Jon
2 Ruo raan tokãlik, ekar wõr juon kõjota in m̦are ilo jikin eo etan Cana ilo Galili, im jinen Jesus ear pãd ilo iien in. 2 Rar bar kũrtok Jesus im ri-kal̦oor ro an ñan iien kõjota in m̦are in.
3 Ke ear itõn maat wain, jinen Jesus ear ba ñane: “Emaat wain.” 4 Bõtab Jesus ear ba: “Kõrã en̦, etke kõjro ej aikuj inepata kõn men in?* Ejjañin jejjet iien eo aõ.” 5 Innem jinen ear ba ñan ri-jerbal ro: “Jabdewõt men ej jiroñ kom̦, kom̦win kab kõm̦m̦ane.” 6 Ekar wõr jiljino nien dãn kõm̦m̦an jãn dekã rar pãd ijo ekkar ñan kien ko an ri-Ju kõn karreo, im kobban kajjojo iaaer ej tarrin 12 l̦o̦k ñan 17 kal̦an.* 7 Jesus ear ba ñan er: “Kom̦win teiñi nien dãn kein kõn aebõj.” Innem rar teiñil̦o̦k ñan ñe rebool̦. 8 Im ear ba ñan er: “Teiñi jidik dãn im bõkl̦o̦k ñan ippãn eo ej bõk eddon kõjota in.” Innem rar kõm̦m̦ane men eo ear ba. 9 L̦eo ej bõk eddon kõjota eo ear edjoñe dãn eo em̦õj an erom wain, bõtab ear jab jel̦ã ia eo ej itok jãne (ri-jerbal ro rar bõktok dãn eo rar jel̦ã). Innem l̦eo ej bõk eddon kõjota eo ear kũrtok em̦m̦aan eo ej kab m̦õj an m̦are, 10 im ear ba ñane: “Aolep rej kwal̦o̦k wain enno̦ m̦okta, im ñe armej rej kadek, rej kab kwal̦o̦ktok wain bajjek. Ak kwe, kwaar kakon̦e wain eo enno̦ ñan kiiõ.” 11 Jesus ear kõm̦m̦ane menin kabwilõñlõñ* in an kein kajuon ilo Cana, bukwõn eo ilo Galili. Ilo wãween in, ear kwal̦o̦k kõn kajoor eo an, im ri-kal̦oor ro an rar likũt aer tõmak ilo e.
12 Ãlikin men in, Jesus im jinen im l̦õm̦aro jatin kab ri-kal̦oor ro an rar ilo̦k ñan Kaperneum, bõtab jet wõt raan in aer pãd ijo.
13 Ke ear epaaktok iien Kwõjkwõjin Kijoone* eo an ri-Ju ro, Jesus ear etal ñan Jerusalem. 14 Innem ke ear del̦o̦ñ ilo tampel̦ eo, ear lo ro rej wiakake kau im jiip im m̦ul̦e, im ro rej jãnij jããn ilo jea ko aer. 15 Kõn men in, ãlikin an kar kõm̦m̦ane juon kein deñdeñ jãn to, ear kadiwõjl̦o̦k aolep jiip im kau ko jãn tampel̦ eo ippãn ro rej wiakaki. Innem ear bar julo̦k aolep jããn ko an ro rej jãnij jããn im ear ukõji tebõl̦ ko aer. 16 Im ear kõnnaan ñan ro rej wia kõn m̦ul̦e im ba: “Kom̦win bõk aolep men kein jãn ijin! Kom̦win bõjrak jãn ami kõm̦m̦an bwe m̦wiin im̦õn Jema en jikin wia!” 17 Ri-kal̦oor ro an rar keememejtok men eo Jeje ko rej ba: “Eurur bũruõ ãinwõt kijeek kõn aõ kijejeto kõn m̦weo im̦õm̦.”
18 Innem ri-Ju ro rar ba ñane: “Kwõmaroñ ke kõm̦m̦ane juon menin kabwilõñlõñ* ñan kõm ñan kam̦ool bwe ewõr am̦ jim̦we im maroñ ñan kõm̦m̦ani men kein?” 19 Jesus ear uwaake er im ba: “Kom̦win rupe tampel̦ in, im inaaj bar kajutake ium̦win jilu wõt raan.” 20 Im ri-Ju ro rar ba: “Kar kalõke tampel̦ in ium̦win 46 iiõ, ta m̦ool ke kwõmaroñ bar kajutake ium̦win jilu wõt raan ke?” 21 Bõtab ke ear kõnono kõn tampel̦, ear kõnnaan kõn ãnbwinnin. 22 Im ilo iien eo ear jerkak jãn mej, ri-kal̦oor ro an rar keememejtok an kõn ba men in, innem rar tõmak ta eo Jeje ko rej ba kab men eo Jesus ear ba.
23 Innem ke ear pãd ilo Jerusalem, ear kõm̦m̦an menin kabwilõñlõñ* ko ilo iien Kwõjkwõjin Kijoone eo. Ke armej ro rar lo men kein, elõñ rar likũt aer tõmak ilo etan. 24 Ak Jesus ear jab lõke er kõnke ejel̦ã kake er aolep, 25 im kõnke ear jab aikuji an jabdewõt kõmel̦el̦eiki kõn l̦õmn̦ak ko an armej bwe ejel̦ã ta ko rej pãd ibũrueer.