Kainemmõn kin ro re Barõk
“Jen jinoin ñõn ien in aoleb men in kõmõnmõn ko rej ñũr kin iñtan.” (Rome 8:22) Iñtan in armij kar lab ke r’ar jeje men in elõnlok jen 1,900 yiõ ko remotlok. Elõñ r’ar ñũr ak mijno kin burumõj. Kin men in, r’ar rejañ ri Christian ro: “Komin kakjur ro rej mijno kin burumõj.”—2 Thessalonica 5:14.
Ran kein, abañ ko an armij eo lablok wõt, im elõñlok armij rej mijno kin burumõj. Ak men in en kailbõk kij ke? Jaab, bwe Bible eo ej kalikar bwe ran kein rej “ran ko eliktata” im ej naetair “ien ko renana.” (2 Timothy 3:1-5) Jesus Christ ear kaanan bwe ilo ran ko eliktata, “ailiñ otemjej renaj mijno kin burumõj” im “armij ro renaj lõtlok kin air lelñoñ ilo air ekkiljake men ko renaj waloktok ion aoleben lõl.”—Luke 21:7-11, 25-27; Matthew 24:3-14.
Ñe etto an armij ro burumõj, lelñoñ, inebata ak bed ilo wãwen ko eirlok wõt, ekka air mijno kin burumõj. Õbwer ak mijno kin burumõj le jen joñan emaroñ walok kin an juõn jitenburu ibber mij, ak jibil, luji jerbal eo an jen jikin jerbal eo, ak juõn nañinmij ebin an jako. Bareinwõt, armij ro remaroñ mijno kin burumõj ñe rej lemnak ejjelok tokjen air mour, ñe rej lemnak bwe rejjab maroñ lo tõbrak kin jabdrewõt men im kar likjab ibben armij otemjej. Jabdrewõt armij emaroñ burumõj ñe ej jelmae juõn abañ elab, ak ñe juõn armij ej lemnak bwe ejjelok tokjen an mour im ejjab maroñ kajimwe lemnak in, emaroñ lukkun mijno kin burumõj.
Armij ro ilo ien ko etto r’ar bõk ejja kain lemnak rõt in. Job ear nañinmij im luji men ko mweien. Ear lemnak bwe Anij ear ilok jen e, innem ear kõnan mij. (Job 10:1; 29:2, 4, 5) Jacob ear burumõj kin mij eo an nejen, ear jab kõnan bwe armij ro ren kainemõne im ear kõnan mij. (Genesis 37:33-35) Kin an burumõj kin an jerawiwi, King David ear ba: “Ij etetal im jañ iomin aoleben ran. Ij barok.” Psalm 38:6, 8; 2 Corinth 7:5, 6.
Rainin, elõñ r’ar mijno im burumõj kin air jerbal le jen joñan, kajeoñ in lor juõn ial in jerbal im ej elle jen maroñ in lemnak, eñjake, im kajur eo an. Abañ, koba ibben lemnak ko rejjab jimwe im eñjake ko, remaroñ jelet enbwinen armij im kobalok ibben juõn men ilo kemelij eo an, im kõmmõn bwe en mijno im burumõj.—Keidi Jabõnkennan 14:30.
Jibañ Eo Rej Aikwiji
Epaphroditus, juõn ri Christian jen Philippi ilo ebeben eo kein kajuõn, ear “obrak kin burumõj bwe kom [ro jeran] ar roñ bwe e nañinmij.” Bwõlen, Epaphroditus, eo me ear nañinmij elikin an ro jeran jilkinlok e ñõn Rome ñõn lelok men in lelok ko ñõn ri jilik Paul, ear lemnak bwe ear likjab jen an kõmmõn men eo ro jeran r’ar kõnan bwe en kõmmõne im lemnak bwe ejjelok tokjen leo. (Philippi 2:25-27; 4:18) Ewi wãwen ri jilik Paul ear jibañ leo?
Ear jilkinlok Epaphroditus ñõn kabijuknen im lelok juõn letter ñõn ro jeran ilo Philippi im ba: “komin karuaneneiki [Epaphroditus] kin lõñliñ elab, einwõt ke ej juõn jatid ilo Iroij. Komin kautiej armij otemjej ro rej einwõt e.” (Philippi 2:28-30) Kin an Paul kautiej e im ri Philippi ro karuaneneik e kin juõn jitõb emãnãn im yokwe, emaroñ kar kakajur Epaphroditus im jibañ e bwe en jako an mijno kin burumõj.
