Jodrikdrik Ro—Ta eo Kom̦ Naaj Kõm̦m̦ane ilo Mour ko Ami?

JUON leddik ej ba, “Ikõn̦aan bwe in lo jeraam̦m̦an ilo mour e aõ.” Ejjel̦o̦k pere bwe ãindein am̦ bar l̦õmn̦ak. Ak ewi wãween bwe kwõn lo jeraam̦m̦an? Ro nukũm̦ im ro m̦õttam̦ im bõlen ri kaki ro am̦ remaroñ ba bwe kwõnaaj lo jeraam̦m̦an el̦aññe elõñ am̦ jããn im eutiej jerbal eo am̦ im kwõ buñbuñ.

Bõtab, Baibõl̦ eo ej kakkõl jodrikdrik ro bwe ejjel̦o̦k tokjãn jibadek m̦weiuk im jeraam̦m̦an ko an lal̦ in. Ej ãinwõt “kañ kõto.” (Ekklisiastis 4:4) Etke? Kõnke jet wõt jodrikdrik ekkã aer m̦weiie im buñbuñ. Bõtab, ekkã an rein lukkuun bũrom̦õj im ajl̦o̦k tokãlik. Juon jodrikdrik jãn Iñlen me ear jibadek juon jerbal eutiej ej ba: “Ej ãinwõt juon bo̦o̦k im kwõ kijooror in kepel̦l̦o̦ke. Bõtab kwõl̦ak kepel̦l̦o̦ke im lale ejjel̦o̦k kobban.” Em̦ool bwe el̦aññe eutiej jerbal eo am̦, kwõmaroñ m̦weiie im buñbuñ. Ak men kein reban jipañ eok ñan “bõk katak ko an Anij.” Men eo me kõj aolep jej aikuji ilo mour ko ad. (Matu 5:3, NW) Ejjab men in wõt ak 1 Jon 2:17 ej jiroñ kõj bwe “lal̦ e jakol̦o̦k.” Meñe kwõmaroñ m̦weiie im buñbuñ ak men kein rej an jidik wõt iien.

Eñin unin Ekklisiastis 12:1 ej ba: ‘Kwõn keememej Eo Ri Kõm̦anm̦an eok ilo raan ko ñe em̦m̦an dettam̦.’ Aet, wãween eo em̦m̦antata bwe kwõn lo jeraam̦m̦an ej ilo am̦ jerbal ñan Jeova Anij. Ak m̦oktata, ewõr men ko kwõj aikuj kõm̦m̦ani bwe kwõmaroñ in jerbal ñan Anij. Ta kein? Im ewi wãween kwõmaroñ jerbal ñan Anij?

Wãween ñan Erom Juon Ri Kõnnaan an Jeova

M̦oktata, kwõj aikuj kaddek juon kõn̦aan ñan jerbal ñan Anij. Kwaar jab l̦otak tok im kajju kõn̦aan karejar ñan Anij meñe jemam̦ ak jinõm̦ ej pãd ilo m̦ool eo. Kwõj aikuj make ejaake juon jem̦jerã epaak ippãn Jeova. Juon leddik ej ba: “Jar ej jipañ eok ñan kõm̦m̦ane juon jem̦jerã ippãn Jeova.”—Sam 62:8; Jemes 4:8.

Rom 12:2 ej kwal̦o̦k bar juon men me kwõj aikuj kõm̦m̦ane. Ej ba: “Kom̦win mãlejjoñ ta ankilaan Anij em̦m̦an im kabuñbũruon im weeppãn.” Ewõr ke jet iien kwõj l̦õmn̦ak bwe men ko kwõj katak kaki rejjab m̦ool? El̦aññe aet, eokwe Baibõl̦ ej rõjañ kõj ñan make “mãlejjoñ” kõj im etale el̦aññe em̦ool katak kein ak jaab! Kwõn make pukot mel̦el̦e ko. Riiti Baibõl̦ eo im bok ko rej pedped wõt ioon Baibõl̦ eo. Katak kõn Anij ej kitibuj el̦apl̦o̦k jãn am̦ baj pukot uwaak ko. Kwõj aikuj bõk iien ñan kõl̦mãnl̦o̦kjen̦ kõn men ko kwõj riiti bwe ren maroñ tõpar bũruom̦. Men in enaaj kõm̦m̦an bwe en l̦apl̦o̦k am̦ yokwe Anij.—Sam 1:2, 3, UBS.

