Ta Kejatrikrik eo kin Ro Rejitenburu Rej Mij?
“Elañe juõn armij emij, enaj bar mour ke?” leo etan Job ear kajitõk ilo ien etto. (Job 14:14, King James Version) Bwõlen, kwe, bareinwõt, kw’ar lemnak kin men in. Enaj ewi lemnak eo am elañe kw’ar jela bwe enaj wor juõn ien ñõn am bar lo ro rej jitenburu ibem ijin ion lõl iomin wãwen ko remõntata?
Eokwe, Bible eo ej kallimur: “Ro remij renaj mour. . . . Renaj jerkak.” Im Bible eo ej bareinwõt ba: “Ro rewãnik renaj jolit lõl, im jokwe ie ñõn indrio.”—Isaiah 26:19; Psalm 37:29.
Ñõn tõmak kin kallimur kein, jej aikuij uaak jet kajitõk ko relab: Etke armij rej mij? Ro ri mij rej bed ia? Im ewi wãwen jemaroñ liki bwe renaj bar mour?
Mij, im Ta eo Ej Walok Ñe Jej Mij
Bible eo ej kalikkar bwe ilo jinoin Anij ear jab kõnan bwe armij ren mij. Ear kõmmõnmõn armij ro ruo moktata, Adam im Iv, im likit irro ilo juõn paradise ion lõl etan Iden, im kaiñi ir bwe ren timon im orlok im kalaplok Peradais eo air iaoleben lõl. Renaj kar mij elañe rar jab bokake wõt kien ko an.—Genesis 1:28; 2:15-17.
Kin air jab kamolol kin joij eo an Anij, Adam im Iv rar jab bokake innem rar kõllã wonen jab bokake. “Kwonaj jeblaak ñõn bwidej,” Anij ear jiroñ Adam, “bwe I’ar bõk yuk jen e. Bwe bwidej kwe, im ñõn bwidej kwonaj jeblaak.” (Genesis 3:19) Mokta jen ien kõmmõnmõn Adam ear jab bed; ear bwidej wõt. Im kin an jab bokake, ak jerawiwi, ear bar jeblaak ñõn bwidej, ñõn juõn wãwen ejjab mour ñõn jirik.
Mij ej melelen jab mour. Bible eo ej keidi: “Wonen jerawiwi mij, ak men in letok jen Anij ej mour indrio.” (Rome 6:23) Ñõn kwalok bwe mij ej melelen jab mour ñõn jirik, Bible eo ej ba: “Ro rej mour rej jela renaj mij; ak ro remij, ejelok air jela.” (Ecclesiastes 9:5) Ñe juõn armij enaj mij, Bible eo ej kamelele: “Jitõb eo an ej illok, ej jeblaak ñõn lõl; ilo ran eo lemnak ko an rejakolok.”—Psalm 146:3, 4.
Bõtab, kinke Adam im Iv wõt rar jab bokake kien eo ilo Iden, ak etke kij aoleb jej mij? Kinke kij aoleb j’ar lotak elikin an Adam jab bokake, inem kij aoleb j’ar jolit jerawiwi im mij jen e. Einwõt an Bible kamelele kaki: “Kin juõn wõt armij [Adam] jerawiwi ear dreloñ ilo lõl im mij kin jerawiwi, im eindrein mij ear itok ion armij otemjej.”—Rome 5:12; Job 14:4.
Ak juõn emaroñ kajitõk: ‘Ewor ke juõn an armij bwe eban mij ñe enbwinin juõn armij ej mij?’ Elõñ rar tõmak kake men in, im bareinwõt ba bwe mij ej juõn aor ñõn bõk bar juõn wãwen mour. Ak lemnak in ejjab itok jen Bible eo. Ak, Naan in Anij ej katakin bwe kwoj juõn an, im an ej kwe, ekoba aoleben enbwinem im lemnak ko am. (Genesis 2:7; Jeremiah 2:34; Jabõnkennan 2:10) Bareinwõt, Bible eo ej ba: “An armij eo ej jerawiwi—enaj mij.” (Ezekiel 18:4) Ejelok juõn eon ilo Bible ej katakin bwe eor juõn an armij eban mij meñe enbwinen juõn armij ej mij.
Ewi Wãwen Armij ro Remaroñ Bar Mour
Elikin an jerawiwi im mij dreloñ ilo lõl, Anij ear kwalok bwe karõk eo an ñõn kajeblaaktok ro rar mij ñõn mour ilo jerkakbiji eo. Inem Bible eo ej kamelele: “Ebream . . . ear jela bwe Anij ear maroñ kajerkak [nejin Isaac] jen mij.” (Hebrew 11:17-19) Tõmak eo an Ebream ear jab bwir, kinke Bible ej ba kin Eo Kajur Potata: “Ej Anij, jab ñõn ro ri mij, ak ñõn ro remour, bwe ir aoleb rej mour kin e.”—Luke 20:37, 38.
