2 Jon

1 Jãn eo erũtto,* ñan lio em̦õj kããlõte im ro nejin, ro ij lukkuun yokwe er, im ejjab ña wõt ak bareinwõt aolep ro rejel̦ã kõn m̦ool eo, 2 kõnke m̦ool eo ej pãdwõt ilo kõj im enaaj pãd ippãd ñan indeeo. 3 Anij, Jemãdwõj ilañ, im Jesus Christ, eo ej Nejin, renaaj kwal̦o̦k ñan kõj jouj eo el̦ap, tũriam̦o, im aenõm̦m̦an, ekoba yokwe im m̦ool.

4 Ekanooj l̦ap aõ lañlõñ kõn aõ jel̦ã bwe jet iaan ran̦e nejũm̦ rej etetal ilo m̦ool eo, ãinwõt an kar Jemãdwõj ilañ kakien kõj kake. 5 Innem kiiõ ij kajjitõk ippam̦, lio em̦õj kããlõte, bwe jen kwal̦o̦k yokwe ñan doon. (Men in ij je ñan eok ejjab juon kien ekããl, ak ej juon kien ear pãd ippãd jãn jinoin.) 6 Im eñin ej mel̦el̦ein yokwe, ej bwe jen wõnm̦aanl̦o̦k wõt im etetal ekkar ñan kien ko an. Kien eo in ej bwe kom̦ij aikuj wõnm̦aanl̦o̦k wõt im etetal ilo yokwe, ãinwõt ami kar roñ jãn jinoin. 7 Elõñ ri-etao em̦õj aer kiiõ wal̦o̦k ilo lal̦ in, rein rejjab kile bwe Jesus Christ ear itok ilo kanniõk. Eñin ej ri-etao eo im ri-jum̦ae Christ.

8 Kom̦win kõjparok kom̦ make bwe kom̦win jab jerwaane tõprak ko kõmar kate kõm kaki, im bwe kom̦win maroñ bõk aolepen jinõkjeej eo. 9 Jabdewõt eo ejjab pãdwõt ilo katak ko an Christ im ej el̦l̦ãl̦o̦k jãni, Anij ejjab buñbũruon ippãn. Bõtab, eo ej pãdwõt ilo katak ko an, Jemãdwõj ilañ im Nejin rej jim̦or buñbũrueerro ippãn. 10 El̦aññe jabdewõt armej ej iwõj ñan ippemi, ak ejjab bõkwaj katak kein, kom̦win jab kadel̦o̦ñe ñan m̦õko im̦õmi ak yokyokwe. 11 Bwe eo ej yokyokwe armej in, ej rejetake jerbal ko an renana.

12 Ekanooj in lõñ men ko ikõn̦aan ba ñan kom̦, ijoke ijjab kõn̦aan jei ilo peba im kõn ink. Bõtab, ij kõjatdikdik in iwõj bwe in jelm̦aik kom̦ im kõnono ippemi, bwe kom̦win lukkuun lañlõñ.

13 Ro nejin lio jeim̦, eo kar kããlõte, rej jilkinwaj aer naanin yokyokwe.