Bar juon men kwõj aikuj kõm̦m̦ane ej jiroñ ro jet kõn men ko kwõj katak kaki. Bõlen kwõmaroñ kwal̦o̦k ñan ro im kwõj jikuul̦ ippãer. Tokãlik, kwõmaroñ jino kwal̦o̦k naan jãn em̦ ñan em̦. Jet iien kwõmaroñ iioon juon iaan ro ilo kilaaj eo am̦ ñe kwõj kwal̦o̦k naan. Ilo jinoin, kwõmaroñ jook im ãliklik. Bõtab, Baibõl̦ ej ba bwe jen “jab jook kõn gospel” eo. (Rom 1:16) Ennaan eo kwõj bõkl̦o̦k emaroñ lo̦mo̦o̦ren e im lel̦o̦k juon kõjatdikdik ñan e. Innem, ejjel̦o̦k unin am̦ aikuj jook!

El̦aññe jinõm̦ im jemam̦ rej Kũrjin, bõlen kwõj kwal̦o̦k naan ippãer kadede. Bõtab, kwõj ke kõm̦m̦ani men ko jet ijello̦kun am̦ baj jutak wõt im jab keroro? Ak baj lel̦o̦k wõt bok ko im peba ko redik ñan armej ro? Kwõmaroñ ke make kõnono ippãn armej ro im kõjerbal Baibõl̦ eo ñan katakin er? El̦aññe jaab, kwõmaroñ kajjitõk jipañ ippãn jinõm̦ im jemam̦ ak juon eo ejel̦ã katakin ilo eklejia eo am̦. Kwõn kate eok ñan erom juon ri kwal̦o̦k naan ejañin peptaij.

Ejjabto, bũruom̦ enaaj kam̦akũt eok ñan ajel̦o̦k mour eo am̦ ñan Anij. Ilo iien in, kwõj kallim̦ur ñan Anij bwe kwõnaaj karejar ñan e jãn kiiõ im m̦aanl̦o̦k. (Rom 12:1, UBS) Bõtab, ro jet rej aikuj jel̦ã bwe kwaar ajel̦o̦k mour eo am̦ ñan Anij. Anij ekõn̦aan bwe kõj aolep jen ‘kwal̦o̦k kõn lo̦ñiid im bõk lo̦mo̦o̦r.’ (Rom 10:10, UBS) Ilo raan eo kwõj pojak in peptaij, kwõj kwal̦o̦k ilo juon ainikien elaj im̦aan mejen aolep im kalikkar tõmak eo am̦. Ãlikin men in, kwõj peptaij ilo dãn. (Matu 28:19, 20) Jejel̦ã bwe el̦ap an aorõk pepe eo ñan peptaij. Bõtab, kwõn jab jenliklik in peptaij kõnke kwõj ba kwõ mijak ñe kwõnaaj jirilo̦k im kõm̦m̦an bõd. El̦aññe kwõj kajjitõk ippãn Anij bwe en jipañ eok, enaaj lewõj “maroñ eo e kanooj l̦ap” bwe kwõn jutak pen.—2 Korint 4:7; 1 Piter 5:10.

Ñe kwõj peptaij, kwõj erom juon iaan Ri Kõnnaan ro an Jeova. (Aiseia 43:10) Men in enaaj jelõt pepe ko kwõnaaj kõm̦m̦ani ilo mour eo am̦. Ñe juon ej ajel̦o̦k mour eo an ñan Anij “eaikuj in kaarmejjete e make.” (Matu 16:24, UBS) Ñan waanjoñak, kwõmaroñ aikuj kaarmejjeteiki mejãnkajjik ko am̦ im kõttõpar ko am̦ bwe kwõn “pukot m̦okta aelõñ in Anij.” (Matu 6:33) Am̦ ajel̦o̦k mour eo am̦ im peptaij enaaj kepel̦l̦o̦k elõñ jeraam̦m̦an ko ñan am̦ pukot m̦okta Aelõñ eo an Anij. Jen etale jet iaaer.

Men ko Kwõmaroñ Kõm̦m̦ani ñan Jerbal ñan Anij

● Kwal̦o̦k Naan Full-time ej juon iaan men ko kwõmaroñ kõm̦m̦ani ãlikin am̦ peptaij. Juon ri kwal̦o̦k naan full-time (regular pioneer) ej aikuj em̦m̦an m̦wilin im kõm̦m̦ane juon joñak em̦m̦an ñan ro jet. Ej aikuj tõpar 70 awa kajjojo allõñ ilo jerbal in kwal̦o̦k naan. El̦aññe el̦ap am̦ kwal̦o̦k naan, enaaj kal̦apl̦o̦k am̦ jel̦ã kilen kwal̦o̦k im katakin armej ro kõn Baibõl̦ eo. Elõñ rar lukkuun lañlõñ ke rar jipañ ro im rar katak Baibõl̦ ippãer bwe ren ukot mour ko aer im peptaij. Ejjel̦o̦k jerbal ilo lal̦ in im emaroñ kõm̦m̦an bwe kwõn lañlõñ im juburu ilo wãween in!

