Iloan Juõn Rum I-Tulõñ

EJ BOÑ in Thursday kiõ, emotlok ruo ran. Jisõs im dri jilik ro an 12 r’ar itok ñõn rum in elap i-tulõñ bwe ren mõña kwojkwoj in Kijone eo. Leo me kwoj lo an ilok ej Judas Is-kar’i-õt. Ej ilem kennanek pris ro kin wãwen air maroñ in jibwe Jisõs.

Ilo ran eo wõt moktalok, Judas e ar kebak ir im kajitõk: ‘Ta eo kom naj letok ñõn iõ elañe Ij jibañ kom jibwe Jisõs?’ R’ar ba: ‘Jilñoul mõttõn silver.’ Inem kiõ Judas ej ilem iion lõmarein bwe en tel ir ñõn Jisõs. Ejab men in e lukkun nana ke?

E jemlok air mõña kwojkwoj in Kijone eo. Ak kiõ Jisõs ej jino bar juõn ien mõña ejej uan. Ej lelok bred ñõn dri jilik ro an im ba: ‘Komin mõña, bwe melelen men in, enbwiniõ me naj lewõj kin kom.’ Inem ej lelok ñõn ir juõn kup in wain im ba: ‘Komin irak, bwe melelen men in, bõtõktõkiõ, eo im naj katore kin kom.’ Baibel eo ej naetan ien in ‘kijota eo an Iroij.’

Ro dri Israel r’ar mõña Kijone eo ñõn kakememij ir kin ien eo me enjel an Anij e ar ‘kijone’ mokko imwiir ilo Ijipt. Ak kiõ Jisõs e kõnan bwe ro dri kaloran ren kememij e, im wãwen an lelok mour eo an kin ir. Im eñin unin an jiroñ ir bwe ren kejbarok air lale ien mõña in ejej uan kajojo yiõ.

Elikin air mõña Kijota eo an Iroij, Jisõs ej jiroñ dri jilik ro an bwe ren beran im kajur ilo tõmak. Eliktata, rej al al in nebar ñõn Anij im ilok. Ej lukkun boñ kiõ, bwelen e le jen lukwõn boñ. Jen lale ia eo rej ilok ie lok.