Maroñ eo Am̦ ñan Jel̦ã Em̦m̦an im Nana

1, 2. (1) Ta menin letok eo eaorõk Jeova ear letok ñan armej otemjej? (2) Im ta eo men in ej jipañ kõj ñan kõm̦m̦ane?

KE ANIJ ear kõm̦anm̦an em̦m̦aan im kõrã eo m̦oktata, ear lel̦o̦k juon men el̦ap an aorõk im em̦m̦an. Kõj armej jej oktak jãn menin mour ko kõnke Anij ear letok ñan kõj maroñ eo ñan make kõm̦m̦an pepe ko rem̦m̦an. Maroñ in ej jipañ armej ro bwe ren jel̦ã oktak eo ikõtaan men ko rem̦m̦an im men ko renana.a Maroñ in ej jelõt l̦õmn̦ak ko ad, kõm̦m̦an ko ad im pepe ko jej kõm̦m̦ani.

² Baj l̦õmn̦ak m̦õk kõn men in: Kwõj ilo̦k ñan juon ãne im kwõjañin kar pãd ie m̦okta. Kwõj ilo̦k ippãn juon armej me el̦ap am̦ lõke kõnke em̦õj an kar pãd ijo kwõj jibadekl̦o̦k. El̦aññe armej in elukkuun jiniete ial̦ ko, eokwe enaaj tõl eok ilo jim̦we. Kwõban jebwãbwe el̦aññe kwõnaaj roñjake im l̦oore. Ãinwõt an armej in tõl eok ilo ial̦ eo am̦, Jeova ear letok ñan aolep armej juon maroñ me emaroñ jipañ er ilo aolepen mour ko aer. Maroñ in ej jipañ armej ro bwe ren jel̦ã ta ko rem̦m̦an im bar ta ko renana. (Jemes 1:17, UBS) El̦aññe jejjab kõjerbale maroñ in ilo jim̦we, jenaaj iioon elõñ jorrããn ko. Ak el̦aññe ejim̦we ad kõjerbale maroñ in, eokwe enaaj jipañ kõj bwe jen pãd wõt ilo ial̦ eo ej tõll̦o̦k ñan mour indeeo. Jen kiiõ etale im lale ewi wãween an maroñ in jerbal. Ilo ad naaj etale, jouj im kõl̦mãnl̦o̦kjen̦ kõn kajjitõk kein: (1) Ewi wãween jemaroñ kõm̦m̦an bwe maroñ eo ad ñan jel̦ã ta em̦m̦an im ta enana en jerbal wõt? (2) Etke jej aikuj l̦õmn̦ak kõn ro jet ñe jej kõm̦m̦ani pepe ko ad? (3) Ta jeraam̦m̦an ko rej wal̦o̦k el̦aññe jej kõjerbale maroñ in ad jãn Jeova ilo jim̦we?

MAROÑ EO JÃN ANIJ IM WÃWEEN AN JERBAL

3. Anij ear letok juon maroñ ñan jipañ kõj jel̦ã em̦m̦an im nana. Ewi wãween an maroñ in jerbal ippãn armej ro?

³ Maroñ in me Anij ear letok ñan kõj emaroñ jipañ kõj bwe jen kõm̦m̦ani pepe ko rejim̦we ilo mour ko ad. Maroñ in emaroñ bar kakkõl kõj bwe jen jab kõm̦m̦ani pepe ko renana. Tokãlik ñe em̦õj ad kõm̦m̦ane pepe eo, maroñ in emaroñ kõm̦m̦an bwe jen m̦õn̦õn̦õ ñe em̦m̦an pepe eo jaar kõm̦m̦ane. Bõtab, emaroñ bar kõm̦m̦an bwe jen ajl̦o̦k ak en eddotok bũruod el̦aññe jaar kõm̦m̦ane juon men enana.

4, 5. (1) Etke jejel̦ã bwe Anij ear lel̦o̦k ñan Adam im Iv maroñ eo ñan jel̦ã em̦m̦an im nana? Ta eo ear wal̦o̦k ke rar jab kõjerbal maroñ in ilo jim̦we? (2) Kwal̦o̦k ruo waanjoñak ko jãn Baibõl̦ kõn ewi wãween maroñ eo ad jãn Anij emaroñ kõm̦m̦an bwe jen m̦õn̦õn̦õ ak ajl̦o̦k?

