Jehovah Ej Kememej Ri Kennan Ro Rar Mõn Ir ar Kememej Kake Ir
ILO March 7, 2002, juõn kein kakememej rar kwaloke ilo bukwon in Körmend ilo turõkin ailiñ in Hungary. Ear kautiej mij ko an jilu Ri Kennan ro an Jehovah Ri Nazi ro rar mõn ir ilo 1945.
Kein kakememej eo rar kõlaak ilo worwor in headquarter ko ilo ran kein ñan fire department eo ilo ial in Hunyadi Road, ijo rar mõn elõñ armij ro ie iman mejen armij ro. Kein kakememej in rar ajelok ñan kememeje ‘Ri Christian ro rar mõn ir kin air jab bõk kunair ilo tarinae eo ilo March 1945. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Ri Kennan ro an Jehovah.’
Rar mõn ir ruo wõt alliñ ko lok iman ilo ien jemlokin Bata eo an Lal kein ka 2. Etke rar mõn Ri Christian rein? Newspaper in kajin Hungary Vas Népe ear kamelele: “Elikin an Hitler wanliñlok im iroij ilo Germany, ejjab Ri Jew ro wõt ak Ri Kennan ro retiljek an Jehovah bareinwõt rar bojak in bõk matõrtõr im eñtan, bed ilo kalbuj im mij ijo elañe rar jab karmijeteik tõmak eo air. . . . Ilo March 1945, lelñoñ ear iroij iaolepen turõkin Hungary. . . . Mõttan lelñoñ in kar ikijen air bõklok im mõn ro uan Ri Kennan ro an Jehovah.”
Program eo ñan kwalok kein kakememej eo ear walok ilo ruo mõttan. Mõttan eo kein kajuõn ear walok ilo juõn theater etan Batthyány Castle, ijo ri konono ro ekoba Professor Szabolcs Szita, eo ej tel Holocaust Documentation Center ilo Budapest; László Donáth, juõn uan Parliament Committee ñan Human Rights, Minority im Religious Affair; im Kálmán Komjáthy, juõn ri kamol ñan ien mõnmõn armij ak ej juõn ri bwebwenato eo ñan bukwon eo. Elõñ jen 500 armij rar kijone bukwon eo im bed ilo mõttan eo kein karuo in program eo—kwalok kein kakememej eo ikijen Mayor József Honfi of Körmend.
Ilo letter eo an eliktata, Ján Žondor (János Zsondor) ear rejañ Christian ro jeiõ im jatid bwe ren jab buromõj. Ear je: “Ij kememej wõt nan ko an John ilo Reveles̃õn 2:10: ‘Kwon tiljek ñõn mij.’ . . . Komin jiroñ ro ilo congregation eo bwe ren jab liãjlol, kinke ij mij kin mol eo im jab kin aõ einwõt juõn ri kowadoñ.”
[Pija eo ilo peij 32]
Bertalan Szabó
[Pija eo ilo peij 32]
Antal Hőnisch
[Pija eo ilo peij 32]
Ján Žondor