Katak Jãn Naan In Anij

Etke Ewõr an Anij Doulul?

Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ta ko kwõmaroñ lo uwaak in kajjitõk kein ie ilo Baibõl̦ eo. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.

1. Etke Anij ear karõke Ri Israel ro?

Anij ear karõk ro ineen Ebream im kõm̦m̦an bwe ren juon aelõñ im ear lel̦o̦k elõñ kien ko ñan er. Anij ear n̦aetan aelõñ in, Israel, im ear lel̦o̦k eddo eo ñan er bwe ren kõjparok kabuñ eo em̦ool im Naan ko an. (Sam 147:19, 20) Kõn aer kar kõm̦m̦ane men in, aolep armej in aelõñ ko jet rar maroñ jeraam̦m̦an.​—Riit Jenesis 22:18.

Anij ear kããlõt Ri Israel ro bwe ren ri kõnnaan ro an. Ke rar pokake, rar bõk tokjãn kien ko an Anij. (Duteronomi 4:6, UBS) Ilo ad katak jãn bwebwenato ko kõn aelõñ in Israel, men in emaroñ jipañ kõj bwe en l̦apl̦o̦k ad jel̦ã kõn Anij eo em̦ool.​—Riit Aiseia 43:10, 12.

2. Etke el̦ap an Kũrjin ro rem̦ool laajrak im kon̦?

Tokãlik, ear jako an Anij m̦õn̦õn̦õ ippãn aelõñ in Israel. Kõn men in, Jeova ear kããlõt bwe eklejia eo an Kũrjin ro rem̦ool en bõk jikin aelõñ in Israel. (Matu 21:43; 23:37, 38) Ilo kar m̦okta, Ri Israel ro rar ri kõnnaan ro an Anij. Rainin, Kũrjin ro rem̦ool rej ri kõnnaan ro an Jeova.​—Riit Jerbal 15:14, 17.

Jijej ear karõk rũkal̦oor ro an bwe ren kwal̦o̦k naan kõn Jeova im kõm̦m̦an rũkal̦oor ilo aolep aelõñ ko. (Matu 10:7, 11; 24:14; 28:19, 20) Jerbal in ej epaakl̦o̦k wõt jem̦l̦o̦kin. Rainin, Jeova ej kobaik elõñ milien armej ro jãn aolep aelõñ ko bwe ren pãd ilo kabuñ eo em̦ool. (Revelesõn 7:9, 10) Kar bar karõke Kũrjin ro rem̦ool bwe ren rõjañ im kakajoor doon. Meñe rej pãd ilo aelõñ otemjej, katak ko rej bõki ilo iien kweilo̦k ko aer rej juon wõt.​—Riit Hibru 10:24, 25.

3. Ilo raan kein, ewi wãween doulul eo an Ri Kõnnaan ro an Jeova ekar jinoe?

Doulul eo an Ri Kõnnaan ro an Jeova ear jinoe ilo kar 1870 iiõ ko. Juon kumi edik me rar katak Baibõl̦ eo rar etale im loe katak ko rem̦ool jãn Baibõl̦ eo im eto aer kar n̦ojak. Rar jel̦ã bwe Jijej ear kõm̦m̦an laajrak ñan eklejia eo ilo iien ko etto bwe ren kwal̦o̦k naan. Kõn men in, ri katak Baibõl̦ rein rar jinoe juon jerbal in kwal̦o̦k naan ipel̦aakin lal̦. Ilo kar 1931, rar bõke ãt in Ri Kõnnaan ro an Jeova.​—Riit Jerbal 1:8; 2:1, 4; 5:42.

4. Ewi laajrak im kon̦ ko ilo doulul eo an Ri Kõnnaan ro an Jeova ilo raan kein?

Ilo iien ko etto, ear wõr juon kumi in em̦m̦aan ro me rar loloorjake eklejia ko wõj an Kũrjin. Em̦m̦aan rein rar kile bwe Jijej ej Bõran eklejia ko kajjojo. (Jerbal 16:4, 5) Ãindeinl̦o̦k wõt, Ri Kõnnaan ro an Jeova rainin rej bar kile bwe Jijej ej aer Ri Tõl. (Matu 23:9, 10) Ãinwõt iien ko etto, ewõr juon kumi in em̦m̦aan ro im rej lale elõñl̦o̦k jãn 100,000 eklejia ko an Ri Kõnnaan ro an Jeova ipel̦aakin lal̦ in. Ilo kajjojo iaan eklejia kein, ewõr em̦m̦aan ro me kar jitõñ er bwe ren lale eklejia eo. Em̦m̦aan rein rej lale armej ro an Anij ilo yokwe.​—Riit 1 Piter 5:2, 3.

Kar karõk im loloorjake Ri Kõnnaan ro an Jeova bwe ren kwal̦o̦k naan kõn nuuj eo em̦m̦an im kõm̦m̦an rũkal̦oor. Bwe ren maroñ jipañ armej ro ipel̦aakin lal̦ in, rej ukoti im kõm̦m̦an bok ko jãn Baibõl̦ eo ilo elõñl̦o̦k jãn 500 kajin ko. Ãinwõt rijjelõk ro kar jem̦aan, Ri Kõnnaan ro an Jeova rej kwal̦o̦k naan jãn em̦ ñan em̦. (Jerbal 20:20) Rej m̦õn̦õn̦õ in katak Baibõl̦ ippãn armej ro me em̦ool bũrueer. Kõnke armej ro an Jeova rej kate wõt er ñan kabuñbũruon Anij im jipañ ro jet, doulul eo aer eobrak kõn armej ro rem̦õn̦õn̦õ.​—Riit Sam 33:12; Jerbal 20:35.

Ñan bõk mel̦el̦e ko jet, jouj im lale Katak 19 ilo bok in. Bok in ej kõm̦m̦an in Ri Kõnnaan ro an Jeova.

Ta Eo Baibel Ej Lukkun Katakin?