Aisak E Bõk Juõn Belen Emõn

KWO jela ke wõn kõra eo ilo pija in? Etan in Re-bek’a. Im leo ej iten iion e ej Aisak. E naj erõm lio belen. Ak ekijkan an kar eindrein?

Eokwe, jemen Aisak, Ebream, e ar kõnan bõk ñõn leo nejin juõn belen emõn. E ar jab kõnan bwe Aisak en belek juõn ian limaro in Ke’nean, kinke armij rein r’ar kabuň ñõn anij wan. Kin men in Ebream e ar kir leo korijeran im ba: ‘I kõnan bwe kwon jeblak ñõn ijo ro nukiõ rej jokwe ie ilo He’ran im bõk juõn belen leo nejiõ Aisak.’

Leo korijeran Ebream e ar mõkaj im bõk joñoul kiru kamel im ilok ilo ial eo an e aitok. Ke e ar ebake lok jikin eo me ro nukin Ebream r’ar jokwe ie, e ar bwijrak iturin juõn aibij lõl. E ar jota, ien eo me limaro in jikin kwelok eo rej iten itõk jen aibij lõl eo. Inem leo korijeran Ebream e ar jar ñõn Jeova im ba: ‘Kõra eo me enaj letok limõ aibij kap kamel ko, en e eo kwoj kãlete bwe en belen Aisak.’

Ejjab etto Re-bek’a e ar iten itõk dren. Ke dri korijer eo e ar kajitõk limin aibij iben, e ar kairak e. Inem e ar ilok im kabwe dren ñõn aolep kamel ko re maro. Men in e ar juõn jerbal erro kinke elap an kiru kamel kõnan irak dren.

Ke e ar mwij an Re-bek’a kõmõn men in, leo korijeran Ebream e ar kajitõk etan jemen. E ar bareinwõt kajitõk elañe e maroñ kiki boñin eo i mweo imwiir. Lio e ar ba: ‘Etan jema in Be-tu’el, im eor jikin am ber ibõm.’ Leo korijeran Ebream e ar jela bwe Be-tu’el ej nejin leo jatin Ebream, Ne’or. Inem e ar bukwelõlõ im kamolol Jeova bwe e ar tel e ñõn ro nukin Ebream.

Boñin eo leo korijeran Ebream e ar jiroñ Be-tu’el im leo jein Re-bek’a, Le’ban, unin an kar itok. Irro jimor ar erra bwe Re-bek’a en etal iben im belek Aisak. Ta eo Re-bek’a e ar ba ke r’ar kajitõk iben? E ar ba, ‘Aet,’ e kõnan etal. Inem ran eo wõt juõn r’ar uwe ion kamel ko im jino jeblak ilo ial eo e aitok ñõn Ke-nean.

Ke r’ar itaklok, e ar ejotalok. Re-bek’a e ar lo juõn eman ej etetal ilo melaj eo. Ej Aisak eo. E ar mõnõnõ in lo Re-bek’a. Jinen, Sera e ar mij jilu yiõ lok iman, im e ar buromõj wõt kin men in. Bõtap kiõ Aisak e ar lukkun lap an yokwe Re-bek’a, im e ar bar mõnõnõ.