“Eñin Ãt eo Etan Anij eo Ekwojarjar Otem Kwojarjar”
Nicholas jen Cusa ear ba nan kein ke ear kwalok juõn katak ilo yiõ eo 1430.a Lein ear itoklimo kin katak ko kin kajin Grik, Hibru, lemnak ko an armij, katak ko kin Anij, bwinbwin im katak kin iju ko. Ke ear 22 an yiõ, ear erom juõn dri meletlet kin kien ko an kabuñ in Catholic im ilo 1448 ear erom juõn pris eutiej.
Enañin 550 yiõ ko remotlok, Nicholas jen Cusa ear kajutak juõn imõn ridto ilo Kues, ak kiõ rej naetan Bernkastel-Kues, ej juõn jikin enañin 80 mail iturõkin jikin eo etan Bonn ilo Germany. Kiõ rej kajerbal mwin ñõn likit buk ko 310 me lein ear jeiki im rej naetan laibrãre an Cusa. Juõn ian buk kein etan Codex Cusanus 220, katak eo me Cusa ear kwaloke ilo yiõ eo 1430, ej bed ilo buk in. Ilo katak eo Ilo Jinoin Kar Nan Eo (In principio erat verbum) Nicholas ilo Cusa ear kajerbal nan in Iehoua ilo kajin Latin me ej melelen Jeova.b Buk eo ken ka 56 ej kwalok kin etan Anij: “ Ej letokin Anij. Kar je ilo kajin Hibru kin letta kein emen (YHWH) . . . Eñin etan Anij ekwojarjar otem kwojarjar.” Nan kein an Nicholas jen Cusa rej errã iben melele eo bwe etan Anij ej walok ilo jeje ko rekwojarjar ilo kajin Hibru.—Ex. 6:3.
Buk in an lein kar je elõñlok jen 1400 yiõ ko elikin lotak eo an Kraist. Ej juõn ian buk ko eto an bed im ej kajerbal nan in “Iehoua.” Men in ej kamol bwe rar je etan Anij ilo juõn wãwen ej einlok wõt “Jeova” jen ien ko etto.
[Kamelele Ko Itulal]
a Nicholas jen Cusa ãt ko etan jet rej Nikolaus Cryfts (Krebs), Nicolaus Cusanus, im Nikolaus von Kues. Kues ej etan jikin eo ear lotak ie ilo Germany.
b Katak eo an ear rejetak katak eo kin Jilu Anij ilo Juõn.
[Pija eo ilo peij 16]
Laibrãre eo an Cusa