Ro Rej Riiti Buk ko Ar Rej Kajitõk
Etke Dri Kennan Ro An Jeova Rejjab Tõrinae?
Ilo jabrewõt jikin ko dri Kennan ro an Jeova rej jokwe ie, etto air jela kake ir bwe rejjab bõk kunair ilo tõrinae ko ikõtan ailiñ ko ak ikõtan kumi ko ilo ejja ailiñ eo wõt. Enañin limñoul yiõ ko remotlok, juõn encyclopedia ilo Australia ear report: “Dri Kennan ro an Jeova rejjab bõk kunair ñõn jidrik ñe eor tõrinae ko.”
Juõn un elap unin dri Kennan ro an Jeova rejjab bõk kunair ilo tõrinae ko ej kinke men in ej nae bõklikõt eo air. Kar katakin bõklikõt eo air kin kien ko im joñok eo an Iroij Jisõs Kraist. Ear jiroñ dri kalor ro an ñõn yokwe ro dri turiir. Ear bareinwõt kakien ir: “Komin yokwe ami dri kijirãt, kõmõnmõn emõn ñõn ro rej kijirãte kom.” (Luk 6:27; Matu 22:39) Ke juõn ian dri kalor ro an ear kajeoñ in jojomar e kin juõn jãje, Jisõs ear ba ñõn e: “Kwon bar likit am jãji na ilo nien: bwe ro otemjej rej bõk jãji, re naj mij kin jãji.” (Matu 26:52) Inem, ikijen nan im joñok eo an, ear kwalok ilo alikar bwe dri kalor ro an rejjab kajerbal kein tõrinae ko.
Bar juõn unin dri Kennan ro an Jeova rejjab bõk kunair ilo tõrinae ej bwe rej mõtõn juõn kumi in kabuñ me ej ber ibelakin lõl. Elañe rej bõk kunair ilo tõrinae, ro rej nukin dron ilo tõmak renaj tõrinaek dron im men in ej nae kien eo an Jisõs bwe en or ar ‘yokwe dron.’—Jon 13:35.
Nan in kaiñi ko ilõñ ikijen yokwe ejjab juõn men me dri Kennan ro an Jeova rej baj bwebwenato kake wõt, ak jen an eindrein, rej jerbali ilo mour ko air. Einwõt juõn wanjoñok, lale wãwen air kar drebij wõt air tiljek ilo Bata eo an Lõl Kein Karuo, ilo 1939-1945. Ilo Amerika, elõñlok jen 4,300 dri Kennan ro an Jeova rar kalbuj ilo imõn kalbuj ko an kien kin air kar makoko in bõk kunair ilo jerbal ko an dri tõrinae. Ilo Britain, elõñlok jen 1,500 armij ro, ekoba elõñlok jen 300 kõra ro, rar kalbuj kin air makoko in kõmõni jerbal ko an dri tõrinae. Ilo Nazi Germany, Kien eo ear mõn elõñlok jen 270 dri Kennan ro kin air jab tõrinae. Iomin tel eo an Nazi, elõñlok jen 10,000 dri Kennan ro kar kalbuji ir. Bareinwõt dri Kennan ro ilo Japan ear lap air iñtan. Jabrewõt eo ear luji ro rejitenburu ibeir ilo jikin tõrinae ko ilo Bata eo an Lõl Kein Karuo, ak ilo jabrewõt tõrinae ko jet, remaroñ liki bwe ejelok juõn ian dri kennan ro an Jeova ear bõk kunan ilo mij eo an rein.
Lemnok eo an dri Kennan ro an Jeova kin tõrinae emelak an kar kwaloke ilo nan ko eliktata an Wolfgang Kusserow. Ilo 1942 dri Nazi ro rar jõbbare dri Germany in 20-yiõ-ridtõn kinke ear makoko in tõrinae. (Aiseia 2:4) Ear ba iman jikin ekajet eo an dri tõrinae: “Iar ridtolok einwõt juõn ian dri Kennan ro an Jeova, im kar katakin iõ ekkar ñõn nan eo an Anij ej ber ilo Jeje ko Rekwojarjar. Kien eo elaptata im ekwojarjar tata ear lelok ñõn armij ej: ‘Kwon yokwe Iroij am Anij ilõñin men otemjej im dri turõm im einwõt kwe.’ Kien ko jet rej ba: ‘Kwon jab uror.’ Dri Kõmõnmõn eo ear ke je aolep men kein kin wijki ko?”—Mark 12:29-31; Exodus 20:13.
Dri Kennan ro an Jeova rej tõmak bwe Jeova wõt ej Anij eo ekajur potata, im enaj bõktok ainemõn eo ej indrio ion lõl. Rej reilok ñõn e bwe en kajejit kalimur eo an ñõn “kejemlok tõrinae ko ñõn jemlokõn lõl.”—Sam 46:9.