3 Juon Iien Aolep Men Renaaj Em̦m̦anl̦o̦k

Baibõl̦ ej make ba bwe raan in mour ko ad “robrak kõn inepata.” (Job 14:1, UBS) Aolep armej rej iioon apañ ilo mour ko aer. Bõtab, jet armej relukkuun eñtaan kõn apañ ko rej iiooni im rej bõk l̦õmn̦ak in bwe eban em̦m̦anl̦o̦k aolep men. Eñin ke l̦õmn̦ak eo am̦? El̦aññe aet, eokwe kwõj aikuj keememej bwe Baibõl̦ ej ba bwe enaaj em̦m̦anl̦o̦k aolep men. Kwõmaroñ tõmak kallim̦ur ko Baibõl̦ ej kwal̦o̦k kaki. Kallim̦ur kein reban baj wal̦o̦k wõt ñan kwe, ak renaaj wal̦o̦k ñan aolep armej. Ñan waanjoñak:

• Baibõl̦ ej kwal̦o̦k bwe jãn kar jinoin, Jeova Anij ear kõn̦aan bwe jen m̦õn̦õn̦õ.​—Jenesis 1:28.

• Jeova Anij ej kallim̦ur bwe enaaj kõm̦m̦an bwe lal̦ in en oktak im juon pedetaij.​—Aiseia 65:21-25.

• Enaaj jejjet kitien kallim̦ur in. Bokin Revelesõn 21:3, 4 ej ba:

  “Im̦õn Anij ej ippãn armej ran̦, im Enaaj jokwe ippãer, im renaaj armej ro Doon, im Anij enaaj pãd ippãer, im Enaaj aer Anij. Im Enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan; bwe men ko m̦okta rejako.”

Kallim̦ur kein rejjab riabin kallim̦ur. Em̦õj an Jeova Anij kallim̦ur bwe enaaj kajejjeti, im renaaj baj jejjet wõt kõnke ewõr maroñ ippãn im ekõn̦aan bwe ren wal̦o̦k. Elukkuun m̦ool kallim̦ur kein an Anij ilo Baibõl̦, im rej jipañ kõj ñan kile bwe ewõr unin ad mour.

KEEMEMEJ MEN IN: Meñe elõñ iien emaroñ okkõtaktak eñjake ko am̦ ãinwõt juon tim̦a eo ej ellãle kõn an lim̦aajn̦on̦o lo̦jet, ak men ko Baibõl̦ ej ba rej ãinwõt juon añkõ eo me ej dãpij eok bwe kwõn jab pel̦o̦k.

MEN EO KWÕMAROÑ KÕM̦M̦ANE KIIÕ: Jino etale men ko Baibõl̦ ej ba bwe renaaj wal̦o̦k ilo raan ko repãd im̦aan. Ri Kõnnaan ro an Jeova renaaj m̦õn̦õn̦õ in jipañ eok. Ñe ewõr Ri Kõnnaan ro an Jeova ilo bukwõn eo am̦ ak jikin eo kwõj jokwe ie, kwõmaroñ kepaak er im bõk mel̦el̦e. Ñe eaab, kwõmaroñ pukot mel̦el̦e ko rel̦l̦apl̦o̦k ilo Weep jait eo aer etan jw.org/mh.a—Lale kõmel̦el̦e eo itulal̦.