Katak 22
Kakilen Kabuñ eo Emol
1. Won ro rar jerbale wãwen kabuñ eo emol ilo ebeben eo kein kajuõn?
EJJELOK berre kin wõn ro im rar jerbale kabuñ eo emol ilo ebeben eo kein kajuõn. Kar ri kaloran Jesus Christ. Rein aoleb ri rar uan juõn wõt drolul in ri Christian. Ak ta kin rainin? Ewi wãwen ad maroñ kakilen ro rejerbale kabuñ eo emol?
2. Ewi wãwen an juõn maroñ kakilen ro rejerbale kabuñ eo emol?
2 Ilo an kemeleleik wãwen ad maroñ kõmmõne men in, Jesus ear ba: “Kom naj jelã kajjeir kin leir. . . . Wijki emmõn otemjej rej jebar im emmõn leir, a wijki enana e jebar im enana leen; . . . Innem, ilo mol, kom naj jela kajjeir kin leir.” (Matthew 7:16-20) Ta leen ko remmõn kwon kar watõk an ri kabuñ ro remol jebar im kalle? Ta men ko ren kar ba im kõmmõni kiõ?
KOKWOJARJAR ETAN ANIJ
3, 4. (a) Kar ta kajjitõk eo moktata ilo Jar eo Elab an Jesus? (b) Ewi wãwen an Jesus kokwojarjar etan Anij?
3 Ri kabuñ ro remol an Anij ren kar errã ibben Jar eo Elab me Jesus ear lelok ñõn ro ri kaloran. Men eo moktata im Jesus ear kennan kake kar eñin: “Jememuij ilõñ, en kwojarjar etam.” Bar juõn ukok in Bible ear ukõti nan kein ilo wãwen in: “Ren kautiej wõt etam bwe en kwojarjar wõt.” (Matthew 6:9, Jerusalem Bible) Ta melelen an juõn kokwojarjar ak kautiej etan Anij? Ewi wãwen an kar Jesus kõmmõne men in?
4 Jesus ear kalikkar wãwen an kõmmõn men in ke ear ba ñõn Jemen ilo jar: “Iar kwalok etam ñõn armij ro kwar letok ñõn iõ jen lõl.” (John 17:6) Aet, Jesus ear kejjelãik armij ro jet kin etan Anij, Jeova. Ear jab likjab in kejerbal ãt in. Jesus ear jelã bwe karõk eo an Jemen kar bwe Etan en kwojarjar iaoleben lõl. Innem ear likit juõn joñok ilo an kwalok wõt etan im kokwojarjare.—John 12:28; Isaiah 12:4, 5.
5. (a) Ewi wãwen congregation eo an ri Christian ekoba ibben etan Anij? (b) Ñõn bõk lomor jenaj aikwij in et?
5 Bible eo ej kalikkar bwe bed eo an congregation in ri Christian ekoba ibben etan Anij. Ri jilõk Peter ear kemelele kin kijkan an Anij “ilok mokta ñõn ibben ri ailiñ ko bwe en bõk armij ro jen ir kin etan.” (Jerbal 15:14) Kin men in ro dron Anij remol rej kejbarõk etan ekkwojarjar im kabuñbuñ e iaoleben lõl. Ilo mol, bwe juõn en bõk lomor enaj aikwij jela ãt in, ke Bible eo ej ba: “Bwe ‘ro otemjej rej kir etan Jeova renaj bõk lomor.’”—Rome 10:13, 14.
6. (a) Enañin aoleb kabuñ ko rej kokwojarjar etan Anij ke? (b) Eor ke iair im rej kennan wõt kin etan Anij?
6 Innem, kiõ, wõn ro rainin rej kautiej etan Anij einwõt ekkwojarjar im kabuñbuñ etan iaoleben lõl? Enañin aoleb kabuñ ko rejjab kejerbal etan Jeova. Jet iair emwij jeore jen ukok in Bible ko air. Bõtab, elañe kwar bwebwenato ibben ri turum ro im emmãkij am kennan kin Jeova, im kejerbal etan, kabuñ et eo en mõkaj air kile kwoj bed ibben? Eor juõn wõt jar in armij im emol air anõke joñok eo an Jesus ilo men in. Unlebleb in air mour ej ñõn karejar ñõn Anij im kennan kin etan, einwõt an kar Jesus kõmmõn. Kin men in rar bõk ãt eo jen Jeje ko Rekwojarjar “Ri Kennan ro an Jeova.”—Isaiah 43:10-12.
