Katak Innem Kwal̦o̦k Kake ñan Ro Jet

Elukkuun em̦m̦an ad mour ñe jej katak Baibõl̦ ippãd make. Bõtab emaroñ nãj em̦m̦anl̦o̦k ad mour ñe jej kwal̦o̦k ñan ro jet boin ko rekõketak jaar loi ilo ad kar katak ippãd make. Jabõn Kõnnaan 11:25 ej ba: “Eo ej utdikdik ro jet, renaaj utdikdik e.”

Ñe jej kõnono kõn boin ko rem̦m̦an jaar loi ippãn ro jet, enaaj pidodol̦o̦k ad keememeji im jenaaj maroñ kam̦wilal̦l̦o̦k ad mel̦el̦e kaki. Im kõnke ro jet remaroñ bõk tokjãn jãn boin kein rem̦m̦an, el̦ap ad m̦õn̦õn̦õ ñe jej kwal̦o̦ki ñan er.—Jrb. 20:35.

Kajjioñ kõm̦m̦ane men in: Wiik in tok, pukot juon iien epel̦l̦o̦k kwõmaroñ kwal̦o̦k ñan juon armej kõn men ko kwaar katak kaki. Kwõmaroñ kõnono ippãn juon iaan ro uwaan baam̦le eo am̦, ilo eklejia eo am̦, juon eo kwõj jerbal ippãn, jikuul̦ ippãn, jokwe iturin, ak juon eo kwõj iioone ilo jerbalin kwal̦o̦k naan. Kajjioñ kwal̦o̦k men ko kwaar katak kaki ilo naan ko am̦ make im ilo juon wãween epidodo im ealikkar.

Keememej: Kwal̦o̦k ñan ro jet men ko kwaar katak kaki ñan kõkajoor er, im en jab ñan kabbwil ak bõk naanin nõbar jãn er.—1 Kor. 8:1.