Jisõs Ej Najirik Elõñ Armij

JUÕN men e nana ej kap mwij an walok. R’ar mõn Jon dri Baptais. He-ro’di-as, lio belen kiñ eo, e ar drike e. Im e ar maroñ kõmõn bwe kiñ eo en jiroñ ir bwe ren jõbbare Jon.

Ke Jisõs ej roñ kin men in, e kanuij buromõj. Ej ilok ñõn juõn jikin im mõke lok ian. Ak armij ro rej lor e. Ke Jisõs ej lo jar ko, ej buromõj kake ir. Kin men in ej konono ibeir kin ailiñ in Anij, im ej kemour ro air dri nañinmij.

Jotin in ran eo, ro dri kaloran rej itok ñõn iben im ba: ‘E motlok auõ eo, im etolok jikin in. Kwon jilkinlok armij ro bwe ren ilem wia tok men in ar mõña ilo jikin kwelok ko.’

‘Rejjab aikwij ilok,’ Jisõs ej uak. ‘Komin lelok kijiir.’ Jisõs ej oktak ñõn Pilip im kajitok: ‘Ia eo je maroñ wia mõña ko me re naj bwe ñõn aolepen armij rein?’

‘E naj lukkun lap wõnan ar wia kijen aolep bwe ren mõña.’ Pilip ej uak. Andru ej konono im ba: ‘Ladrik in, eo ej dri inek menko kijer, eor lailim bred im ruo iik iben. Ak re jamin bwe ñõn aolepen armij rein.’

‘Komin jiroñ armij ro bwe ren jijõt ion ujoij ilo melaj eo,’ Jisõs ej ba. Inem ej kamolol Anij kin mõña ko, im jino ruje. Elikin men in, dri kaloran rej ajej bred im iik ko ñõn aolep armij ro. Eor 5,000 eman, im bar elõñ tausan kõra im ajiri ro. Aolepeir rej mõña ñõn air mãt. Im ke ro dri kaloran r’ar ain mõttõn ko mãtiir, e obrok 12 iep kin mõña ko!

Kiõ Jisõs ej jiroñ ro dri kaloran bwe ren uwe ilo juõn wa im jerak ion Lomalo in Gal’i-li. Boñin eo juõn lõñ ej walok, im no ko rej kabeto-betak wa eo. Dri kalor ro re lukkun mijõk. Inem, lukwõn boñin eo, rej lo juõn eo ej etetal ion dren im kebaktok ir. Rej lelñoñ im lamij, kinke rejaje wõn eo rej loe.

‘Komin jab mijõk,’ Jisõs ej ba. ‘Ña e!’ Re jañin maroñ tõmak menin. Inem Piter ej ba: ‘Elañe emol bwe kwe ne, Iroij, kwon jiroñ iõ bwe in iwõj ion dren wõj ñõn ibõm.’ Jisõs ej uak im ba: ‘Kwon itok!’ Im Piter ej kelok jen wa eo im etetal ion dren! Inem e jino mijõk im e ruñlok ak Jisõs ej lomoren.

Tokelik, Jisõs ej bar najirik elõñ tausan armij. Ilo ien in ej najirik ir kin jiljilimjuõn bred im jet wõt iik ko redrik. Im e bar bwe ñõn aolep bwe ren mõña im mãt. Ejab juõn men emõn ke, wãwen an Jisõs jela lale armij ro? Ilo ien eo ej iroij einwõt kiñ an Anij, je jamin naj bar aikwij in inebata kin jabrewõt!