KWALOK KIN AILIÑ EO AN ANIJ
7. Ewi wawen Jesus ear kwalok tokjen ailin eo an Anij?
7 Ilo Jar eo Elab an Jesus, ear bar kwalok tokjen ailiñ in Anij. Ear katakin armij bwe ren jar: “En itok am ailiñ.” (Matthew 6:10) Jesus ear kalikkar tokjen Ailiñ eo im bar eliji bwe e wõt mejalan abañ ko an armij. E im ri jilõk ro an rar kõmmõne men in ilo air kwalok nan kin ailiñ in “jen jikin kwelok ñõn jikin kwelok” im “jen mweo ñõn mweo.” (Luke 8:1; Jerbal 5:42; 20:20) Air unin tel in kwalok nan im katakin kar kin ailiñ eo an Anij.
8. Ewi wãwen an Jesus kwalok ta katak eo elabtata an ro ri kaloran remol kin “ran kein eliktata”?
8 Ak ta kin ran kein ad? Ta unlebleb in katak eo an drolul in ri Christian ro remol? Ilo an kanan kin “ran ko eliktata,” Jesus ear ba: “Im naj kwalok nuj in emmõn kin ailiñ in lõñ iaoleben lõl kin menin kennan ñõn ailiñ otemjelok; innem enaj itok jemlokin.” (Matthew 24:14) Kin men in, katak in kwalok eo elabtata kin ro dron Anij rainin ej kin Ailiñ eo.
9. Wõn ro rej kwalok kin Ailiñ eo rainin?
9 Kajjitõk ibbam make: Elañe juõn ear iwõj ñõn kejem in mweo imõm im kennan kin ailiñ in Anij einwõt kejatdrikdrik eo drein emol kin armij ro, drolul et eo kwon kar watõk an bed ibben? Eor ke ro ian kabuñ ko jet ijellokin Ri Kennan ro an Jeova, im rar kennanek yuk kin ailiñ in Anij? Ilo mol, ejeja en im ejelã ta in! Ejjelok ainikier kin kien eo an Anij. Ak kien en ej mõttan nuj in kamakit-lõlin. Ri kanan eo Daniel ear kanan kin wãwen ailiñ in ‘enaj kejebeblok aoleben ailiñ ko jet, im e wõt enaj iroij ion lõl.’—Daniel 2:44.
KAUTIEJ NAN IN ANIJ
10. Ewi wãwen an Jesus kwalok an kautiej Nan in Anij?
10 Bar juõn wãwen kakilen ro im rejerbale kabuñ eo emol ej kin lemnak ko air kin Bible eo. Aoleb ien Jesus ear kwalok an kautiej Nan in Anij. Ien otemjej ear jitõñlok ñõne einwõt kein kamol men otemjej. (Matthew 4:4, 7, 10; 19:4-6) Jesus ear bar kwalok an kautiej Bible eo kin wãwen an mour ekkar ñõn katak ko ie. Ejjelok ien ear kajjitokjen Bible eo. Ilo mol, ear liakelok ro im rar jab katakin ro jet ekkar ñõn Bible eo ak rar kajjeoñ in kamõjnoik kajurin katak ko an ilo air jakemantak melele ko air make.—Mark 7:9-13.
11. Ta lemnak kin Nan in Anij ekkã an kabuñ ko kwaloki?
11 Ñe joñwe kabuñ ko an Christendom ibben joñok eo an Christ, ewi alikkarin? Emwilõl ke air kautiej Bible eo? Ilo ran kein elõñ ri tel in kabuñ rejjab tõmak bwebwenato ko ilo Bible kin an Adam buñ ilo jerawiwi, ibwijlebleb eo ilo ran ko an Noah, Jonah im eek elab eo, im ko jet. Rej bar ba bwe armij rar walok ikijjen evolution, jab jen an Anij kõmõnmõn ir. Rej ke rejañ ro jet ñõn air kautiej Nan in Anij? Bar juõn, jet ri tel ro in kabuñ rej akwel im ba bwe an juõn belele im jab mare ejjab bwid, ak belele emman ñõn emman ak an juõn koorlok belen emaroñ jimwe. Kwo maroñ ba ke bwe rein rej rejañ armij ñõn air kejerbal Bible eo einwõt juõn menin tel? Ealikkar air jab lor joñok eo an Nejin Anij im ri jilõk ro an.—Matthew 15:18, 19; Rome 1:24-27.
