Noa Ej Jek Juõn Wa

KAR wor juõn kõra belen Noa im jilu nejin eman. Etan lõmaro jilu nejin kar Shem, Ham im Jepet. Im kar wor limaro belen lõmarein jilu. Inem e ar wor drualitõk armij ro ilo famili eo an Noa.

Kiõ Anij e ar jiroñ Noa bwe en kõmõn juõn men in kabwilõñlõñ. E ar jiroñ e bwe en jek juõn wa e klip. Wa in e ar lap einwõt juõn tima, ak ein kar jekjek in wõt juõn dipdip elap im aitok. ‘Kwon kõmõne jilu dek utiejen,’ Anij e ar ba, ‘im kõmõn rum ko iloan.’ Rum ko kar ñõn Noa im famili eo an, men in mour ko, im ekõn ko me aolepeir renaj aikwij bwe en kijiir.

Anij e ar bareinwõt jiroñ Noa bwe en unoik wa eo bwe en jettal. Anij e ar ba: ‘I naj jilkinwõj juõn ibij liplip in dren im kokkure aolepen lõl. Ro otemjej rejjab ber iloan wa eo renaj mij.’

Noa im lõmaro nejin r’ar bokake Jeova im jino jek wa eo. Ak armij ro jet r’ar baj ettõñ wõt. R’ar wonmanlok wõt ilo air nana. Ejelok juõn e ar tõmak Noa ke e ar jiroñ ir kin men eo Anij enaj kõmõne.

Kar aikwij juõn ien e aitok ñõn kadrerelok wa eo joñan an klip. Inem, elikin elõñ yiõ, e ar drerelok. Kiõ Anij e ar jiroñ Noa bwe en kadreloñ men in mour ko na loan wa eo. Anij e ar ba bwe en kadreloñ ruo uan jet kain men in mour ko, juõn kooman im juõn kookõra. Ak ikijen men in mour ko jet, Anij e ar jiroñ Noa bwe en kadreloñ jiljilimjuõn. Anij e ar bareinwõt jiroñ Noa bwe en kadreloñ aolep bao kaju wãweir. Noa e ar kõmõn einwõt Anij e ar ba.

Tokelik, Noa im famili eo an r’ar dreloñ ilo wa eo. Inem Anij e ar kil kejam eo. Iloan wa eo. Noa im famili eo an r’ar kõttar. Baj kemnõk elañe kw’ar ber iloan wa eo ibeir im kõttar. En lukkun walok ke juõn ibij liplip einwõt Anij e ar ba?