Jisõs Ilo Jikin Kallip Eo

ELIKIN air ilok jen rum eo i-tulõñ, Jisõs im dri jilik ro an rej driojlok ñõn jikin kallip in Get-sem’a-ni. Elõñ alen air itok ñõn ijin mokta. Kiõ Jisõs ej jiroñ ir bwe ren ruj wõt im jar. Inem ej ilok jirik jen ir, im beroane lõl bwe en jar.

Tokelik Jisõs ej jeblak ñõn ijo me dri jilik ro an rej ber ie. Ilo am lemnõk, ta eo rej kõmõne? Rej kiki! Jilu alen Jisõs ej jiroñ ir bwe ren jab kiki, ak kajojo alen an jeblak ej lo air kiki. ‘Ekijkan ami maroñ kiki ilo ien rõt in?’ Jisõs ej ba ilo ien eo eliktata ej jeblak lok. ‘Emottok auõ in air ketak iõ ñõn ro aõ dri kijirat.’

Im ke ej konono, rej roñ ainiken juõn jar elap in armij. Lale mõk! Lõmaro rej itok kin jãji im drun ko! Im rej jibwe kijeek urur ko bwe en maram. Ke rej kebaktok Jisõs, juõn iair ej walok jen bwiljin armij ro im jutak iturin Jisõs. Ej umaik e, einwõt am lo ijin. Lein ej Judas Is-kar’i-õt; Etke ej umaik Jisõs?

Jisõs ej kajitõk: ‘Judas, kwoj ketõk iõ kin mejenma ke?’ Aet, mejenma eo ej juõn kõkõlle. Ej kalikar ñõn lõmaro mõttõn Judas bwe Jisõs eo, leo me re kõnan jibwe. Inem ro an Jisõs dri kijirat rej wonmantak bwe ren jibwe e. Ak Piter e kõnan iri bwe ren jab bõk Jisõs. Ej kwalok jãji eo me e ar bõktok iben im wãkari leo ej jutak iturin. Jãji eo e ir jirik jen bõran leo im e jebõk lojiliñin anbijmaroñõn. Ak Jisõs ej uñir lojiliñin leo im kemour e.

Jisõs ej jiroñ Piter: ‘Kwon kajeblak jãji ne am ñõn nien. Kwoj lemnok ke bwe I jab maroñ in kajitõk iben Jema bwe en jilkintok tausan im tausan enjel ro bwe ren lomoren iõ?’ Aet, e maroñ! Ak Jisõs ejjab kajitõk bwe Anij en jilkintok jabrewõt enjel, kinke e jela bwe e mottok ien eo bwe ro an dri kijirat ren bõke. Kin men in ej kotlok bwe ren ãñinlok e. Jen lale ta eo ej walok ñõn Jisõs kiõ.