Jerbal
23 Paul ear kalimjek ro uwaan Im̦õn Ekajet eo El̦ap an ri-Ju* im ba: “Em̦m̦aan ran̦ jeiũ im jatũ, aolep iien kein m̦aantak ñan rainin iar mour im̦aan mejãn Anij kõn juon bõklõkõt elukkuun erreo.” 2 Kõn men in, bũrij l̦apl̦ap eo etan Anenaiõs ear jiroñ ro rej jutak iturin Paul bwe ren jeptake lo̦ñiin. 3 Innem Paul ear ba ñane: “Anij enaaj m̦an eok, kwe wõrwõr rot kan̦ rettoon im em̦õj unoiki kõn uno mouj.* Ta kwõj jijet ijen̦e im ekajet eõ ekkar ñan Kien eo, bõtab kwõj rupe Kien eo ilo am̦ ba ren jeptak eõ ke?” 4 Ro rar jutak ijo rar ba: “Kwõj kajooke bũrij l̦apl̦ap n̦e an Anij ke?” 5 Im Paul ear ba: “Ro jeiũ im jatũ, ijaje ke e eo ej bũrij l̦apl̦ap. Jeje ko rej ba, ‘Kwõn jab kõnono n̦ae ri-tõl eo an armej ro am̦.’”
6 Ke Paul ear jel̦ã bwe jimattanin ro uwaan Im̦õn Ekajet eo El̦ap an ri-Ju ro rej Saddusi im jimattan rej Parisi, ear kõl̦l̦aaj ainikien im ba: “Em̦m̦aan ran̦ jeiũ im jatũ, ña ij juon Parisi, im nejin Parisi. Unin aer ekajete eõ ej kõn wõt kõjatdikdik eo bwe ro remej renaaj jerkakpeje.” 7 Kõn an kar ba men in, ear wal̦o̦k juon poktak ikõtaan Parisi ro im Saddusi ro, im ear wõr jepel ikõtaer. 8 Unin ej kõnke Saddusi ro rar ba bwe ejjel̦o̦k jerkakpeje im enjel̦ im jetõb, bõtab Parisi ro rar tõmak ilo aolep men kein.* 9 Innem elõñ iaaer rar jino ellam̦õjm̦õj, im jet iaan skraib ro jãn kumi eo an Parisi ro rar jutak im jino aer akwããl im ba: “Kõmij jab ellolo ruõn em̦m̦aan in, bõtab el̦aññe juon jetõb ak enjel̦ ear kõnnaan ñane—.” 10 Ke ear l̦apl̦o̦k wõt poktak eo, ri-tõl eo an jarin tarin̦ae eo ear ekkõl ñe rõm̦an Paul, innem ear jiroñ rũttarin̦ae ro bwe ren etal im bõke jãn ibwiljier im bõkl̦o̦ke ñan ijo jikin rũttarin̦ae.
11 Bõtab boñõn eo tok juon, Irooj ear jutak iturin im ba: “Kwõn peran!* Kwõnaaj kwal̦o̦k kõn ña ilo Rom, ãinwõt an kar lukkuun lõt am̦ kwal̦o̦k kõn ña ilo Jerusalem.”
12 Ke ear raan, ri-Ju ro rar kweilo̦k ippãn doon im kõm̦m̦ane juon aer pepe. Rar kõm̦m̦ane juon kallim̦ur im ba bwe en wal̦o̦k jorrããn ñan er el̦aññe renaaj m̦õñã ak idaak m̦okta jãn aer m̦ane Paul. 13 Elõñl̦o̦k jãn 40 em̦m̦aan rar kõm̦m̦ane kallim̦ur in. 14 Em̦m̦aan rein rar etal ñan ippãn bũrij ro reutiej im ri-tõl ro im ba: “Em̦õj ammim kõm̦m̦ane juon kallim̦ur bwe en wal̦o̦k jorrããn ñan kõm el̦aññe kõm naaj m̦õñã jabdewõt men m̦okta jãn ammim m̦an Paul. 15 Kõn men in, kom̦ im aolep ro uwaan Im̦õn Ekajet eo El̦ap an ri-Ju, kom̦win kõnnaanek ri-tõlin jarin tarin̦ae en̦ bwe en bõktok Paul ñan ippemi bwe en ãinwõt ñe kom̦ij itõn etalel̦o̦k wõt abn̦õn̦õ eo kõn e. Bõtab m̦okta jãn an tõpartok ijin, kõm naaj pojak kadede in m̦ane.”
