Kallim̦ur eo kõn Ro Remej

JUON jiroñ 25 an iiõ ej ba: “Ilo kar 1981 eo, iar lukkuun bũrom̦õj kõnke kõrã eo me ear kõkkaajiririik ña ear mej kõn an kar kããnjõr. Kõmro kar l̦addik eo jatũ lukkuun bũrom̦õj. Ilo iien in kar 17 aõ iiõ im l̦addik eo jatũ kar 11 an iiõ. Ke ro jet rar ba bwe jinõ emej im emootl̦o̦k ñan lañ, iar kõn̦aan bõk mour e aõ bwe in bar etal ippãn. Kõmro kar lukkuun epaake doon.”

Elukkuun nana ñe juon eo ejitõnbõro ippãd ej mej. Jelukkuun bũrom̦õj ñe jej l̦õmn̦ak bwe jeban bar kõnnaan ippãn, ettõñ ippãn, ak bo̦kuji. Jekdo̦o̦n ñe ro jet rej ba bwe eo emej emootl̦o̦k ñan lañ ak men in eban jol̦o̦k ad bũrom̦õj.

Elõñ armej rej tõmak bwe ro remej rej wanlõñl̦o̦k ñan lañ. Bar jet rej tõmak bwe rej mour ilo bar juon ãnbwin. Bõtab, tõmak kein reoktak jãn ta eo Baibõl̦ ej kallim̦ur kake kõn ro remej. Eoon ko ilo kar katak ko m̦oktal̦o̦k rar kaalikkar bwe m̦õttan jidik jenaaj bar lo ro jej yokwe er me rar mej. Rein renaaj bar mour ijin iioon lal̦ ñe enaaj oktak im juon jikin el̦ap aenõm̦m̦an ie. Ilo naaj iien en̦, armej otemjej reban bar nañinmej im mej. Ekanooj em̦m̦an kallim̦ur in, ak emaroñ pen an jet armej tõmake.

Ak ta eo emaroñ jipañ eok ñan tõmake kallim̦ur in? Bwe kwõn tõmake, kwõj aikuj lõke eo ej kõm̦m̦ane kallim̦ur in. Etke? Kõnke ewõr an maroñ ñan kajejjete im ekõn̦aan bwe en jejjet. Innem, an wõn kallim̦ur in bwe ro remej renaaj bar mour?

Ilo iiõ eo 31, Jijej Kũraij ear kallim̦ur im ba: “Ãinwõt an Jemãn kejerkak ro rimej ñan mour, ãindein an Nejin lel̦o̦k mour ñan ro ekõn̦aan lel̦o̦k ñan er. Kom̦win jab bwilõñ kõn men in, bwe iien eo ej itok im rimej otemjej ilo lõb renaaj roñ ainikien [Jijej], im renaaj wal̦o̦k jãn libwier.” (Jon 5:21, 28, 29, UBS) Jijej Kũraij ear kallim̦ur bwe milien armej ro me remej renaaj bar mour ijin ioon lal̦ ñe enaaj erom pedetaij, im renaaj mour ñan indeeo ilo aenõm̦m̦an. (Jon 3:16, UBS; 17:3, UBS; Jerbal 24:15, UBS; bar lale Jabõn Kõnnaan 2:21 im Matu 5:5.) Kõnke Jijej ear kõm̦m̦ane kallim̦ur in, men in ej kaalikkar bwe ekõn̦aan kõmour ro remej. Ak kajjitõk eo in kiiõ, ewõr ke an Jijej maroñ ñan kõm̦m̦ane men in?

Ãlikin an kar Jijej kõm̦m̦ane kallim̦ur eo, juon jim̦a iiõ tokãlik ear kõm̦m̦ane juon men ekabwilõñlõñ. Etke? Kõnke en kaalikkar bwe ekõn̦aan kõmour ro remej im ewõr an maroñ ñan kõm̦m̦ane men in.

“Lazerõs, Kwõn Diwõjtok!”

Juon men ekabũrom̦õjm̦õj ear wal̦o̦k. Lazerõs ear lukkuun do̦o̦lol. Ak ilo iien in, Jijej ear pãd ilo bar juon jikin epaake Reba Jordan, im lim̦aro jein ak jatin Lazerõs etaer Meri im Marta rar kõnnaanekl̦o̦k Jijej im ba: “Irooj, jitõnbõro eo am̦ enañinmej.” (Jon 11:3, UBS) Rar jel̦ã bwe el̦ap an Jijej yokwe Lazerõs. Ejjel̦o̦k pere bwe Jijej ear kõn̦aan loe l̦ein m̦õttan me enañinmej. Bõtab, Jijej ear jab m̦õkaj in etal ñan Betani, ijo Lazerõs ej pãd ie. Ak Jijej ear bar pãd ruo raan ilo ijo ear pãd ie kadede.​—Jon 11:5, 6, UBS.