12. (a) Etke meñe elõñ eor air Bible, kabuñ eo air ejjab kabuñburuen Anij? (b) Ta melelen elañe juõn kabuñ ej kõtlok bwe ro ie en emmõn wõt air bed meñe reberan in kõmmõn nana?
12 Eor ro uan kabuñ ko im eor air Bible im rej katak jene, ak wãwen air mour ej kamol air jab lore. Kin ro rej eindrein, Bible eo ej ba: “Rej kwalok bwe rejelã Anij, a ilo jerbal ko air rej karmijete.” (Titus 1:16; 2 Timothy 3:5) Ta melelen elañe kabuñ ko rej kõtlok bwe ro uair ren gamble, kadrek ak kõmmõni men ko jet rebwid ak emmõn wõt air bed ilo kabuñ eo? Ej kamol bwe Anij eban buñburuen kake drolul in kabuñ kein.—1 Korint 5:11-13.
13. Ta bebe eo ebin im juõn enaj aikwij kõmmõne elañe ej lo bwe katak ko ilo kabuñ an rejjab errã ibben Bible eo?
13 Elañe kwar kalmenlokjen kin chapter ko iman iloan book in, im etale eon ko an Bible ie, emwij am tõbar irinekatak ko kin Nan in Anij. Ak ta elañe katak ko an drolul in kabuñ am rejjab errã ibben Nan ko an Anij? Innem juõn abañ elab ej jelmaik yuk. Abañ eo ej elañe kwonaj bõk mol eo jen Bible eo ak joloke ñõn am lor men ko Bible ejjab rejtake. Ealikkar, wãwen am bebe, en am wõt. Bõtab, kwon lukkun bauni im lale. Unin ej kinke bebe eo kwonaj tõbare enaj jelet wãwen am jutak ibben Anij im elañe kwonaj mour indrio ilo paradise ilõl.
JENOLOK WÕT JEN LÕL
14. (a) Kwalok bar juõn kein kakilen kabuñ eo emol? (b) Etke eaurõk bwe ri kabuñ ro remol ren kajejjet men in?
14 Ak bar juõn kakõlle in kakilen ro rej kabuñ ilo mol ej bwe “rejjab mõttan lõl,” einwõt Jesus ear ba. (John 17:14) Melelen ri kabuñ ro remol rejenolok wõt jen lõl in enana im makitkit ko an. Jesus Christ ear karmijete jea in iroij an lõl. (John 6:15) Elañe kwonaj ememej ta Bible eo ej ba kin Satan Devil eo, bwe ej iroij in lõl, enaj maroñ wor am kamolol kin etke eaurõk ad jenolok jen lõl. (John 12:31; 2 Korint 4:4) Jej kile eddron melele in jen ta Bible eo ej ba: “Innem jabdrewõt eo ekõnan bwe en jeran lõl ej ri kijdrate Anij.”—James 4:4.
15. (a) Emol ke bwe kabuñ ko kwo jelã kake “rejjab mõttan lõl”? (b) Kwo jelã ke juõn kabuñ im ej kajejjet men in?
15 Ro uan kabuñ ko ilo bukwõn eo am relukkun bõk melele kein ñõn burueir ke? Emol ke bwe ri tel ro in kabuñ kab ro uan rej lukkun “jab mõttan lõl”? Ak bwilen elab kwonair ke kin ailiñ ko, politic ko im aituerõk ko kin kõtan armij in lõl? Kajjitõk kein rejjab bin ñõn uaki, ke wãwen makitkit ko an kabuñ ko realikkar. Ak ñõn keidri, ebar bidrodro aoleb ien ñõn kakilen jerbal ko an Ri Kennan ro an Jeova. Ilo am make etale, kwonaj lo bwe emol air lor joñok eo an Christ im ri kaloran jen ien ko mokta ilo air jenolok wõt jen lõl, jen politic ko an im jen ial in kibbon, etton, im lej.—1 John 2:15-17.
