Enjel̦ Ro Rej Kõjjel̦ã kõn An Jesus L̦otak

Irooj eo an Rom etan Sizar Augõstõs, ear jiroñ aolep RiJu ro bwe ren jepl̦aak ñan ijoko jikier bwe ren je etaer ilo iien bõnbõn armej. Kõn men in, Josep im Meri rar em̦m̦akũt im etal ñan Betleem, ijo baam̦le eo an Josep rar itok jãne. Ilo iien in, m̦õttan jidik Meri epojak in kal̦otake niñniñ eo nejin.

Ke erro kar tõpar Betleem, erro kar pãd ilo juon im̦õn menninmour kõnke ede in jikin ear pel̦l̦o̦k ñan aerro pãd ie. Eñin ijo Meri ear kal̦otake niñniñ eo nejin, Jesus. Meri ear ko̦o̦joje kõn m̦õttan nuknuk ko remeoeo im kõbabuuki ilo men eo nien kijen menninmour.

Ilo juon jikin epaake Betleem, ekar wõr jet rũlale jiip ro rar pãd nabõj ilo boñõn eo im lale jiip ko aer. Ilo jidimkij, juon enjel̦ ear jutak im̦aaer im meram in aiboojoj eo an Jeova ear pãd ipel̦aakier. Rũlale jiip rein rar lukkuun mijak, ak enjel̦ eo ear ba: ‘Jab mijak. Ewõr juon ennaan em̦m̦an ij bõktok. Messaia eo ear l̦otak rainin ilo Betleem.’ Ilo iien eo wõt, ear wal̦o̦k elõñ enjel̦ im aolepeer rar ba: ‘Nõbar im aiboojoj ren ilo̦k ñan Anij ilañ, im aenõm̦m̦an ñan ioon lal̦.’ Innem enjel̦ ro rar kajju jako. Ta eo rũlale jiip ro rar kõm̦m̦ane ke rar loi men kein?

Rũlale jiip rein rar jiroñ doon im ba: ‘Jen etal kiiõ ñan Betleem.’ Kõn men in, rar m̦õkaj im etal im rar loe Josep im Meri ilo im̦õn menninmour eo ippãn niñniñ eo nejierro.

Aolep ro rar roñ kõn men eo enjel̦ eo ear ba ñan rũlale jiip ro rar lukkuun bwilõñ. Meri ear lukkuun kõl̦mãnl̦o̦kjen̦ kake naan ko an enjel̦ eo im ear jab mel̦o̦kl̦o̦ki naan ko an. Rũlale jiip ro rar ro̦o̦l im bar lale jiip ko aer, im rar kam̦m̦oolol Jeova kõn aolepen men ko rar roñ im loi.