Tokãlik Lazerõs ear mej. Ke Jijej ear jel̦ã bwe Lazerõs emej, ear pepe in kõm̦m̦ane juon men ñane. Ke Jijej ear tõpar Betani, em̦õj an mootl̦o̦k 4 raan jãn iien eo Lazerõs ear mej. (Jon 11:17, 39) Kiiõ, Jijej emaroñ ke kõmouri Lazerõs ke 4 de raan in an mej?

Ke Marta ej roñ bwe Jijej etõparl̦o̦k ijo, ear m̦õkaj im wõnm̦aiki. (Bar lale Luk 10:38-42, UBS.) Jijej ear tũriam̦okake liin ke ej lo an bũrom̦õj. Kõn men in, ear kaenõm̦m̦ane im ba: “Jeim̦ im jatũm̦ m̦aan enaaj bar jerkak.” Im ke Marta ear kwal̦o̦k an tõmak ilo kallim̦ur eo kõn an ro remej naaj bar mour, Jijej ear kajju ba ñane: “Ña jerkakpeje eo im mour eo. Eo ej lõke eõ, meñe emej, enaaj bar mour.”​—Jon 11:20-25.

Ilo iien eo Jijej ej tõpar lõb eo, ear ba bwe ren kõm̦akũtl̦o̦k mejãn lõb eo. Innem, ear kõl̦l̦aaj ainikien im jar. Ej m̦õj wõt ak eba: “Lazerõs, kwõn diwõjtok!”​—Jon 11:38-43, UBS.

Aolep armej ro ijo rej kalimjekl̦o̦k lowaan lõb eo im rej lo an juon armej jãdetok, ak em̦õj kũtimi ãnbwinnin kõn nuknuk. Im Jijej eba ñan er: ‘Kom̦win jel̦ate nuknuk kan̦e jãne im kõtl̦o̦ke.’ Im ke m̦õttan nuknuk eo ãliktata etũm̦ im wõtlo̦k ñan lal̦, ewal̦o̦k ke armej eo ej Lazerõs, eo me ear mej ium̦win 4 raan!​—Jon 11:44, UBS.

Em̦ool Ke Bwebwenato In?

Bwebwenatoun an kar Jijej kõmour Lazerõs ej wal̦o̦k ilo bokin Jon. Wãween an Baibõl̦ kwal̦o̦k kõn tipdikin bwebwenato in ej kam̦ool bwe ejjab juon bwebwenato bajjek. Ñe jej pere bwebwenato in, mel̦el̦ein bwe jej bar pere aolep menin kabwilõñlõñ ko me Baibõl̦ ej kwal̦o̦k kaki. Im ej bar mel̦el̦ein bwe jej pere an kar Jijej jerkakpeje. Ñe jejjab tõmak bwe Jijej ear jerkakpeje, mel̦el̦ein bwe jejjab tõmak aolep katak ko an.​—1 Korint 15:13-15, UBS.

Armej ro me rej tõmak ilo Anij epidodo aer tõmak bwe ro remej renaaj bar mour. Baj l̦õmn̦ak m̦õk kõn waanjoñak in: M̦okta jãn an juon armej mej, emaroñ kõjerbal juon piitio kamera ñan kõm̦m̦an an kallim̦ur kadede. Tokãlik ñe armej eo emej, ro jet remaroñ alwõje im lo mejãn im roñ ta ko ear ba. Armej ro ilo iien ko etto renaaj kar lukkuun bwilõñ kõn men kein me jemaroñ kõm̦m̦ani raan kein. Im ilo jikin ko me ejjel̦o̦k jarom im eiiet armej ie, remaroñ bar bwilõñ ñe rej loe pijain armej ro im roñ ainikier meñe rejjab pãd iturier. Keememej bwe Anij eo ear kõm̦anm̦an kõj im letok kapeel ñan ad maroñ kõm̦m̦an jabdewõt men, ekoba piitio kamera. Innem, kõnke Anij ear kõm̦anm̦an armej bwe ren mour, emaroñ ke bar kõmour er? Aet emaroñ.

Ke Jijej ear kõmour Lazerõs, ear l̦apl̦o̦k an armej ro tõmak ilo Jijej kab kallim̦ur eo bwe ro remej renaaj bar mour. (Jon 11:41, 42, UBS; 12:9-11, 17-19, UBS) Men in ej bar kaalikkar bwe Jeova im Jijej jim̦or rekõn̦aan kõmour ro remej.

