Moses Im Aron Rej Iion Pero

KE MOSES e ar jeblak ñõn Ijipt, e ar kennanek Aron, leo jatin, kin aolep men in kabwilõñlõñ ko. Im ke Moses im Aron r’ar kwalok men in kabwilõñlõñ kein ñõn ro dri Israel, aolep armij ro r’ar tõmak bwe Jeova ej ber ibeir.

Inem Moses im Aron r’ar ilen iion Per’o. R’ar ba ñõn e: ‘Jeova, Anij an Israel ej ba, “Kwon kotlok armij ro aõ bwe ren ilok ñõn ene jemaren iomin jilu ran im kabuñ ñõn iõ.”’ Ak Per’o e ar uak: ‘I jab tõmak ilo Jeova. Im I jamin kotlok dri Israel ro bwe ren ilok.’

Per’o e ar illu, kinke armij ro r’ar kõnan kakije jen air jerbal bwe ren kabuñ ñõn Jeova. Kin men in e ar kalaplok air jerbal. Ro dri Israel r’ar na ruen Moses kin joñan nana eo e ar walok ñõn ir, im Moses e ar buromõj. Ak Jeova e ar jiroñ e bwe en jab inebata. ‘I naj kõmõn bwe Per’o en kotlok armij ro aõ,’ Jeova e ar ba.

Moses im Aron r’ar ilen bar iion Per’o. Ien in r’ar kõmõn juõn men in kabwilõñlõñ. Aron e ar jolõllok jokwon eo an, im e ar erõm juõn serpent elap. Ak dri meletlet ro an Per’o r’ar bareinwõt jolõllok alal ko, im serpent ko r’ar walok. Ak, lale mõk! Serpent eo an Aron ej kõñi serpent ko an dri meletlet ro. Ak jekron, Per’o e ar makoko in kotlok ro dri Israel bwe ren ilok.

Inem e ar jejjit ien eo bwe Jeova en katakin Per’o juõn men. Kwo jela ke ewi wãwen e ar kõmõn men in? Kar ikijen an bõktok 10 men in kaiñtan ko, ak jorran ko relap, ion Ijipt.

Elikin an walok elõñ ian men in kaiñtan ko, Per’o e ar kir Moses, im ba: ‘Kwon kabwijrak men in kaiñtan kein, im I naj kotlok ro dri Israel bwe ren ilok.’ Ak ke e ar bwijrak men in kaiñtan ko, e ar oktak an Per’o lemnõk. E ar makoko wõt in kotlok armij ro bwe ren ilok. Ak eliktata, elikin men in kaiñtan eo ken ka 10, Per’o e ar jilkinlok ro dri Israel.

Kwo jela ke kajojo ian men in kaiñtan ko 10? Ukõt tok peij in im jen katak kaki.