Enañin aolep ri kwal̦o̦k naan rein rej jerbal part-time bwe ren kabwe aikuj ko aer make. Innem ñan jipañ eok ilo am̦ kwal̦o̦k naan full-time, kwõmaroñ kortokjãn kilaaj ko ilo high school me rej katakin ri jikuul̦ ro kilen kõm̦m̦ane juon jerbal. Ñan waanjoñak, kwõmaroñ bõk kõn kilaaj in kaam̦tõ, kõm̦m̦an wa, kallib, im kilaaj in keke im kõmat. Bareinwõt kwõmaroñ katak kilen amim̦õn̦o jãn rũtto ro. Jekdo̦o̦n ta eo kwõj peek in katak kake, kwe kab jemam̦ im jinõm̦ ej aikuj kõjparok bwe unin am̦ katak ej ñan jipañ eok ilo jerbal in kwal̦o̦k naan ak ñe kwõnaaj erom juon eo ej kwal̦o̦k naan full-time. Ejjab bwe kwõn kõm̦m̦an jããn.

Bõtab, men eo juon ri kwal̦o̦k naan full-time ej aikuj l̦õmn̦ak kake m̦oktata ej ñan jipañ ro jet bwe ren maroñ bõk mour indeeo. Ejjab m̦ad kõn jikin jerbal. Etke kwõjjab kõm̦m̦an am̦ mejãnkajjik ñan kwal̦o̦k naan full-time? Ñe kwõnaaj kwal̦o̦k naan full-time, men in enaaj kõm̦m̦an bwe kwõn maroñ bõk kun̦aam̦ ilo men ko jet. Ñan waanjoñak, jet ri kwal̦o̦k naan full-time rej em̦m̦akũt ñan jikin ko jet im el̦ap aikuj ri kwal̦o̦k naan ie. Ro jet rej katak bar juon kajin im jipañ ilo eklejia eo ilo kajin in ak em̦m̦akũtl̦o̦k ñan aelõñ eo rej kõnono kajin eo ie. Ro im rej kwal̦o̦k naan full-time el̦ap aer m̦õn̦õn̦õ im jeraam̦m̦an!

● Mejinede ej bar juon jerbal epel̦l̦o̦k. Jãn 1943, doulul eo an Anij ear kõm̦m̦ane juon karõk bwe ro rej kwal̦o̦k naan full-time ren maroñ etal ñan Jikuul̦ in Mejinede. Jikuul̦ in ej katakin rein kõn jerbal in mejinede. Ãlikin an rein kadiwõjl̦o̦k, rej jilkinl̦o̦k er ñan bar juon aelõñ im mejinede ie. Epen mour ilo elõñ iaan aelõñ kein. Eñin unin ekanooj aorõk bwe mejinede ro ren ãjmour im kãkemooj. Kõn men in, meñe epen ak rein rej m̦õn̦õn̦õ wõt im em̦m̦an jerbal in ippãer.

● Jikuul̦ in Baibõl̦ ñan L̦õm̦aro Me Ejjel̦o̦k Pãleer. Kar kajutak jikuul̦ in ñan katakin em̦m̦aan ro rej lale eklejia im l̦õm̦aro rej jipañ ilo eklejia eo me ejjel̦o̦k pãleer. Rej jikuul̦ ium̦win 8 wiik im rej katak kilen kõm̦m̦ane jerbal ko an em̦m̦aan ro rej lale eklejia im l̦õm̦aro rej jipañ ilo eklejia eo. Bareinwõt, rej katak kilen kwal̦o̦k katak ko rem̦m̦an im kõm̦m̦ani karõk ko ilo eklejia eo bwe ren jejjet im kon̦. Jet iaan rein rej wõnm̦aanl̦o̦k im jerbal ilo aelõñ eo aer ãlikin aer jikuul̦. Ak ro jet rej jilkinl̦o̦k er ñan aelõñ ko jet bwe ren jerbal ie.

● Jerbal ilo Betel̦. Eo ej jerbal ilo Betel̦ ej m̦õn̦õn̦õ in kõm̦m̦ane jabdewõt jerbal ilo juon iaan Ra ko an Ri Kõnnaan ro an Jeova. Ro rej jerbal ilo Betel̦ rej ãinwõt juon baam̦le. Jet iaaer rej jerbal ilo jikin eo rej je im kõm̦m̦ani bok ko. Bar jet rej karreoik m̦weo im kõjparoke bwe en jab jorrããn. Ro jet rej kõmat im kwal̦kol̦ nuknuk im kõm̦m̦ani jerbal ko jet. Jekdo̦o̦n ta jerbal eo rein rej kõm̦m̦ane ak aolep jerbal kein rekwõjarjar im raorõk ippãn Jeova. Bareinwõt, ro im rej jerbal ilo Betel̦ rem̦õn̦õn̦õ in kõm̦m̦ane jerbal ko aer kõnke rejel̦ã bwe ej jipañ aolep ri tõmak ro m̦õttaer ipel̦aakin lal̦ in.

