Jon Ej Baptaisi Jisõs

LALE mõk muli eo ej wonlõllok ion bõran leo. Leo ej Jisõs. Ej tarrin 30 yiõ ridtan kiõ. Im leo ej jutak iturin ej Jon. J’ar katak karere juõn men kin Jon. Kwoj kememij ke ien eo Meri e ar ilok in lolok Elisabet, lio jein, im niñniñ eo ilo lojien Elisabet ej makõtkit kin loñliñ? Niñniñ in e jañin lotak kar Jon. Ak ta eo Jon im Jisõs rej wõjõke kiõ?

Ej kap mwij an Jon katulok Jisõs iloan dren eo ilo River Jordan. Eñin wãwen an juõn armij baptais. Mokta, ej jokolok iomin dren, inem ej bar walok liñtak. Kinke eñin men eo Jon ej kõmõn non armij ro, rej naetan Jon Dri Baptais. Ak etke Jon e ar baptaisi Jisõs?

Eokwe, Jon e ar kõmõn men in kinke Jisõs e ar itok im kajitõk iben Jon bwe en baptais e. Jon ej baptaisi armij ro me re kõnan kwalok air buromõj kin menko re nana im r’ar kõmõni. Ak Jisõs enañin kar kõmõn ke jabrewõt men eo men in kaburomõj e? Jaab, Jisõs e ar jab, kinke ej Nejin Anij mõke jen lõñ. Inem e ar kajitõk bwe Jon en baptaise e kin bar juõn un. Jen lale ewi kar un eo.

Mokta jen an kar Jisõs itok ñõn ijin iben Jon, e ar jerbal in kamtõ. Kamtõ ej juõn eo ej kõmõni menko jen alal, einwõt tebel im jea im jea aitok. Josep, leo belen Meri kar juõn kamtõ, im e ar katakin Jisõs bwe en juõn kamtõ bareinwõt. Ak Jeova e ar jab jilkintok Nejin ñõn lõl bwe en juõn kamtõ. E bar wor juõn jerbal ñõn an kõmõne, im e mottok ien eo bwe Jisõs en jino kõmõne. Inem bwe en kwalok bwe e mottok in kõmõne ankil an Jemen, Jisõs ej kajitõk iben Jon bwe en baptais e. E mõnõnõ ke Anij kin men in?

Aet, e mõnõnõ, bwe elikin an Jisõs ato jen loan dren eo, juõn ainiken jen lõñ ej ba: ‘E in Nejiõ, eo Ij mõnõnõ kake.’ Bareinwõt lõñ ko re mejallok im muli in ej wonlõllok ion Jisõs. Ak ejjab juõn lukkun muli. Ej einwõt juõn muli. Ilo mol ej jitõb kwojarjar eo an Anij.

Kiõ elõñ menko Jisõs ej aikwij lemnõk kaki, im kin men in ej ilok ñõn juõn jikin etolok im ber ie iomin 40 ran. Ijin Setan ej itok iben. Jilu alen ej kajeoñ kabo Jisõs bwe en jerbal nae kien ko an Anij. Ak Jisõs e makoko in kõmõne.

Elikin ien in, Jisõs e ar jeblak im iion jet eman ro r’ar erõm ro dri kaloran moktata, ak ro rej lor e. Etan jet iair ej Andru, Piter (eo rej bareinwõt naetan Saimõn), Pilip im Na-tan’a-el (eo rej bareinwõt naetan Bar-tol’o-mu). Jisõs im dri kalor rein rekal rej ilok ñõn bukwon eo etan Gal’i-li. Ilo Gal’i-li rej bwijrak ilo jikin kwelok eo an Na-tan’a-el, etan Ke’na. Ijin Jisõs ej ilok ñõn juõn kwojkwoj in belele elap, im ej kõmõn men in kabwilõñlõñ eo an moktata. Kwo jela ke ta eo? Ej ukõt dren ñõn wain.