Jodrikdrik Ro—Kom̦win Kapen Tõmak eo Ami
1. Etke jodrikdrik ro rej aikuj kõm̦m̦an bwe en pen tõmak eo aer?
1 Ta eo el̦ap am̦ l̦õmn̦ak kake? El̦ap ke am̦ l̦õmn̦ak kõn men ko kiiõ? Ak el̦ap ke am̦ l̦õmn̦ak kõn kallim̦ur ko an Anij me rej pãd im̦aan? (Matu 6:24, 31-33; Luk 8:14) Joñak ko an Ebream im Moses rej katakin kõj bwe ej aikuj pen tõmak eo ad bwe jen pokake Anij im lõke kallim̦ur ko an. (Hi. 11:8-10, 24-26) Ewi wãween kwõmaroñ kõm̦m̦an bwe en pen tõmak eo am̦ kiiõ im ilo raan ko im̦aan?—1 Ti. 6:19.
2. Ta eo jej katak jãn joñak eo an Kiiñ Josaia?
2 Make Katak kõn Jeova: Ekanooj em̦m̦an ñe kwõj keini am̦ katak, kweilo̦k im kwal̦o̦k naan ippãn jinõm̦ ak jemam̦. Bõtab, jab l̦õmn̦ak bwe men kein wõt renaaj kapen tõmak eo am̦. Bwe kwõn “lukkun jelã kin Anij” kwõj aikuj make katak kõn e. (JK. 2:3-5, UBS; 1 Kr. 28:9) Kiiñ Josaia ear kõm̦m̦ane men in ke ear jodrikdrik wõt. Meñe ear dik im rũttol̦o̦k ippãn ro me rar jab epaake Jeova, ak ‘ear make kappukot Anij an Devid jemen’ ke ear 15 iiõ dettan.—2 Kr. 34:3.
3. Ewi wãween jodrikdrik ro rainin remaroñ kappukot Jeova?
3 Ak ta kõn kwe? Ewi wãween kwõmaroñ kappukot Jeova? Eokwe, kwõn lukkuun etali katak ko me kwõj tõmaki, im kam̦oole ñan kwe make bwe katak kein rem̦ool jãn Baibõl̦ eo. (Rom 12:2) Ñan waanjoñak, kwõmaroñ ke kõmel̦el̦e kõn ta eo Baibõl̦ ej ba kõn bõtõktõk? Ak, kwõmaroñ ke kam̦ool jãn Baibõl̦ eo bwe Aelõñ eo an Anij ear jutak ilo 1914? El̦aññe kokõn̦aan bwe en pen tõmak eo am̦ kiiõ im ilo raan ko im̦aan, kwõj aikuj katak im “jel̦ã m̦ool” eo.—1 Ti. 2:3, 4.
4. Ewi wãween ri kwal̦o̦k naan ro me rejañin peptaij remaroñ kalikkar bwe rej kepaake Jeova?
4 Ke Josaia ear katak kõn Jeova ear lo el̦ap tõprak. M̦okta jãn an kar 20 iiõ dettan, ear peran im karreoik aolepen ãne eo jãn ekjab ko im kabuñ ko reriab. (2 Kr. 34:3-7) Ilo ejja wãween in, enaaj alikkar bwe kwõj kepaake Jeova ikijjeen kõm̦m̦an ko am̦. (1 Ti. 4:15) El̦aññe kwõj juon iaan ri kwal̦o̦k naan ro im ejañin peptaij, kwõn kate eok ñan kakõm̦anm̦anl̦o̦k kilen am̦ kwal̦o̦k naan. Jab baj leto-letak wõt bok ko. Ak kwõn kate eok ñan kõjerbale Baibõl̦ eo, jel̦ã kilen kõmel̦el̦e im bar jepl̦aak im kaitoklimoik ro me kwaar kõnnaan ippãer. (Rom 12:7, UBS) Ñe kwõj kõm̦m̦ani men kein, enaaj kakajoorl̦o̦k jem̦jerã eo am̦ ippãn Jeova. Bareinwõt enaaj jipañ eok ñan kapen tõmak eo am̦ kiiõ im ilo raan ko im̦aan.