Juon Ilju im Jekl̦aj Ekanooj Em̦m̦an

Ejjabto jãn kiiõ, Setan im enjel̦ ro an renana reban bar m̦on̦e armej ro. Em̦õj an Jeova jolal̦tak er jãn lañ. (Revelesõn 12:9) M̦õttan wõt jidik im Anij enaaj ko̦kkure Setan im enjel̦ ro renana. Rijjilõk Jon ear loe juon visõn jãn Anij kõn men in. Jon ear ba: “Im iar lo juon enjel̦ ej wanlal̦tak jãn lañ, im ippãn ki in abys eo, im ilo pein juon jeen el̦ap. Im ear jibwe tũrãikõn eo, jedpãnit erũtto, eo ej tepil̦ im Setan, im liãpe ium̦win juon to̦ujin iiõ, im ear jol̦o̦ke n̦a ilo abys eo, im kiili, im sil ioon, bwe en jab bar m̦on̦ ri aelõñ ko ñan tõre eo naaj jejjet juon to̦ujin iiõ.” (Revelesõn 20:1-3) Ejjabto ãlikin iien in, naaj ko̦kkure Setan im enjel̦ ro renana im renaaj jako ñan indeeo.​—Matu 25:42, UBS.

Armej ro renana ilo lal̦ in renaaj bar jako.​—Sam 37:9, 10; Luk 13:5.

Ro Rar Mej Renaaj Bar Mour!

Jeova enaaj bõktok elõñ jeraam̦m̦an ko ñan armej ro, ãlikin wõt an naaj ko̦kkure Setan im enjel̦ ro renana. Ej kab m̦õj ad etale ilo bok in bwe ejjel̦o̦k juon jetõb ak aan me ej weaakl̦o̦k jãn armej ro im mour m̦aanl̦o̦k wõt ãlikin aer mej. Jijej ear kwal̦o̦k bwe ñe juon armej emej, ej ãinwõt ñe ej kiki im ettoñ im ejjab ettõn̦ak. (Jon 11:11-14) Jijej ear ba men in kõnke ejel̦ã bwe juon iien ro rar mej renaaj jerkak im bar mour. Ear ba: “Iien eo ej itok im ri mej otemjej ilo lõb . . . renaaj wal̦o̦k jãn libwier.”​—Jon 5:28, 29, UBS; bar lale Jerbal 24:15, UBS.

Ro remej renaaj bar jerkak im mour ilo lal̦ in. Eban bar wõr kõjjel̦ã ñan kõnnaanek armej ro kõn wõn ro remej. Ilo naaj lal̦ eo ekããl, jenaaj roñjake ennaan ko rekam̦õn̦õn̦õ kõn wõn ro rebar mour! Enaaj juon jeraam̦m̦an el̦ap ñan karwaineneik tok armej ro me renaaj jerkak im bar mour!