Aet, Anij eo Ekajur Potata ejjab wor wõt an kajur ak eor kõnan iben bareinwõt ñõn kajerkakbiji ro me ekõnan kãlet ir. Jesus Christ ear make ba: “Komin jab bwilõñ kin men in, bwe auõ ej itok, ilo ien eo ro otemjej rej bed ilo lũp in kememej ko, renaj roñ ainiken im driojtok.”—John 5:28, 29; Jerbal 24:15.
Ejabto elikin an ba naan kein, Jesus ear lo juõn jar in armij ear droijlok jen jikin kwelok in Nein im rar bõklok juõn ri mij ibeir. Ri mij eo ear make wõt nejin juõn kõra ejako belen. Ke ear lo an kõra burumoj, Jesus ear tiriamkake e. Inem, ear kennan lok ñõn ri mij eo im ba: “Likao, Ij ba ñõn yuk, kwon jerkak!” Im ear jerkak, im Jesus ear lelok e ñõn jinen.—Luke 7:11-17.
Einwõt kar walok ñõn kõra in ejako belen, eindrein ear wor juõn mõnõnõ elab ke Jesus ear etal ñõn mweo imõn Jairõs, juõn ri utiej ilo mõn jar eo an ri Ju. Ledrik eo nejin 12 yiõ ridtõn ear mij. Ak ke Jesus ear tõbraklok ñõn mweo imõn Jairõs, ear kebak ledrik eo emij im ba: “Ledrik, kwon jerkak!” Im ear!—Luke 8:40-56.
Tokelik, Lazerõs, jeran Jesus ear mij. Ke Jesus ear etal ñõn mweo imõn, ear motlok emen ran ko jen ien an kar Lazerõs mij. Meñe ear lukkun burumoj, jein ak jaten etan Martha ear kwalok kejatrikrik eo an: “Ijela enaj jerkakbiji ilo ran eo eliktata.” Ak Jesus ear etal ñõn lũp eo, im jiroñ ir bwe ren jolok ejman eo im ej ba: “Lazerõs, kwon driojtok!” Im ear!—John 11:11-44.
Kiõ lemnak mõk kin men in: Kar ta eo wãwen Lazerõs iomin emen ran ko ke ear mij? Lazerõs ear jab ba jabrewõt kin an bed ilo juõn jikin mõnõnõ ilõñ ak juõn jikin iñtaan, jikin ko enaj kar konono kaki elañe ear bed ie. Jaab, Lazerõs ear lukkun mij im enaj kar mij wõt mae “ien jerkakbiji eo ilo ran eo eliktata” elañe Jesus ear jab kajeblaaktok e ñõn mour.
Emol men in bwilõñ ko an Jesus ilo ien eo rar jab bed ñõn indrio, bwe ro rar jerkakbiji rar bar mij. Bõtab, ear kamol 1,900 yiõ ko remotlok bwe, ilo kajur eo an Anij, ro remij renaj bar mour! Inem jen men in bwilõñ ko an Jesus ear kwalok juõn wanjoñok erik kin ta eo enaj kõmmõne ion lõl iomin Ailiñ eo an Anij.
Ñe Juõn Eo Ejitenburu iber Ej Mij
Ñe kwoj jelmae ri kijdrat eo, mij, burumoj eo am emaroñ lap, meñe emaroñ wor am kejatrikrik ilo jerkakbiji. Ebream ear tõmak bwe lio ibben enaj kar bar mour, ak jej konono bwe “Ebream ear burumoj kin Sera im ear liãjlõl kin e.” (Genesis 23:2) Ak ta ikijen Jesus? Ke Lazerõs ear mij, ear “limõ im burumoj,” im ejjabto tokelik ear “jañ.” (John 11:33, 35) Inem, ñe juõn eo kwoj yokwe ej mij, ejjab nana ñõn burumoj im jañ.
Ñe juõn ajiri ej mij, emaroñ juõn ien lukkun burumoj ñõn jinen. Kin men in Bible eo ej jela joñan an lab burumoj ibben juõn jinen. (2 King 4:27) Emol, emaroñ juõn ien burumoj ñõn jemen bareinwõt. “O emmõn elañe ña i’ar mij im jab kwe,” Kiñ Devid ear ba ilo an burumoj ke Absalom nejin ear mij.—2 Samuel 18:33.
Ak, kin am liki wõt kin jerkakbiji eo, burumoj eo am ejamin ñõn indrio. Einwõt Bible ej ba, kwojamin “burumoj einwõt ro jet me ejelok juõn kejatrikrik ibeir.” (1 Thessalonica 4:13) Ak, kwon druaklok ñõn Anij ilo jar, im Bible eo ej kallimur bwe “enaj bauri yuk.”—Psalm 55:22.
Elañe ejelok oktak, aoleb eon in Bible ko rar ukõte jen ukok in Bible eo New World Translation of the Holy Scriptures.