jol̦o̦k kom̦ ñan nabõj, ijo kom̦ naaj jañ im kij dekein ñimi ie ñe kom̦ naaj lo Ebream, Aisak, Jekob, im aolep ri-kanaan ro ilo Aelõñ eo an Anij. 29 Bareinwõt, armej ro renaaj itok jãn ijoko irear im irilik, im ijoko itueañ im iturõk, im renaaj jijet ilo tebõl̦ eo ilo Aelõñ eo an Anij. 30 Ij ba ñan kom̦ bwe ewõr ro rej pãd ãliktata renaaj oktak im pãd m̦oktata, im ewõr ro rej pãd m̦oktata renaaj oktak im pãd ãliktata.”

31 Ilo iien eo wõt, jet Parisi rar itok ñan ippãn im ba: “Kwõn etal jãn ijin bwe Herod ekõn̦aan m̦an eok.” 32 Im ear ba ñan er: “Kom̦win ilo̦k im kõnnaanek ri-etao* en̦ im ba, ‘Rainin im ilju ij kadiwõjl̦o̦k jetõb ko rettoon* jãn armej im kõmour armej ro jãn nañinmej ko aer, im ilo raan en̦ kein kajilu enaaj dedel̦o̦k aõ jerbal ijin.’ 33 Jekdo̦o̦n ta eo enaaj wal̦o̦k, ak ij aikuj wõnm̦aanl̦o̦k wõt ilo jerbal in aõ rainin, im ilju, kab jekl̦aj. Ij aikuj wõnm̦aanl̦o̦k wõt ilo ial̦ eo aõ l̦o̦k kõnke reban m̦ane juon ri-kanaan ilo jabdewõt jikin ijello̦kun wõt Jerusalem. 34 Jerusalem, Jerusalem, kwaar m̦an ri-kanaan ro im kad ñan mej armej ro kar jilkinwaj er! Elõñ alen aõ kõn̦aan aintok ajri ro nejũm̦ ãinwõt an juon lo̦lo̦ aini tokkwi ko nejin n̦a ium̦win pein! Bõtab, kwaar jab kõn̦aan. 35 Anij enaaj ilo̦k jãn tampel̦ eo ami.* Ij ba ñan kom̦ bwe kom̦ ban bar lo eõ m̦ae iien kom̦ naaj ba: ‘Ejeraam̦m̦an wõt eo ej itok ilo etan Jeova!’”*