Jesus Ej Katakin Rũkal̦oor Ro An Kilen Jar

Parisi ro rar kajjioñ kõm̦m̦an bwe armej ro ren nõbar er ilo jabdewõt men rar kõm̦m̦ane. Rar kwal̦o̦k jouj im kõm̦m̦ani men ko rem̦m̦an ñan ro jet bwe armej ren jel̦ã kaki im loi. Bareinwõt, rar jar ilo̦bwilej ak jikin ko me armej remaroñ lo er ie. Joñan, rar kakkilõklõki jar ko raetok im ãliji ñe rej jar ilo im̦õn kabuñ ko im iturin ial̦ ko bwe armej ro ren maroñ roñ. Eñin unin armej ro rar bwilõñ ke Jesus ear jiroñl̦o̦k er im ba: ‘Kom̦win jab jar ãinwõt Parisi ran̦. Rej l̦õmn̦ak bwe Anij enaaj m̦õn̦õn̦õ im nõbar er kõn an aetok aer jar, ak ilo m̦ool ejjab. Jar ej ikõtaam̦ wõt im Jeova. Innem kwõn jab ãlijinmen ilo am̦ jar. Jeova ekõn̦aan bwe kwõn kwal̦o̦k bũruom̦ ñane.

En ãindein ami jar: “Jememwõj ilañ, en kwõjarjar etam̦, en itok am̦ Aelõñ. En jejjet ankilaam̦ ilo lal̦ in ãinwõt an jejjet ilo lañ.” Jesus ear bareinwõt jiroñl̦o̦k er bwe ren jar im kajjitõk bwe en wõr kijeer m̦õñã ilo kajjojo raan, im bwe Anij en jol̦o̦k aer bõd, im ren kwal̦o̦k kõn apañ ko rej iiooni ilo mour ko aer.

Jesus ear ba: ‘Kom̦win jab bõjrak jãn ami jar. Kom̦win wõnm̦aanl̦o̦k wõt im kajjitõk ippãn Jemãdwõj, Jeova, kõn men ko rem̦m̦an. Aolep ro jemãn im jinen ajri ro rekõn̦aan lel̦o̦k men ko rem̦m̦an ñan ro nejier. El̦aññe ajri eo nejũm̦ ej kajjitõk kijen pilawã, kwõnaaj ke lel̦o̦k juon dekã? Ñe enaaj kajjitõk kijen ek, kwõnaaj ke lel̦o̦k juon jineik?’

Innem Jesus ear kõmel̦el̦eik ta eo remaroñ katak jãn men in. Ear ba: ‘El̦aññe kom̦ jel̦ã kilen lel̦o̦k men ko rem̦m̦an ñan ro nejimi, innem enaaj l̦apl̦o̦k an Jemãdwõj ilañ, Jeova, m̦õn̦õn̦õ in lewaj jetõb kwõjarjar eo an ñan kom̦. Men eo wõt kom̦ij aikuj kõm̦m̦ane ej kajjitõk.’ Kwõj ke l̦oore naanin kakapilõklõk in an Jesus? Ta ko kwõj jar kaki?