⁴ Men ko Adam im Iv rar kõm̦m̦ani rar lukkuun kalikkar bwe ewõr kar ippãer maroñ in. Ewi wãween ad jel̦ã men in? Eokwe, ãlikin aerro kar jerawiwi, rar lukkuun jook. (Jenesis 3:7, 8) Ear eddo bũrueer im rar ajl̦o̦k kõn men eo rar kõm̦m̦ane. Bõtab, eñjake kein aerro rar jab maroñ jipañ erro ilo tõrein. Meñe rar jel̦ã ke ebõd men eo, bõtab rar wõnm̦aanl̦o̦k wõt im rupe kien eo an Anij. Men in erro ar kõm̦m̦ane ear kalikkar bwe rar kõn̦aan jum̦ae Jeova Anij. Kõnke erro ar weeppãn, rar jel̦ã bwe ebõd men eo rar kõm̦m̦ane im Anij ear jab jol̦o̦k aerro bõd.

⁵ Elõñ armej ro me rejjab weeppãn rar kõjerbale maroñ in aer jãn Anij ilo jim̦we. Rar jab ãinwõt Adam im Iv. Ñan waanjoñak, em̦m̦aan eo etiljek etan Job ear make ba: “Inaaj dãpij aõ wãnõk, im I jamin kõtl̦o̦k e; bũruõ e jamin kinaak eõ toun wõt aõ mour.” (Job 27:6) Job ear kõjerbal maroñ eo an ñan jel̦ã em̦m̦an im nana ilo jim̦we. Ear kõtl̦o̦k bwe maroñ in en jipañe ilo pepe im kõm̦m̦an ko an. Eñin unin ear maroñ ba bwe bũruon ear jab kinaakl̦o̦k ak kõm̦m̦an bwe en nana an mour. Jen lale oktak eo ikõtaan Job im Devid. Ke Devid ear jab kwal̦o̦k an kautiej Saul, kiiñ eo Jeova ear kããlõte, Baibõl̦ eo ej kwal̦o̦k bwe ear eddotok bũruon Devid. (1 Samuel 24:5) Men in ear lukkuun jipañ Devid bwe en oktak im kwal̦o̦k wõt kautiej.

6. Etke jejel̦ã bwe maroñ in jãn Anij ejjab pãd ippãn armej ro wõt me rej karejar ñane?

⁶ Maroñ in jãn Anij ej ke pãd ippãn armej ro wõt me rej karejar ñane? Ejjab. Rijjelõk Paul ear ba: “Ejjel̦o̦k Kien eo ippãn ri aelõñ ko; bõtab ñe rej kõm̦anm̦an ankilaan Kien eo jãn kõn̦aan ko aer make, mel̦el̦ein bwe er make rej kien ñan er, meñe ejjel̦o̦k Kien Moses ippãer. Mantier ej kwal̦o̦k bwe em̦õj jeje ilo bũrueer men ko Kien eo ej ba. Aer bõklõkõt bareinwõt ej kwal̦o̦k bwe men in em̦ool, kõnke jet iien l̦õmn̦ak ko aer rej kinaakl̦o̦k er make, im jet iien l̦õmn̦ak ko aer rej jojomar ñan er make.” (Rom 2:14, 15, UBS) Anij ear bar lel̦o̦k maroñ in ñan armej ro me rejjab jel̦ã kõn kien ko an. Meñe rejjab jel̦ã kõn kien ko an Jeova, bõtab jet iien pepe ko aer rej kalikkar bwe rejel̦ã oktak eo ikõtaan men ko rem̦m̦an im men ko renana.

