Aikwij​—Elõñlok Katak kin Bible ko

¹ Jehovah Anij ej kajerammõn dolul eo an ilal kin elap laplok ko. Kajjojo yiõ, elõñ buki thousand armij rej baptais ibelakin lal​—enañin 1,000 ri kalor ro rekãl ilo kajjojo ran! Meñe iumin elõñ yiõ ko ro jeid im jatid rar aikwij kijenmij kin abañ ko ilo mõttan ko jet ilo lal in, jerbal eo kin Ailiñ eo ej jededlok wõt im rej lo laplok ko rekabwilõñlõñ. Elap an kairujruj ñan read kin wõnmanlok eo ej walok ñan kajededlok news eo emõn!

² Ilo district ko iumin ra eo ilo Guam ilo yiõ in jerbal eo lok, kij bareinwõt jaar lo laplok ko ilo joñan auxiliary pioneer ro, ilo awa ko jaar kajerbali ñan kwalok nan im kõmman bar jeblak ko, im ilo oran booklet ko, brochure ko, im magazine ko jaar liloki. Bareinwõt, kar wõr juõn laplok kin oran ro rar baptais. Ta kin jerbal in kõmman Bible study? Ear wõr juõn laplok bareinwõt kin oran Bible study ko kar kõmmani. Wãwen in kin jerbal in kwalok nan eaorõk ñan kõmman ri kalor ro. Ta eo kij kajjojo jemaroñ kõmmane ñan kõmman bwe oran Bible study ko ren laplok wõt?

³ Kakajurlok Kõnan eo ñan Kõmman juõn Bible Study: Kij make jej aikwij lemnakelok ad kajur ilo jitõb im owõn. Ri kalor ro remol an Christ rej “kijejeto ilo jerbal ko remõn.” (Taitõs 2:14) Ñe jej etale jerbal eo ad, jemaroñ ke ba bwe jej kijoror ñan bar jeblak ibben aolep ro rar bõk book ko? Jej kijejeto ke in tilmaake katak kin Bible ko ñan aolep ro rej kwalok air itoklimo? (Rom 12:11) Ak jej aikwij ke kaddeklok juõn kõnan elaplok ñan kõmman bar jeblak ko im ñan kajutak katak kin Bible ko?

⁴ Read Bible ibbõm make, keini bed ilo kwelok ko, im katak kin book ko renaj kõmman bwe jen emmourur ilo jitõb im jitõbõn Anij enaj kakajur kij. (Ep. 3:16-19) Men in enaj kakajurlok tõmak im liki eo ad ilo Jehovah im yokwe eo ad kin armij. Enaj kamakit kij ñan katakin mol eo ñan ro jet, im ilo wãwen in kõmman bwe jerbal in kwalok nan eo ad en kalimomo, wõr tõbrak, im kamakitkit. Aet, jej aikwij kõnan elõñlok Bible study ko!

⁵ Katak Ibben Family eo Mokta: Christian ro jemen im jinen me ewõr ro nejiir rej jokwe ilo mweo imwiir rej aikwij lemnak kin program eo air kin keini air katak Bible einwõt juõn family. (Dut. 31:12; Sam. 148:12, 13; Ken. 22:6) Enaj lap tokjen ñan an ro jemen im jinen katak Jen Kõmmõne brochure eo inem book eo Jelãlokjen ak Mour Indrio ibben ajiri ro nejiir ñan keboj ir bwe ren tellokin air ri kwalok ro rejañin baptais im ñan wujleplok air mour im baptais. Emol, remaroñ etale katak ko jet, ekkar ñan aikwij eo im dettan ajiri eo. Juõn jemen ak jinen eo ej katak ibben nejin eo ejañin baptais emaroñ bwine katak eo, awa eo, im bar jeblak ko, einwõt rej kõlajrake ilo Box in Kajitõk eo ilo November 2003 Ad Jerbal Ñan Ailiñ Eo.