16 Bõtab likao eo mañden Paul ear roñ bwe rej pepe in ankõmãjuri Paul, innem ear del̦o̦ñl̦o̦k ilo ijo jikin rũttarin̦ae ro im kõnnaanek e. 17 Innem Paul ear kũrtok juon iaan kapen ro an jarin tarin̦ae eo ñan ippãn im ear ba: “Kwõn bõkl̦o̦k likao in ñan ippãn ri-tõlin jarin tarin̦ae en̦, kõnke ewõr juon men ej aikuj ba ñane.” 18 Kõn men in, ear bõkl̦o̦ke ñan ippãn ri-tõlin jarin tarin̦ae eo im ba: “Paul, ri-kalbuuj en̦, ear kũrl̦o̦k ña im kajjitõk bwe in bõktok likao in ñan ippam̦ kõnke ewõr juon men ej aikuj ba ñan kwe.” 19 Innem ri-tõlin jarin tarin̦ae eo ear jibwe pein im bõkl̦o̦ke ñan juon jikin ejjel̦o̦k armej ie im kajjitõk ippãn: “Ta eo kwaar itõn ba ñan ña?” 20 Ear ba: “Em̦õj an ri-Ju ran̦ pepe bwe ren kab kajjitõk ippam̦ ñan bõkl̦o̦k Paul ñan ippãn ro uwaan Im̦õn Ekajet eo El̦ap an ri-Ju ran̦ ilju bwe en ãinwõt ñe rej itõn etalel̦o̦k wõt abn̦õn̦õ eo kõn e. 21 Bõtab kwõn jab katõprak kajjitõk en̦ aer kõnke elõñl̦o̦k jãn 40 iaan em̦m̦aan ran̦ aer rej kõttar bwe ren ankõmãjuri, im rar kõm̦m̦ane juon kallim̦ur im ba bwe en wal̦o̦k jorrããn ñan er el̦aññe renaaj m̦õñã ak idaak m̦okta jãn aer m̦ane. Repojak kiiõ im rej kõttar wõt mãlim eo jãn kwe.” 22 Ri-tõlin jarin tarin̦ae eo ear kõtl̦o̦k bwe likao eo en etal ãlikin an kar jiroñl̦o̦k im ba: “Kwõn jab ba ñan jabdewõt ke kwaar kwal̦o̦k men kein ñan ña.”
23 Innem ear kũrtok ruo iaan kapen ro an im ba: “Kõpooj 200 rũttarin̦ae bwe kom̦win kajjul̦o̦k ñan Seseria, im bar bõk 70 ro rej uwe ioon kidia im 200 rũbbõk m̦ade, im kom̦win kab em̦m̦akũt 9 awa jim̦a buñniin.* 24 Kom̦win bar kõpooj jet kidia ñan Paul, im kom̦win kab kõjparokel̦o̦k ñan ippãn Filix, kom̦ja* en̦. 25 Innem ear je juon lõta im ba:
26 “Jãn Klaudiõs Lisiõs ñan Kom̦ja* Filix, Eo Eutiej Tata: Yokwe eok! 27 Ri-Ju ro rar jibwe em̦m̦aan in im rar itõn m̦ane ñan mej, bõtab iar m̦õkajl̦o̦k kõn rũttarin̦ae ro aõ im lo̦mo̦o̦rene kõnke iar roñ bwe e juon ri-Rom. 28 Im kõnke iar kõn̦aan jel̦ã ta unin aer kar liaakel̦o̦k, iar bõkl̦o̦ke ñan Im̦õn Ekajet eo aer El̦ap. 29 Iar kile bwe men ko rej liaakel̦o̦k kaki rej ikijjeen Kien* eo aer make, bõtab ejjel̦o̦k juon men ear kõm̦m̦ane im ej tõllo̦kũn an mej ak kalbuuj. 30 Ijoke, kõnke kar kõnnaanek eõ bwe em̦õj kõm̦m̦ane juon pepe ñan m̦ane em̦m̦aan in, ij m̦õkaj im jilkinwaj ñan ippam̦ im ij jiroñ ro rej liaakel̦o̦k bwe ren jãdewaj im̦aam̦ im kwal̦o̦k abn̦õn̦õ ko aer n̦ae l̦ein.”
31 Innem rũttarin̦ae ro rar bõk Paul ekkar ñan naan ko kar jiroñ er kaki im rar bõkl̦o̦ke ñan Antipetris ke ear boñ. 32 Raan eo tok juon, ãlikin aer kar kamãlim ro rej uwe ioon kidia bwe ren wõnm̦aanl̦o̦k wõt im etal ippãn Paul, rar jepl̦aak ñan ijo jikin rũttarin̦ae. 33 Ro rar uwe ioon kidia rar del̦o̦ñl̦o̦k ilo Seseria im rar bõkl̦o̦k lõta eo ñan kom̦ja* eo im rar bar bõkl̦o̦k Paul ñan ippãn. 34 Innem ear riiti lõta eo im ear kajjitõk Paul ej jãn ia, im ke ear jel̦ã bwe ej itok jãn Silisia, 35 ear ba, “Inaaj lukkuun etale abn̦õn̦õ in n̦ae eok ñe ro rej liaakel̦o̦k eok retõpartok ijin.” Innem ear ba bwe ren likũti Paul ilo m̦weo im̦õn Herod, im ren kanooj waje.