Ejjelok berre, bwe naan in kakabelik eo jen Bible ñõn “kaberan ro rej mijno” ej naan in kakabelik eo emmõntata. “Kwoj aikwij jelã bwe armij ro jet rej lemnak im yokwe yuk einwõt juõn armij ,” juõn kõrã eo ear mijno kin burumõj ear ba. “Kwoj aikwij roñ an juõn armij ba, ‘Ij melele; enaj emmõn ibbem.”
Ekka an armij eo ej mijno kin burumõj aikwij bõk edro eo ñõn bukõt juõn armij eo me ej mõnõnõ in kwalok buruen ñõn e. Armij in ej aikwij juõn ri roñjake emmõn im ewor meanwõd ibben. Ej aikwij kejbãrok e jen an ekajete eo ej mijno kin burumõj ilo an ba, einwõt, ‘En jab wãwen drein am lemnak’ ak, Ebwir am lemnak.’ Eñjake eo an eo emijno enaj bururu an jorrãn, im kain uaak rõt kein renaj kalablok an burumõj kin emake.
Armij eo ej mijno kin burumõj emaroñ lemnak bwe ejjelok tokjen an mour. (Jonah 4:3) Ak, juõn armij ej aikwij kememej bwe men eo eaurõk ej ta eo Anij ej lemnak kin armij eo. Armij ro r’ar watõk, Jesus Christ einwõt juõn armij eo “ejjelok tokjen” ibbeir, ak lemnak in ear jab ukõt joñan aurõkin ibben Anij. (Isaiah 53:3) Kememej wõt, joñan an Anij yokwe Nejin, eo ej jitenburu ibben, ej bareinwõt yokwe yuk.—John 3:16.
Jesus ear burumõj kin ro im rej burumõj im kajeoñ jibañ ñõn ir bwe ren kile aurõkiir. (Matthew 9:36; 11:28-30; 14:1-4) Ear kamlele bwe Anij ej kaurõk bao spãrro ko. “Anij ejjab meloklok kin juõn iair,” ear ba. En lablok an kaurõk armij ro me rej kajeoñ in kõmõnmõn ankil an! Ikijen rein Jesus ear ba: “Emwij bwini kolan bõrami otemjelok.”—Luke 12:6, 7.
Emol, emaroñ bin ñõn juõn armij eo elab an burumõj, kin mijno im likjab eo an, tõmak bwe Anij ej kaurõk e. Emaroñ lemnak bwe Anij ejjab yokwe im kõnan kejbãrok e. “Buruer emaroñ liakelok kij,” Naan in Anij ej ba. Ak eñin unin ke ad aikwij mijno kin burumõj? Jaab. Anij ej jelã bwe armij ro rejjab wãppen remaroñ bwid ilo ar lemnak im liakelok ir make. Innem Naan eo an ej kainemõn ir im ba: “Anij elab jen buruer im ej ejelã men otemjelok.—1 John 3:19, 20.
Aet, Jemeruij ilõñ eo ej yokwe kij ej lo men ko jet elablok jen jerawiwi im likjab ko ad. Ej jelã kin unin air walok, aoleb wãwen ad mour, lemnak ko im un ko unin ad kõmmõn men ko. Ej jelã bwe emwij ad jolet jerawiwi, nañinmij, im mij im kin men kein ewor joñan ad jerbal im makitkit. Kin ad burumõj im inebata ibbed make ej kamole bwe jejjab kõnan jerawiwi im jejañin burumõj le jen joñan. Bible eo ej ba bwe “emwij liakelok men in kõmõnmõn ko bwe en ejjelok tokjeir” nae kõnan ko ad. Innem Anij ej jelã kin ial eo jej bed ie, im ilo yokwe ej lemnak kin mijno ko ad.—Rome 5:12; 8:20.