⁶ Kakõmanmanlok Wãwen am Karõk: Ilo lemnak kin oran magazine ko, brochure ko, im book ko jaar liloki, ejelok bere bwe jaar kajededlok elõñ ine ko. Ine kein in mol eo ewõr maroñ eo ñan kwaloktok ri kalor ro rekãl. Ak juõn ri kallip enaj lukkun juburu ke elañe ej etal wõt in kallip im, elikin an kate e, ejjab bõk ien ñan madmõde? Jaab. Eindeinlok wõt, juõn jerbal in bar jeblak ej juõn men in aikwij.

⁷ Kwoj keini ke am karõk juõn ien ñan kõmman bar jeblak ko? Bar jeblak ilo mõkaj ibben aolep ro rar kwalok air itoklimo. Kõmman bar jeblak ko kin mejenkajjik eo ñan kajutak juõn katak kin Bible. Kwoj kejbãrok ke juõn record ekwon im kãl kin bar jeblak ko am? Ijellokin etan im address eo an ri mweo, jab meloklok in je ran eo kwar lolok e, jabdewõt book ko kwar door ibben, juõn kamelele ekadu kin ta eo kom ar bwebwenato kake, im juõn point me kwomaroñ etale ilo ien eo tok juõn. Kõmman jidik jikin ilo record eo am ñan je kamelele ko jet kwomaroñ kobaiki elikin kajjojo ien kwoj bar jeblak.

⁸ Etale Wãwen eo Kwomaroñ Kõmman Juõn Bar Jeblak: Ta jet ian point ko kwoj aikwij lemnak kaki ñe kwoj kõmman juõn bar jeblak ibben juõn armij eo ej kwalok an itoklimo? (1) Kwon okmãnãn, joij, kijejeto, im jab kijñeñe. (2) Bwebwenato kin katak ko ak kajitõk ko ej itoklimo kaki. (3) Kõmman bwe bwebwenato eo en lamwan im bedbed ion Bible eo. (4) Ilo kajjojo ien kwoj lolok e, kate yuk bwe kwon katakin ri mweo kin juõn point me ej kile bwe ewõr tokjen ñan e. (5) Kaitoklimoen kin katak eo komnaj bwebwenato kake ilo ien lotok in tok. (6) En jab to am bed. (7) Jab bõkmantak kajitõk ko me renaj kajook ri mweo. (8) Kajerbal lolokjen bwe kwon jab kananaik lemnak ko rebwid ak manit ko renana an ri mweo mokta jen ear maroñ kaddek juõn kamolol kin men ko lor jitõb.​—Lale peij eo iloa an May 1997 Ad Jerbal Ñõn Ailiñ Eo kin jibañ ko jet kin ewi wãwen kwomaroñ lo tõbrak ilo kõmman bar jeblak ko im ñan kajutak katak kin Bible ko.

⁹ Etale Aolep Wãwen ko Remõn: Ilo juõn congregation, rar maroñ bõk etan im address ko an aolep armij ro rar jokwe ilo juõn apartment me ebin air deloñ ie. Rar je juõn letter ñan kajjojo armij, im kadeloñ ruo tract ko. Ilo tu-jemlokin letter eo, rar tilmaake juõn katak kin Bible im kobaik juõn number in telephone ilo bukwon eo bwe armij eo en maroñ uak. Iloan jejjo wõt ran ko, juõn likao ear kir im kajitõk kin juõn katak kin Bible. Ilo ran eo tok juõn rar kõmman juõn bar jeblak, im rar kajutak juõn Bible study ilo book in Jelãlokjen. Ilo boñin ejja ran eo wõt ear bed ilo congregation Book Study eo, im ear wõnmanlok im bed ilo aolep kwelok ko. Ilo mõkaj, ear jino an keini an read Bible im kõmman wõnmanlok ñan an baptais.