Jet iien, doulul eo ej aikuji ro im rekanooj kapeel im rej kũr rein bwe ren etal im jerbal ilo Betel̦. Bõtab, enañin aolep ro rej etal ñan Betel̦ rej katak kilen kõm̦m̦ane jerbal eo aer ãlikin wõt aer tõkãkl̦o̦k ilo Betel̦. Ri jerbal ro ilo Betel̦ rej jokwane kõn men ko ewõr ippãer ãinwõt kõn m̦õñã im jikin jokwe. Ejjel̦o̦k on̦aer, bõtab rej bõk jidik jããn ñan wiaik aikuj jidikdik ko aer. Juon likao im ej jerbal ilo Betel̦ ej ba: “Elukkuun em̦m̦an jerbal ilo Betel̦! Ebwe an pen kõnke el̦ap poub. Bõtab, elõñ jeraam̦m̦an ko iar loi jãn aõ jerbal ie.”

● Jerbal in Ekkal. Eo ej uwaan kumi in ri ekkal ro enaaj maroñ bõk kun̦aan ñan kalõk Ra ko im Im̦õn Kweilo̦k ko. Rein rej etal jãn jikin ñan jikin bwe ren jipañ ilo jerbal in ekkal. Jerbal in bareinwõt ekwõjarjar im aorõk ippãn Jeova. Ej ãinl̦o̦k wõt jerbal eo an ro im rar kalõk tampel̦ eo ilo raan ko an Solomon. (1 Kiiñ 8:13-18) Ejjel̦o̦k oktak rein jãn ri jerbal ro ilo Betel̦. Kõnke doulul eo ej bareinwõt bõk eddoer im lale aikuj ko aer. Ejeraam̦m̦an wõt l̦õm̦aro im lim̦aro rej bõk kun̦aaer ilo jerbal in ekkal. Jerbal in ej bõktok nõbar ñan Jeova!

Jerbal ñan Jeova kõn Aolepen Am̦

Jerbal ñan Jeova ej men eo em̦m̦antata kwõmaroñ kõm̦m̦ane ilo mour eo am̦. Etke kwõjjab kõm̦m̦an juon mejãnkajjik ñan kwal̦o̦k naan full-time ak mijenede, ak bõlen jerbal ilo Betel̦ ak bõk kun̦aam̦ ilo jerbal in ekkal? Kwõn kõnnaan kake ippãn jemam̦ im jinõm̦, em̦m̦aan ro rej lale eklejia eo am̦ im eo ej itoitak im lol̦o̦k eklejia eo am̦. El̦aññe kokõn̦aan jerbal ilo Betel̦, etal ñan Jikuul̦ in Baibõl̦ ñan L̦õm̦aro Me Ejjel̦o̦k Pãleer ak Jikuul̦ in Baibõl̦ ñan Ri Pãlele Ro, ewõr juon kweilo̦k rej kõm̦m̦ane ñan ro rekõn̦aan kanne aer peba ñan men kein. Ekkã an wal̦o̦k kweilo̦k in ilo kweilo̦k ko rel̦ap.

Ilo m̦ool, ejjab aolep remaroñ kõm̦m̦ane jerbal kein. Ta unin? Kõnke jet iien emaroñ wõr ad nañinmej ak jej aikuj kepel̦l̦o̦k m̦uri ko ad. Bareinwõt kõnke ewõr ad eddo ilo baam̦le eo. Meñe ãindein, aolep rej aikuj l̦oore kien in ilo Baibõl̦. Ej ba: “Kwõn yokwe Irooj am̦ Anij kõn aolepen bũruom̦ im kõn aolepen am̦, im kõn am̦ l̦õmn̦ak otemjej.” (Matu 22:37) Jeova ej kõtmãne bwe kwõnaaj kate eok joñan wõt am̦ maroñ. Innem, jekdo̦o̦n ta men eo kwõj iioone, karejar ñan Jeova en men eo eaorõktata ilo mour eo am̦. Kwõn kõm̦m̦an mejãnkajjik ko ilo am̦ jerbal ñan Anij. Aet, kwõn ‘keememej Eo Ri Kõm̦anm̦an eok’ ilo iien eo kwõj jodrikdrik wõt. Innem, Jeova enaaj kajeraam̦m̦an eok ñan indeeo kõn am̦ kõm̦m̦ane men in!

Ekkã an eoon ko pedped ioon ukok in Baibõl̦ eo an WGM/NKRM, copyright 2009 an Naan ko Rejouj Ministries. Ukok ko jet rej jãn: UBS (United Bible Societies); NW (New World Translation of the Holy Scrip­tures–With ­References).