Ebream—Juõn Eo Jeran Anij

JUÕN ian jikin ko me armij r’ar ilok im jokwe ie elikin Ibij Liplip eo kar eneo etan Õr. Jikin in e ar erõm juõn jikin kwelok elap tokjen koba iben jet imõn jokwe ko remõn ie. Bõtap armij ro ijin r’ar kabuñ ñõn anij wan. Kar wãwen drein air kõmõn ilo Be’bel bareinwõt. Armij ro ilo Õr im Be’bel r’ar jab einwõt Noa im leo nejin, Shem, ro im r’ar kejbarok wõt air kabuñ ñõn Jeova.

Inem, 350 yiõ ko elikin ibij liplip eo, dri tõmak eo Noa e ar mij. Kar ruo wõt yiõ elikin ien in me lein kwoj lo ilo pija in e ar lotak. E ar juõn armij e jenolok ñõn Anij. Ãt eo etan kar Ebream. E ar jokwe iben famili eo an ilo jikin kwelok in Õr.

Juõn ran Jeova e ar jiroñ Ebream: “Kwon ilok jen Õr im ro nukõm, im etal ñõn juõn ailiñ I naj kwalok ñõn yuk.” Ebream e ar bokake ke Anij im likit aolep menko remõn ilo Õr? Aet, e ar. Im kinke Ebream e ar bokake Anij aolep ien, e ar erõm einwõt juõn eo jeran Anij.

Jet ian famili eo an Ebream r’ar ilok iben lok ke e ar etal jen Õr. Leo jemen, etan Ti’ra, e ar ilok iben. Bareinwõt leo mañren, etan Lot. Im bareinwõt lio iben, etan Sera, e ar ilok iben. Elikin jet ien r’ar tõbar juõn jikin etan He’ran, ijo im Ti’ra e ar mij ie. R’ar etolok jen Õr.

Elikin jirik ien Ebream im famili eo an r’ar ilok jen He’ran im itok ñõn juõn ene etan Ke’nean. Ijin Jeova e ar ba: “Eñin eneo I naj lelok ñõn ro nejõm.” Ebream e ar berwõt ilo Ke’nean im jokwe ilo im nuknuk.

Anij e ar jino jibañ Ebream im kin men in e ar lap an lõñ an bwij in sip im men in mour ko jet im buki ro dri kõrijeran. Bõtap e im Sera e ar ejelok nejiiro mõke.

Ke Ebream e ar 99 yiõ ridtan, Jeova e ar ba: “Ij kalimur bwe kwo naj erõm jemen elõñ ailiñ in armij ro.” Ak ekijkan an maroñ eindrein, ke Ebream im Sera elap airro ridto bwe en wor nejiir kiõ?