Juõn Likao Emõn, im Juõn Eo Enana

LALE Kein im Ebel kiõ. Emwij air ridtolok. Kein e ar ridtolok im erõm juõn dri kallip. Ej kõmõn wit im leen wijki ko im men in edrek ko.

Ebel e ar ridtolok im erõm juõn dri lale sip. E kõnan kakajiriri kon in lam ko. Rej ridtolok im erõm sip ko re klip, im e mõkaj an orlok im lõñ sip bwe Ebel en lali.

Juõn ran Kein im Ebel r’ar bõklok juõn men in lelok ñõn Anij. Kein e ar bõklok jet ekõn ko r’ar edrek. Im Ebel e ar bõklok sip eo ej mõke wõt emõn nejin. E ar buñburuen Jeova kin Ebel im men in lelok eo an. Ak e ar jab mõnõnõ kin Kein im men in lelok eo an. Kwo jela ke ta unin?

Ejjab kinke men in lelok eo an Ebel emõnlok jen eo an Kein wõt. Ej kinke Ebel ej juõn likao emõn. Ej yokwe Jeova im leo jein. Bõtap Kein e nana; ejjab yokwe leo jatin.

Inem Anij ej jiroñ Kein bwe en ukõt ial ko an im oktak. Ak Kein ejjab roñjake. Ej lukkun illu kinke elaplok an Anij mõnõnõ kake Ebel. Inem Kein ej ba ñõn Ebel, ‘Itok, kijro ilok ñõn melan eo.’ Ijo, ke r’ar mõke lok iair, Kein e ar mõn jatin, Ebel. Joñan an lap an mõne, e mij Ebel. Ejjab e ar juõn men e lukkun nana ke bwe Kein en kõmõne?

Meñe Ebel e ar mij, Anij ej kememij wõt e. Ebel e ar emõn, im Jeova ejamin meloklok juõn armij einwõt in. Inem juõn ran Jeova Anij enaj bar kemour Ebel. Enaj maroñ mour ijin ion lõl ñõn in drio. Ejjab enaj juõn men emõn ke bwe jen jela kajien armij ro einwõt Ebel?

Ak Anij ejjab buñburuen kin armij ro einwõt Kein. Inem elikin an kar Kein mõn jatin, Anij e ar kajeik e im jilkinlok e ñõn juõn jikin etolok bwe en mour im etolok jen famili eo an. Ke Kein e ar ilok ñõn bar juõn mõttõn in lõl bwe en jokwe, e ar bõk juõn ian limaro jatin iben, im e ar erõm lio belen.

Tokelik, Kein im lio belen r’ar jino neje. Lõmaro im limaro jet nejin Adam im Iv r’ar mare bareinwõt, im r’ar neje. E ar jab to tokelik im e ar lõñ armij ro ion lõl. Jen katak kin jet iair.