Mour ilo Ainemmõn ilo juõn Lõl Ekãl
Ñe kwoj kalimjek pija eo ilo pepa in, ewi eñjake eo am? Buruõm ej kijoror ke kin ainemmõn, mõnõnõ, im jokane eo kwoj lo ie? Emol ej. Ak ej baj juõn ettõnak wõt ke, ak juõn bwebwenato wan, bwe wãwen kein renaj walok ijin ion lõl?
Enañin aoleb armij ro rej lemnak eindrein. Wãwen ko jej lo ilo ran kein einwõt, tarinae, kwuli, nañinmij, ridtolok—rej baj jet iaan abañ ko wõt rej walok kiõ. Ak eor unin ad kejatrikrik wõt. Ilo ad reimanlok ñõn ran ko rej itok, Bible eo ej jiroñ kij kin “lõñ ko im juõn lõl ekãl jej kõtõmene ekkar ñõn kallimur eo [an Anij], im ro rewãnik renaj jokwe ie.”—2 Peter 3:13; Isaiah 65:17.
“Lõñ kein rekãl” im “lõl in ekãl,” ekkar ñõn Bible eo, rejjab lukkun lõñ ko ak lõl in. Ear kõmmõnmõn lõl eo im lõñ ko rewabben, im Bible eo ej ba bwe renaj berwõt ñõn indrio. (Psalm 89:36, 37; 104:5) “Lõl eo ekãl” enaj juõn drolul in armij ro rewãnik me renaj jokwe ion lõl, im “lõñ ko” renaj juõn ailiñ ewabben ilõñ, ak kien eo, im enaj iroij ion drolul in armij in ion lõl. Ak eor ke bedbed eo ñõn ad tõmak bwe “juõn lõl ekãl,” ak juõn lõl ekãl im aibujuij, enaj walok?
Eokwe, lemnak kin mol eo bwe wãwen kein remmõn kin lõl in kar mõttan karõk eo an Anij jen jinoin. Ear likit armij ro ruo moktata ilo Paradise in Eden ion lõl im lelok juõn jerbal emmõn ñõn ir: “Komin timon im orlok im kobrak lõl in im iroij ion.” (Genesis 1:28) Aet, karõk eo an Anij ñõn ir kar bwe ren kõmmõn ajiri ro im jirik kin jirik ren kajererlok Paradise eo air ilo aoleben lõl in. Meñe rar kãlet bwe ren jab bokake Anij, im kalikkar air jab maroñ bõk mour ñõn drio, karõk eo an Anij jen jinoin ear jab oktak. Ej aikuij jejjit kitien ilo juõn lõl ekãl!—Isaiah 55:11.
Ilo mol, ñe kwoj jar kin Jar eo an Iroij, ak jar eo Jememuij ilõñ, im kajitõk bwe Ailiñ eo an Anij en itok, kwoj jar bwe kien eo an ilõñ en jolok men ko renana jen lõl in im iroij ion lõl in ekãl. (Matthew 6:9) Im jemaroñ tõmak bwe Anij enaj uaake jar in, kinke Naan in an ej kallimur: “Ro rewãnik renaj jokwe ion lõl, im renaj berwõt ñõn indrio.”—Psalm 37:29.
Mour ilo Lõl eo Ekããl an Anij
Ailiñ eo an Anij enaj bõktok jerammõn ko an lõl ilo wãwen eo jeban keidi, im kajejjit kitien men ko remmõn otemjej ear karõk i jen jinoin ñõn armij ro an bwe ren lõñliñ kaki ion lõl. Drike dron im kalijeklok renaj jako, im tokelik armij otemjej ilo lõl renaj mol ilo air jimjeran dron. Ilo Bible eo, Anij ej kallimur bwe enaj ‘kabwõjrak tarinae ko ijoko etolok tata.’ “Ailiñ eo ejamin kwotak jãji ko nae ailiñ, im rejamin katak tarinae.”—Psalm 46:9; Isaiah 2:4.
