Ñããt Eo Kõrã ro Rej Aikuj Kalibubu Bõraer im Etke?

Etke im ñããt eo kõrã ro rej aikuj kalibubu bõraer ñe rej kõm̦m̦ani jerbal ko aer ñan Anij? Rijjelõk Paul ear letok naan in kakapilõk ko me jej aikuj l̦oori ñan kõm̦m̦ani pepe ko rem̦m̦an im rej kwal̦o̦k ad kautiej Anij. (1 Korint 11:3-16, UBS) Paul ear kwal̦o̦k ruo men ko jej aikuj kõl̦mãnl̦o̦kjen̦ kaki. Kein kajuon, iien eo me kõrã ro rej aikuj kalibubu bõraer. Im kein karuo ej unin an kõrã ro kalibubu bõraer.

Iien ko rej aikuj kalibubu bõraer. Paul ear ba bwe kõrã ro rej aikuj kalibubu bõraer ilo iien aer jar im iien aer kwal̦o̦k kõn naan in Anij. (Eoon 4 im 5) Jar ej m̦õttan wãween ko me jej kõjerbali ilo ad kabuñ ñan Anij. Rainin, kwal̦o̦k kõn naan in Anij ej jitõñl̦o̦k ñan jabdewõt iien ñe jej katakin armej ro jãn Baibõl̦. Paul ej ke ba bwe kõrã ro rej aikuj kalibubu bõraer aolep iien ñe rej jar ak katakin armej ro kõn Baibõl̦? Ejjab. Bõtab, ewõr iien ko me kõrã ro rej aikuj kalibubu bõraer.

Paul ear kwal̦o̦k iien ko me kõrã ro rej aikuj kalibubu bõraer ñe rej pãd ippãn baam̦le eo im ippãn eklejia eo. Ear ba bwe l̦eo ej bõran kõrã eo im “jabdewõt kõrã eo ej jar ak kwal̦o̦k naan in Anij ilo iien kabuñ, ak ejjab kalibubu bõran, ejjab kautiej l̦eo pãleen.” (Eoon 3, 5) Ilo baam̦le ko kajjojo, Jeova ear kããlõt l̦eo bwe en bõran kõrã eo im ajri ro. El̦aññe kõrã in ejjab kautiej l̦ein ippãn, mel̦el̦ein men in bwe ej kajook l̦eo pãleen ilo an bõki eddo ko me Anij ear lel̦o̦k ñan em̦m̦aan ro. Ñan waanjoñak, el̦aññe kõrã eo ej katak Baibõl̦ ippãn bar juon ak l̦eo ippãn ej pãd ijo, eokwe enaaj aikuj kalibubu bõran ñan kwal̦o̦k bwe ej kautiej l̦eo ippãn. Kõrã in ej aikuj kõm̦m̦ane men in meñe l̦eo pãleen ejjañin peptaij, kõnke l̦eo ej bõran baam̦le eo aerro.a El̦aññe kõrã in ej jar ak katakin bõtab l̦addik eo nejin edik me em̦õj an peptaij ej pãd ijo, eokwe kõrã in ej aikuj kalibubu bõran. Meñe l̦addik eo ejjab bõran baam̦le eo, ak kõrã in ej kwal̦o̦k kautiej ñan karõk ko an Anij ñan em̦m̦aan ro me em̦õj aer peptaij ilo eklejia eo.

Ak ta kõn jerbal ko ilo eklejia eo? Paul ear ba: “El̦aññe ewõr en̦ ekõn̦aan akwããl kõn men in, men eo inaaj ba de in, ke ebar ejjel̦o̦k m̦antin kabuñ ippem kab ilo eklejia ko an Anij.” (Eoon 16) Ilo eklejia ko, kar lel̦o̦k maroñ ñan em̦m̦aan ro me em̦õj aer peptaij. (1 Timote 2:11-14; Hibru 13:17) Em̦m̦aan ro wõt me em̦õj aer peptaij remaroñ erom ro rej lale eklejia eo im ri jipañ ro ilo eklejia eo. Eddo eo aer jãn Anij ej ñan lale im kõjparok ro doon. (Jerbal 20:28) Bõtab, jet iien, kar jitõñ jet kõrã bwe ren kõm̦m̦ani eddo ko me ekkã wõt an em̦m̦aan ro me rej lale eklejia eo kappeik em̦m̦aan ro em̦õj aer peptaij ñan kõm̦m̦ani. Ñan waanjoñak, el̦aññe ejjel̦o̦k em̦m̦aan ijo me em̦õj an peptaij im ekkar bwe en tõl, eokwe juon kõrã emaroñ wõnm̦aanl̦o̦k im tõl ilo kweilo̦k in kwal̦o̦k naan. Bareinwõt, kõrã in emaroñ wõnm̦aanl̦o̦k wõt im katak Baibõl̦ ippãn ri katak ro an meñe juon em̦m̦aan me em̦õj an peptaij ej pãd ijo. Bõtab, kõnke jerbal kein rej an eklejia eo an Anij, kõrã in ej aikuj kalibubu bõran ñan kaalikkar ke ej kõm̦m̦ani jerbal kein me en kar ñan em̦m̦aan ro.