‘Anij Ekõn̦aan’

Ke Jijej ear kõmour Lazerõs jãn mej, men in ear kwal̦o̦k bwe el̦ap an Jijej yokwe armej. Bareinwõt, ej kaalikkar bwe elukkuun kõn̦aan kõmour ro remej. Baibõl̦ ej ba: ‘Ke Meri ej itok ñan ijo Jijej ej pãd ie im loe E, ej buñ iturin neen im ba ñan E, Irooj, el̦aññe Kwaar pãd ijin, jeiũ im jatũ m̦aan ejãmin kar mej. Innem ke Jijej ej lo an jañ, im an Ri Ju ro rar itok ippãn tok bar jañ, Ej lim̦õ ilo an im bũrom̦õj, Im ba, Ewi ijo kom̦ ar likũti ie? Rej ba ñane, Irooj, kwõn itok im lale. Im Jijej ej jañ.’ “Innem Ri Ju rej ba, ‘Lo enañin l̦ap An yokwe e.’”​—Jon 11:32-36.

Eoon kein rej kwal̦o̦k bwe Jijej ear “lim̦õ ilo an,” “bũrom̦õj,” im “jañ.” Men kein rej kaalikkar joñan an Jijej tũriam̦o. Jijej ear lukkuun bũrom̦õj ke l̦eo m̦õttan, Lazerõs, ear mej. Bareinwõt, ke Jijej ear loe an Marta jañ, men in ear kõm̦m̦an an bar jañ.

Ekabwilõñlõñ bwe Jijej ear “jañ” meñe ekar kõmour ruo armej m̦oktal̦o̦k jãn kar iien in, im ear pojak in kõmour Lazerõs. (Jon 11:11, 23, 25, UBS) Men in ej kaalikkar bwe Jijej elukkuun kõn̦aan kõmour ro remej kõnke ejjab kõn̦aan lo ad bũrom̦õj.

Jijej “ej lukkuun ãinwõt Anij ilo men otemjej.” Kõn men in, ñe Jijej ekõn̦aan kõmour ro remej, eokwe ebar l̦apl̦o̦k an Jeova kõn̦aan. (Hibru 1:3, UBS) Job ear ba bwe Jeova ekõn̦aan kõmour ro remej. Ear ba: “El̦aññe juon armej emej, enaaj bar mour ke? . . . El̦aññe Kwõnaaj kũr, innem inaaj uwaak Eok; Kwõnaaj kõn̦aan men in kõm̦m̦an an Peim̦.” (Job 14:14, 15) Men in ej kwal̦o̦k bwe Anij “ekõn̦aan” kõmour ro remej. (Jenesis 31:30, UBS; Sam 84:2, UBS) Ealikkar bwe Jeova ekijooror in kõm̦m̦ane men in.

Innem, jemaroñ ke tõmak bwe ro remej renaaj bar mour? Aet, kõnke Jeova im Nejin relukkuun kõn̦aan kõmour ro remej im ewõr aerro maroñ ñan kõm̦m̦ane men in. Mel̦el̦ein bwe ro rejitõnbõro ippam̦ me rar mej renaaj bar mour im kwõnaaj lo er ijin ioon lal̦. Im ilo iien en̦ me kwõnaaj bar lo er, enaaj l̦ap aenõm̦m̦an ilo lal̦ in.

Ilo jinoin, Jeova Anij ear kõm̦anm̦an armej im likũt er ilo juon jikin eaiboojoj ijin ioon lal̦. Im em̦õj an kallim̦ur bwe enaaj bar kõm̦m̦an bwe lal̦ in en aiboojoj ãinwõt kar m̦okta. Lal̦ in enãj pãd ium̦win Kien eo an Anij ilañ me Jijej Kũraij ej tõl ie. (Jenesis 2:7-9, UBS; Matu 6:10; Luk 23:42) Ilo naaj jukjukun pãd eo ekããl, aolep armej renaaj mour ñan indeeo, im enaaj ejjel̦o̦k nañinmej. (Revelesõn 21:1-4; bar lale Job 33:25; Aiseia 35:5-7, UBS.) Bareinwõt, ejjel̦o̦k armej renaaj dike doon, enaaj jako aolep apañ ko, kalijekl̦o̦k, im jerbal ko rejjab jim̦we. Ãlikin an naaj erreo lal̦ in, Jeova Anij enaaj kõjerbal Jijej Kũraij ñan kõmour ro remej.

Jiroñ eo me kar kwal̦o̦k kake ilo jinoin katak in ej kiiõ tõmak bwe ro remej renaaj bar mour. Ãlikin jet iiõ jãn iien eo jinen ear mej, Ri Kõnnaan ro an Jeova rar jino katak Baibõl̦ ippãn. Jiroñ in ear ba: “Iar jañ ke iar katak im jel̦ã kõn kallim̦ur eo bwe ro remej renaaj bar mour. Elukkuun em̦m̦an kõnke ijel̦ã bwe inaaj bar loe jinõ.”

Ejjel̦o̦k pere bwe kwõj bar kõn̦aan bwe ro kwõj yokwe er me remej ren bar mour. Ri Kõnnaan ro an Jeova renaaj m̦õn̦õn̦õ in katak Baibõl̦ ippam̦ ñan jipañ eok bwe kwõn jel̦ã im tõmak kallim̦ur in bwe ro remej renaaj bar mour.