Juõn Imõn Kaber In Kabuñ

KWO jela ke imõn ta in? Ej juõn imõn kaber einjuõn, ñõn kabun ñõn Jeova. Bareinwõt naetan jikin kwojarjar. Armij ro r’ar drerelok air kalek e juõn yiõ elikin air kar ilok jen Ijipt. Kwo jela ke an wõn lemnõk eo ñõn kalek mwin?

Kar an Jeova lemnõk eo. Ke Moses e ar ber ion tol Sai’nai, Jeova e ar jiroñ e wãwen kalek e. E ar ba ren kõmõne bwe en maroñ biruru air jelate. Ilo wãwen in re maroñ in bõk mõttõn ko ñõn bar juõn jikin, im bar kõlaki na ie. Inem ke ro dri Israel r’ar emõkit jen jikin ñõn jikin ilo ene jemaren eo, r’ar bõk imõn kaber eo ibeir lok.

Elañe kwoj reilok iloan rum eo erik i jabõn imõn kaber eo, kwo maroñ lo juõn box ak dipdip. Men in kar naetan dipdip in kalimur eo. E ar wor ruo enjel ak kerub ko kõmõn jen gold, juõn ion kajojo jabõn ko. Anij e ar bar jeje kien ko joñoul ion ruo tebel dreka, kinke Moses e ar rupi ko mokta. Im r’ar likit dreka kein iloan dipdip in kalimur eo. Bareinwõt r’ar dror juõn nien manna iloan. Kwoj kememij ke ta in manna?

Leo jein Moses, Aron, ej e eo me Jeova e ar kãlet bwe en pris eo e utiej. Ej tel armij ro ilo air kabuñ ñõn Jeova. Im ro nejin man rej pris ro bareinwõt.

Kiõ lale rum eo elaplok ilo imõn kaber eo. Elaplok rum in ruo alen jen rum eo erik. Kwoj lo ke box eo, ak dipdip eo erik, im jirik baat ej wonliñlok jen e? Eñin lokatok eo me pris ro rej tile juõn men e melu, naetan ijur. Inem ewor juõn jikin lamp im ewor jiljilimjuõn lamp ko ie. Im men eo ken ka jilu ilo rum eo ej juõn tebel. R’ar likit 12 mõttõn bred ion tebel in.

Ilo melan imõn kaber eo eor juõn jabi elap, ak besin, eo emwij teiñi kin dren. Pris ro rej kajerbale ñõn air amwin. Ewor bareinwõt lokatok eo elap. Ijin rej tile men in mour ko re mij einwõt men in katok ñõn Jeova. Imõn kaber eo ej ber iolapin kamp eo, im ro dri Israel rej jokwe ilo mokko imwiir i belakin.