Ewõr iien ko me kõrã eo ejjab aikuj kalibubu bõran. Ñan waanjoñak, ejjab aikuj kalibubu bõran ñe ej uwaak ilo iien kweilo̦k ko. Ejjab bar aikuj kalibubu bõran ñe ej kwal̦o̦k naan jãn em̦ ñan em̦ ippãn l̦eo pãleen ak bar juon em̦m̦aan me em̦õj an peptaij im ñe ej katak ak jar ippãn ajri ro nejin me rejjañin peptaij. Bõtab, el̦aññe ebar wal̦o̦k jet wãween ko im kõrã eo ejjab lukkuun jel̦ã el̦aññe ej aikuj kalibubu bõran, eokwe ej aikuj bar lukkuun etali mel̦el̦e ko jet. El̦aññe em̦õj an kõm̦m̦ane men in, ak ejjañin de jel̦ã ta eo ej aikuj kõm̦m̦ane, eokwe ejjel̦o̦k jorrããn ñe enaaj kalibubu bõran ilo iien eo me ej l̦õmn̦ak bwe ej aikuj.b Emaroñ kõm̦m̦ane men in, ãinwõt kõrã eo ilo pija in.

Un eo. Eoon 10 ej kwal̦o̦k ruo un ko kõrã ro rej aikuj l̦oore kien in. Ej ba: “Kõn enjel̦ ran̦, juon kõrã en kalibubu bõran.” Ñe juon kõrã ej kalibubu bõran, ej kwal̦o̦k kautiej ñan maroñ eo me Jeova ear lel̦o̦k ñan em̦m̦aan ro ilo eklejia eo me em̦õj aer peptaij. Ilo wãween in, kõrã in ej kwal̦o̦k bwe ej yokwe im tiljek wõt ñan Jeova Anij. Bar juon un ej “kõn enjel̦ ran̦.” Ñe juon kõrã ej kalibubu bõran, ewi wãween men in ej jelõt enjel̦ ro ilañ?

Enjel̦ ro rej m̦õn̦õn̦õ ñe rej loe bwe aolep rej kaorõk karõk ko ilo doulul eo an Jeova ilañ im bar ioon lal̦ in. Rej bar katak jãn joñak ko an armej ro me rejjab weeppãn. Etke? Kõnke enjel̦ rein rej aikuj bar kõttãik er ñan karõk ko an Jeova. Im ilo kar iien ko etto, jet enjel̦ ro rar jab tiljek wõt ñan Anij. (Jud 6) Bõlen enjel̦ rein rej reitok im lo bwe jet kõrã el̦apl̦o̦k aer imminene ilo jerbal ko an Anij im el̦apl̦o̦k aer mãlõtlõt jãn jet em̦m̦aan ro me em̦õj aer peptaij ilo eklejia eo. Bõtab, rej lo bwe kõrã rein rej m̦õn̦õn̦õ in kõttãik er make ñan rein me Anij ear kããlõt er. Ilo jet eklejia ko, ewõr kõrã ro me rej uwaan ri kapit ro, me tokãlik renaaj ilo̦k im irooj ippãn Kũraij ilañ. Enjel̦ ro rej lukkuun m̦õn̦õn̦õ in lale aolep joñak ko rem̦m̦an an kõrã ro! Ej juon jeraam̦m̦an el̦ap ñan kõrã ro ñan kaalikkar joñan aer tiljek im kõttãik er im̦aan mejãn elõñ milien enjel̦ ro!