Aolepen lõl in enaj einwõt juõn jikin kallip in paradise. Bible eo ej ba: “Ene jemaren im jikin ko remõra renaj mõnõnõ, im ene jemaren enaj lõñliñ im ebul einwõt saffron. . . . bwe ilo jikin awia river ko renaj walok, im wea ko ilo ene jemaren. Im bok ebwil enaj erom juõn lwe, im ene emõrã enaj unin dren ko.”—Isaiah 35:1, 6, 7.
Enaj wor unin ad mõnõnõ ilo Paradise eo ion lõl. Armij ro rejamin kwuli. “Lõl in enaj letok an lõñlok,” Bible ej ba. (Psalm 67:6; 72:16) Aolep armij renaj mõnõnõ kin tokjen jerbal ko air, einwõt Ri Kõmõnmõn eo ar ear kallimur: “Renaj kallip wijki grep im renaj mõña. . . . rejamin kallip im bar juõn en mõña.”—Isaiah 65:21, 22.
Ilo lõl eo ekãl an Anij, armij ro rejamin obrak le jen joñan moko imwiir ak jikin jokwe ko enana air mour ie, bwe Anij ear karõk bwe: “Renaj kalek moko im jokwe iloiir . . . Rejamin kalek im bar juõn en jokwe ie.” Bareinwõt Bible eo ej kallimur: “Rejamin jerbal bata.” (Isaiah 65:21-23) Inem jerbal ko an armij enaj wor tokjeir im renaj juburu kaki. Rejamin mõk kin mour.
Ilo ien eo, Ailiñ eo an Anij enaj kajeblaak wãwen ainemmõn eo ear bed ilo jikin kallip in Iden ikõtan men in mour ko, im ikõtan men in mour ko im armij. Bible eo ej ba: “Kiru wulf enaj jokwe ibben lam, im kiru lepard enaj babu ibben kon in got, im kon in kau im laion emmõn ridtõn im kau emãttõk, ibben dron, im juõn ajiri erik enaj tel ir.”—Isaiah 11:6-9; Hosea 2:18.
Baj lemnak mõk, ilo Paradise eo ilõl nañinmij otemjej naj kamarmiri bareinwõt! Naan in Anij ej kallimur: “Inem ri jokwe ie ejamin ba: “ Inañinmij.” (Isaiah 33:24) “[Anij] enaj kamõraik jen mejeir dren in kemjãlãl otemjej, im naj ejelok bar mij, liãjalõl ak jañ ak iñtaan. Bwe men ko mokta re jako.”—Revelation 21:4.
Wãwen Am Maroñ Bõke
Emol buruõm en mõnõnõ kin kallimur ko an Anij ikijen mour ilo lõl eo ekãl im wãnik an. Im meñe jet armij remaroñ lemnak bwe jerammõn kein remmõn rejjab mol, joñan an emmõn men kein ejjab melelen eban itok jen pein Ri Kõmõnmõn in yokwe eo ad.—Psalm 145:16; Micah 4:4.
Emol, eor men in aikuij ko jej aikuij tõbari elañe jekõnan mour indrio ilo Paradise eo ej itok ion lõl. Jesus ear kwalok juõn eo elab, ke ear jar ñõn Anij: “Men in mour indrio, bwe ren jela, Kwe wõt, Anij eo emol, im eo kw’ar jilkintok, Jesus Christ.”—John 17:3.
Inem elañe jekõnan mour ilo lõl eo ekãl an Anij, jej aikuij katak kin ankil an Anij im kõmmõne. Bwe emol men in: “Lõl in ejakolok im mõm ko an, ak eo ej kõmmõnmõn ankil an Anij enaj mour ñõn indrio,” im lõñliñ ñõn indrio kin jerammõn ko Ri Kõmõnmõn in yokwe eo ad enaj jolõltak ioer.—1 John 2:17.
Elañe ejelok oktak, aoleb eon in Bible ko rar ukõte jen ukok in Bible eo New World Translation of the Holy Scriptures.