Katak 8

Mour In Family Eo Me Ej Kabuñburuen Anij

Ta jerbal eo an leo ilo family eo? (1)

Ewi wãwen an leo watõk lio ibben? (2)

Ta eddo ko an juõn jemen? (3)

Ta jerbal eo an lio ilo family eo? (4)

Ta eo Anij ekõnan jen jemen im jinen im ajiri ro? (5)

Ta lemnak eo an Bible kin kamakelok ian im jibel? (6, 7)

1. Bible ej ba bwe jemen en bõran family eo an. (1 Korint 11:3) Juõn emaan emwij mare ej aikwij wõr juõn wõt belen. Rej aikwij mare ekkar ñõn kien ko an lõl.​—1 Timothy 3:2; Titus 3:1.

2. Leo ej aikwij yokwe lio belen einwõt emake. Ej aikwij yokwe e ilo ejja joñan eo wõt Jesus ear yokwe ro ri kaloran. (Epesõs 5:25, 28, 29) En jab mõn e ak kõmmõn jabdewõt men ejakkar ñõn e. Jen men in, ej aikwij nebar im kautiej e.​—Kolosse 3:19; 1 Peter 3:7.

3. Juõn jemen ej aikwij kate wõt ilo jerbal eo an ñõn kejbarok family eo an. Ej aikwij kabwe aikwij ko an lio belen im ro nejin ikijen mõñã ko kijeir, ballir, im jikin jokwe ko air. Bareinwõt juõn jemen ej aikwij kabwe aikwij ko ilo jitõb an family eo an. (1 Timothy 5:8) Ej bed iman ñõn jibañ family eo an ñõn katakin family eo an ñõn katak kin Anij im karõk ko An.​—Deuteronomy 6:4-9; Epesõs 6:4.

4. Lio ej juõn ri jibañ emõn ñõn leo belen. (Genesis 2:18) Ej aikwij jibañ leo ñõn katakin ajiri ro nejeiro. (Jabõn Kennan 1:8) Jehovah ekõnan bwe lio en kejbarok family eo an ilo yokwe. (Jabõn Kennan 31:10, 15, 26, 27; Titus 2:4, 5) Ej aikwij kautiej leo belen.​—Epesõs 5:22, 23, 33.

5. Anij ekõnan bwe ajiri ro ren bokake jemeir im jineir. (Epesõs 6:1-3) Ekõnan bwe jemen im jinen ajiri ro ren kibel im kajimwe ro nejeir. Jemen im jinen ro rej aikwij lelok ien ñõn kamao ibben ajiri ro nejeir im katak Bible ibbeir, im kabwe aikwij ko air ilo jitõb im eñjake. (Deuteronomy 11:18, 19; Jabõn Kennan 22:6, 15) Jemen im jinen ro ren jab kauweik ajiri ro nejeir ilo wãwen eo elej ak illu.​—Kolosse 3:21.

6. Ñe ewor abañ ko ikõtan ri belele ro, rej aikwij kajeoñ in jerbale nan in kakabilek ko an Bible. Bible eo ej rejañ kij ñõn kwalok yokwe im jolok bwid. (Kolosse 3:12-14) Nan in Anij ejjab rejañ kij bwe kamakelok iad jen ri belele ro mõttad ej wãwen eo ñõn kamadmõd abañ ko redik. Ak juõn kõrã ri belele emaroñ kãlet bwe en illok jen leo belen elañe (1) ejjab kõnan kabwe aikwij ko an family eo an, (2) joñan an lap an lej bwe ejmour im mour eo an lio en bed ilo kauatata, ak (3) joñan an lap an leo belen jumae ej kõmmõn bwe lio eban kabuñ ñõn Jehovah.​—1 Korint 7:12, 13.

7. Lõmaro im limaro ri belele rej aikwij tiljek ibben don. Lũñ ej juõn jerawiwi nae Anij im ri belele eo mõttan. (Hebrew 13:4) Kobalok ibben bar juõn ijellokin ri belele eo mõttan ej bedbed eo wõt ekkar ñõn Bible ñõn jibel im bar mare. (Matthew 19:6-9; Rome 7:2, 3) Jehovah ej dike ñe armij ro rej jibel im ejelok bedbed ilo Bible im mare bar juõn armij.​—Malachi 2:14-16.

[Pija ko ilo peij 16, 17]

Anij ekõnan bwe jemen im jinen ajiri ro ren katakin ajiri ro nejeir im kajimwe ir

[Pija eo ilo peij 17]

Juõn jemen eyokwe ej kabwe aikwij ko an family eo an ilo kanniek im jitõb