¹⁰ Ri kwalok ro ilo juõn kumi rar karõk ñan kõmman bar jeblak ko ibben don. Ke juõn ian sister ro ear kõmman bar jeblak eo an, armij eo ear bukõte ear jako, ak bar juõn jiroñ ear uake kejam eo ke ear kallallal, im ba: “I ar kõttar wõt yuk.” Ilo juõn ien lok iman ri mweo ear bõk book eo Jelãlokjen jen juõn mõttan. Ilo ien eo sister ro rar kir, emwij an kar readi book eo ruo alen im ear bwilõñ kake. Ear ba bwe ear jab bwilõñ ke ear lo Ri Kennan ro ilo ran eo kinke ear jar bwe ren kar itok im katak Bible eo ibben. Rar katak Bible ibben, ear jino bed ilo kwelok ko an congregation, im ear kõmman wõnmanlok ko ilo mõkaj.

¹¹ Juõn sister, eo ear baptais enañin 25 yiõ ko, ear lelok book eo Jelãlokjen ñan jinen. Jinen, eo ej juõn ian ro uan juõn kabuñ, ear jino readi book eo. Elikin an kajemlok an read ruo katak ko, ear kir kõrã eo nejin im kabwilõñ e ke ear ba: “I kõnan erom juõn ian Ri Kennan ro an Jehovah!” Jinen ear jino katak im emwij kiõ an baptais.

¹² Kajeoñ in Kajerbal Nan in Rejañ Kein: Kwonañin ke kajerbal direct approach eo (kajju im kajitõk) ñan jino Bible study ko? Kwomaroñ ba ilo lamwan: “Elañe kwo kõnan katak Bible ilo ejelok wõnãn, iumin jet wõt minute ko I maroñ kwalok ñan kwe kin ewi wãwen kimij kõmmane. Elañe kwoj mõnõnõ, kwomaroñ wõnmanlok.” Elõñ armij rejjab makoko in bõk nan in jiroñ rot kein, im rej mõnõnõ in lale wãwen kõmman juõn katak kin Bible.

¹³ Jen jinoin, kwalok ñan ri katak eo kin ewi wãwen emaroñ keboj lok iman kin katak eo ilo an lale eon ko rejjab elij kadede nan ko im ñan kakõlleik jejjo wõt nan ko ñan uake kajitõk ko. Lemnakelok wõt point ko relap. Meñe jej aikwij jelã ukoktak ilo jet wõt katak ko ilo jinoin, ej juõn men eaorõk bwe en keini air katak Bible. Lemnak kin ewi wãwen kwonaj bõkmantak kin jar einwõt juõn mõttan eaorõk ilo katak eo im ewi wãwen kwonaj kajerbal Jeje ko ñan keboj ri katak eo ñan jelmae jumae. Ilo wãwen otemjej, kõmman bwe ien katak eo en kamõnõnõ!

¹⁴ Emol, ejjab aolep ri katak ro enaj joñan wõt juõn air wõnmanlok. Jet rejjab lukkun itoklimo ilo men ko lor jitõb einwõt ro jet ak ejjab mõkaj air melele men ko rej katakin ir kake. Ro jet reboub im emaroñ jab bwe ien ñan kadedelok aolepen juõn katak ilo kajjojo week. Kin men in, jet ien emaroñ juõn men in aikwij ñan bõk elõñlok jen juõn ien katak ñan etale jet katak ko im elõñlok alliñ ko ñan kadedelok air katak aolepen book eo. Jet ien jemaroñ katak Jen Kõmmõne brochure eo mokta inem wõnmanlok ñan book eo Jelãlokjen ak Mour Indrio. Men in, ijellokin air bed ilo kwelok ko an congregation eo, naj jibañ kajjojo ri katak ñan ejaake juõn bedbed ebin ilo mol eo.

¹⁵ Ilõñin men otemjej, jar kin juõn Bible study! (1 Jon 3:22) Juõn ian jerammõn ko relaptata an juõn Ri Christian ej ñan an Jehovah kajerbal e ñan jibañ juõn armij ñan erom juõn ri kaloran Jesus Christ. (Jerbal 20:35; 1 Kor. 3:6-9; 1 Tess. 2:8) Kiõ ej ien ñan kwalok elap kijejeto ilo jerbal in katak Bible, im lukkun liki ilo kajerammõn eo an Jehovah kin jibadbad ko ad ñan jino elõñlok Bible study ko!

[Naan ko ilo peij 3]

Kwoj jar ke ñan jino juõn Bible study ekãl?