En Or Ar Lemnok Kin Ro Jeer im Jãter Rekãl

1. Ta eo jej aikwiji bwe jen ‘jerbal emõn’ ñõn ro jeer im jãter?

¹ Ke emwij wujleplok ar mour ñõn Jeova, jej muri in “jerbale emõn ñõn armij otemjej, im elaplok ñõn ro rej ber ilo nukin tõmak.” (Gal. 6:10) Ñõn jerbale men in, jej aikwij lukkun jela kajen ro jeer im jãter. Kin an lõñ erro ko im ijjibed ko jej jelmaiki jen ran ñõn ran, jej aikwij lukkun kate kij ñõn ‘kalaplok’ ar yokwe ro rekãl bwe ren jab lemnok bwe jej kejekron ir.—2 Kor. 6:11.

2. Etke jen kar lemnok kin abañ ko rej walok ñõn ro rekãl?

² Jej aikwij lukkun lemnok kin abañ ko an ro jeer im jãter rekãl im rej jelmaiki. Jet rej jokwe iben ro rejjab tõmak im remaroñ iion kajirere im matõrtõr jen ir. Ro mõtair mokta remaroñ jumae ir. Kinke men kein rej walok ñõn rein rekãl, remaroñ ebwer im lemnok bwe rejool. Elañe jej lo bwe men kein rej walok ñõn ir, jemaroñ rejañ im kwalok ar yokwe im kaurõk ir.

3. Elikin ar kalomõnlokjen kin nan ko an Jisõs ilo Mark 10:29, 30, ta kajitõk ko jemaroñ kajitõk iber mõke?

³ Jisõs Kraist ear ba kin ro im rar erom dri kalor ro an: “Ejelok armij eo e ar likit im, ak jein im jãtin man im kõra rõn, ak jemen, ak jinen, ak ro nejin, ak ene ko enen, kin Ña im kin gospel, A e naj bõk jibuki kin juõn ilo ien in, mo ko, im jein im jãtin man im kõra rõn, im ro jinen, im ro nejin, im ene ko enen, kab matõrtõr ko; im ilo lõl e naj itok, mour in drio.” (Mark 10:29, 30) Kajuju iar jemaroñ kajitõk iber mõke: Ij kalaplok ke aõ yokwe ro jeiõ im jãtiõ, kab ro rekãl, bwe ren kile bwe rar bõk bar juõn jeir ak jãtir, jemeir ak jineir, ak nejir? Ij kadreloñtok ir ñõn mweo imõ ke einwõt aõ kõmõn ñõn ro nuku? Ekkar ñõn joñõn aõ maroñ, ij kile ke aikwij an ro rej aikwij bõk jibõñ ñõn aõ jibõñ ir?

4. Ewi wãwen jemaroñ anõk Anij im Kraist ilo ar kwalok yokwe mokta ñõn ro jet?

⁴ Alikar, ejamin kajju im walok wõt bwe ro jet ren watõk kij einwõt lukkun ro jeir im jãtir, jemeir im jineir, ak nejir. Jej aikwij lukkun kamole bwe jej einwõt rein ñõn ir. Jen jab aolep ien kõtmene bwe ren kõmõne juõn men. Jen ar kõtar dron, emõnlok bwe jen anõk Anij im Kraist im kwalok yokwe mokta ñõn ir. (1 Jon 4:19) Jen kate wõt im kamineneik kij ñõn “lelok” kij mõke, ien ko ar, kajur im mweiuk ko ar, im ilo wãwen in jenaj lo mõnõnõ eo elaplok jen bõk.—Luk 6:38; Jerb. 20:35.