YOKWE DRON
16. Kwalok juõn wãwen eaurõk ñõn kakilen ri kaloran Christ remol?
16 Wãwen eo eaurõktata in kakilen ro ri kaloran Christ remol ej kin air yokwe dron. Jesus ear ba: “Ilo men in armij otemjej renaj jelã bwe komij ri kalora, elañe komij yokwe dron.” (John 13:35) Eor ke yokwe in ibben drolul in kabuñ ko im kwo jelã kajjeir? Ñõn wanjoñok, rej et ñe ailiñ ko rej bed ie rej tarinaeik dron?
17. Ewi wãwen an drolul in kabuñ ko im ro uan rej kajejjet kien in kin yokwe dron?
17 Kwo jelã ta eo ekkã an walok. Kin nan in jiroñ an emman ro an lõl, ro uan kabuñ ko kajjojo renaj ilen tarinae im mõn ro mõttair ilo ejja tõmak eo ilo bar juõn ailiñ. Kin men in Catholic ej mõn Catholic, Protestant ej mõn Protestant im Muslim ej mõn Muslim. Kwoj lemnak ke bwe kõmmõn kein rekkar ñõn Nan in Anij im ej lukkun kwalok leen jitõb an Anij?—1 John 3:10-12.
18. Ewi wãwen an Ri Kennan ro an Jeova kajejjet kien in kin yokwe dron?
18 Ñe jej joñwe Ri Kennan ro An Jeova kin kwalok yokwe ñõn dron, ta wãweir? Rejjab lor ial in kabuñ ko an lõlin. Rejjab mõn ri tõmak ro mõttair ilo jikin tarinae ko. Ejañin wor rueir kin air riab im ba, “Ij yokwe Anij,” ke rar drike jeir im jatier jen ailiñ ko ak kil ko jet. (1 John 4:20, 21) Ak rej kwalok air yokwe ilo bar jet wãwen ko. Ekijkan? Ilo wãwen air jerbal ibben ri tureir im kate in jibañ ro jet bwe ren katak kin Anij.—Galetia 6:10.
JUÕN WÕT KABUÑ EMOL
19. Etke ej juõn menin kemmanwa im ekkar ñõn Jeje ko Rekwojarjar bwe juõn en ba eor juõn wõt kabuñ emol?
19 Ej juõn menin kemmanwa bwe en wor juõn wõt kabuñ emol. Men in ej errã ibben mol eo bwe Anij eo emol, “ejjab juõn Anij in airwaro, a in ainemmõn.” (1 Korint 14:33) Bible eo ej ba bwe eor “juõn wõt tõmak.” (Epesõs 4:5) Innem, wõn ro, rej ejake drolul in ri kabuñ ro remol rainin?
20. (a) Jen kein kamol ko, book in ej jitoñe won einwõt ri kabuñ ro remol rainin? (b) Eñin men eo kwoj tõmak ke? (c) Ta wãwen eo emmõntata ñõn jelã kajjen Ri Kennan ro an Jeova?
20 Ejjelok ãliklik in ba bwe rein rej Ri Kennan ro an Jeova. Bwe en rel buruõm kimij kir yuk bwe en emmõnlok am jelã kajjeir. Wãwen eo emmõn tata ej ilo am kwelok ibbeir ilo Kiiñdom Hall an Ri Kennan ro an Jeova. Eor tokjen am etale men in, kinke Bible eo ej kalikkar wãwen kabuñ eo emol ej bõktok jokane elab kiõ im ej kebellok ial eo ñõn mõnõnõ kin mour indrio ilo paradise ilõl. (Deuteronomy 30:19, 20) Kimij lewoj kir eo emãnãn ñõn am kõmmõn men in. Etke kwoj jab etãle men in kiõ wõt?
[Pija eo ilo peij 185]
Elanẽ kwar bwebwenato ibben juõn kin Jeova im ailiñ eo an, kabuñ et eo armij ro ren kar kile am bed ibben?
[Pija ko ilo peij 186]
Juõn ej kautiej Nan ko an Anij ke elañe ejjab mour ekkar ñõne?
[Pija eo ilo peij 188, 189]
Jesus ear karmijete jea in iroij an lõl
[Pija eo ilo peij 190]
Kwoj ruainene in etal ñõn kwelok ko an Ri Kennan ro an Jeova