“Jehovah ej tiriamo im joij,” ej kallimure kij. “Einwõt rear etolok jen kabilũñ, eindrein ear likit bwir ko ad etolok jen kij. Bwe ejelã wãwen kõmõnmõn kij im ej kememej bwe kij bõñõlñõl.” (Psalm 103:8, 12, 14) Emol, Jehovah ej “Anij in ainemõn otemjej eo ej kainemõne kij ilo am jorrãn otemjej.”—2 Corinth 1:3, 4.
Jibañ eo elabtata me ro remijno kin burumõj rej aikwiji ej itok jen air drualok ñõn Anij in tiriamo im bõk naan in kir eo ñõn ‘jolok inek eo air ion Jehovah.’ Emol emaroñ “kemour buruen ro re burumõj.” (Psalm 55:22; Isaiah 57:15) Innem Naan in Anij ej rejañ bwe jen jar, ilo an ba: “Komin likit inebata otemjej na ibben [Jehovah], bwe ej ierki kom.” (1 Peter 5:7) Aet, ikijen jar im eorwor armij ro remaroñ drualok ñõn Anij im lõñliñ kin “ainemõn ej jen Anij eo ej elle jen jelã otemjej.”—Philippi 4:6, 7; Psalm 16:8, 9.
Kõmmõn ukoktak ko rekeie ilo wãwen an mour emaroñ jibañ juõn bwe en jolok mijno in bareinwõt. Kaminenek enbwinen, mõñã ekkan ko re uñ kibdreir, kalãdikdik im ebwe an kakije, im kejbãroke jen an lab an aluij TV rej aurõk. Juõn kõrã ear jibañ ro remijno kin burumõj ilo an rejañ ir bwe ren kakaiur air etetal. Ke juõn kõrã eo ear mijno kin burumõj ba: “Ijjab kõnan etetal,” lio ear uaak ilo joij im alikar: “Aet, kwonaj.” Lio ear report: ‘Kim ar etetal iomin emen mile ko. Ke kim ar jeblaak jen amro etetal, kõrã eo ear mõk ak ear emmõnlok an lemnak im ejmour lok. Kwojjab tõmak kin joñan an lab tokjen kaminenek enbwinen mae ien eo kwoj kõmmõne.’
Bõtab, jet ien eban lukkun kamadmid nañinmij in burumõj, meñe emããt ad maroñ ñõn kajeoñ men otemjej, koba doctor. “I’ar kajeoñ men otemjej,” juõn kõrã ear ba, “ak nañinmij in ej berwõt ibba.” Eindreinlok wõt, ekka an walok kiõ bwe eban kamadmid bilo, jaroñroñ, ak ajkuk. Ak, ro im rej mijno kin burumõj remaroñ bõk kainemõn im kejatdrikdrik ilo air ekkeini in konono Naan in Anij, eo me ej kwalok kin juõn kejatdrikdrik ñõn kõmmõne nañinmij ko otemjej an armij ro ñõn in drio.—Rome 12:12; 15:4.
Ñe Ejjelok Juõn Eo Enaj Bar Mijno kin Burumõj
Ke Jesus ear kamlele kin men ko renana renaj walok ion lõl ilo ran ko eliktata, ear koba: “Ñe men kein renaj waloktok, komin jutak im reiliñlok bwe ebaaktok ien ami bõk lomor.” (Luke 21:28) Jesus ear konono kin ien dreloñ ilo lõl eo ekããl an Anij, ijo me “men in kõmõnmõn enaj rõlok jen air ri kamakoko ñõn wabanban, bwe ren anemkwoj ibben ro nejin Anij ilo air anemkwoj eaibujuij.—Rome 8:21.
Enaj juõn jerammõn elab ñõn armij otemjej ñe renaj anemkwoj jen men in kaburumõj ko jen etto im ruj ilo kajojo ran kin juõn lemnak erreo im ejmour, im ekijoror ñõn jelmae jerbal ko ñõn ran eo! Enaj ejjelok jabdrewõt armij im enaj mijno kin burumõj. Kallimur eo emol ñõn armij ro ej bwe Anij “enaj kõmõraik dren in kemjalal jen mejeir, im naj ejjelok bar mij, liajlõl, im jañ. Men ko mokta renaj jako.”—Revelation 21:3, 4.
Aoleb ukok in Bible ko kar walok jen Bible eo New World Translation of the Holy Scriptures, ak enaj kalikare elañe rej kajerbal bar juõn ukok.