7. Etke jet iien maroñ eo ad ñan jel̦ã em̦m̦an im nana ej kejebwãbweik kõj?

⁷ Jet iien, maroñ eo ad ñan jel̦ã em̦m̦an im nana emaroñ kejebwãbweik kõj. Ewi wãween? Eokwe, kwõj keememej wõt ke waanjoñak eo ilo kar jinoin? El̦aññe armej eo ejaje ia eo ej etal iel̦o̦k, komiro naaj jim̦or jebwãbwe. Bareinwõt, el̦aññe ejel̦ã ia eo ej etal iel̦o̦k, bõtab kwõjjab roñjake, eokwe kwõnaaj jebwãbwe. Ilo ejja wãween in l̦o̦k wõt, jet iien bũruod emaroñ m̦on̦e kõj. Kõn wõt men in, kõn̦aan kein an bũruod remaroñ kõm̦m̦an bwe maroñ in ad jãn Anij en jab jim̦we an jerbal. Innem el̦aññe jejjab kõtl̦o̦k bwe Naan in Anij en tõl kõj, eokwe jenaaj bareinwõt jebwãbwe. Keememej wõt bwe el̦aññe jekõn̦aan bwe maroñ eo ad jãn Anij en jerbal ilo jim̦we im ilo jejjet, jej aikuji kajoor eo an Jeova bwe en tõl kõj. Eñin unin Paul ear maroñ ba bwe kajoor eo an Anij ear jipañe ilo an kõm̦m̦ani pepe ko rem̦m̦an. (Rom 9:1) Ewi wãween jemaroñ kõm̦m̦an bwe pepe ko jej kõm̦m̦ani ren juon wõt ippãn kajoor eo an Anij? Eokwe, jej aikuj katakin kõj make. Ewi wãween? Jen lale.

EWI WÃWEEN JEMAROÑ KATAK KILEN KÕJERBALE MAROÑ IN AD ILO JIM̦WE

8. (1) Ewi wãween bũruod emaroñ kõm̦m̦an bwe maroñ eo ad jãn Anij en pen an jerbal? (2) Etke jet iien maroñ eo ad ñan jel̦ã em̦m̦an im nana emaroñ jab jim̦we an jerbal? (Jouj im lale kõmel̦el̦e jiddik ko.)

⁸ Jet armej rejjab lukkuun etale er make. Rej kõm̦m̦ani pepe ko ekkar ñan kõn̦aan ko aer make. Rej make ba: “Ãinwõt ejjel̦o̦k jorrããn ilo men in.” Bõtab, keememej bwe kõn̦aan ko an bũruod remaroñ kõm̦m̦an bwe en pen an maroñ eo ad jãn Anij jerbal. Baibõl̦ eo ej ba: “Bõro ejel̦ã m̦on̦ jãn men otemjej, im ewõr an nañinmej reban kõmoure; wõn emaroñ in mel̦el̦e kõn e?” (Jeremaia 17:9) Kõn men in, jen jab kõtl̦o̦k bwe kõn̦aan ko an bũruod ren men ko m̦oktata ñe jej kõm̦m̦ani pepe ko. Jej aikuj kõm̦m̦ani pepe ko ilo wãween eo me enaaj kabuñbũruon Jeova Anij.b

9. Ta mel̦el̦ein mijak Anij? Ewi wãween mijak in emaroñ jipañ kõj ñan kõm̦m̦ani pepe ko rem̦m̦an?

⁹ El̦aññe jej kõjerbale maroñ eo ad jãn Anij ilo jim̦we, men in enaaj kwal̦o̦k bwe jej mijak Anij. Ej bareinwõt kaalikkar bwe jejjab l̦oore kõn̦aan ko ad make. Jen lale juon waanjoñak. Nihimaia ear komja eo an Jerusalem. Kõn men in, ewõr an jim̦we im maroñ ñan kõm̦m̦an bwe armej ro ren kõl̦l̦ã eowõj ñan e. Bõtab, ear jab kõm̦m̦ane men in. Etke? Kõnke ear jab kõn̦aan kaeñtaan armej ro an Anij im kõm̦m̦an bwe Jeova en jab buñbũruon. Nihimaia ear ba: “Ejjab ãindein aõ kõm̦m̦an, kõn aõ mijak Anij.” (Nihimaia 5:15) Men in ej kaalikkar aorõkin ad aikuj mijak Anij. Ñe jej mijak Anij, jeban kõn̦aan kõmetak e ak kõm̦m̦ani men ko me eban m̦õn̦õn̦õ kaki. Mijak in enaaj jipañ kõj bwe jen kõtl̦o̦k bwe Baibõl̦ eo en tõl kõj ñe jej kõm̦m̦ani pepe ko ilo mour ko ad.

10. Ta eo Baibõl̦ ej ba kõn arkool̦?

¹⁰ Ewi wãween jemaroñ kõm̦m̦an bwe maroñ eo ad jãn Anij en jipañ kõj kõm̦m̦ani pepe ko? Eokwe, jen lale juon waanjoñak kõn arkool̦. Kõj kajjojo jej aikuj make pepe el̦aññe jenaaj idaak ak jaab. Ta eo emaroñ jipañ kõj bwe jen kõm̦m̦ane juon pepe em̦m̦an? Eokwe, jej aikuj kal̦apl̦o̦k ad mel̦el̦e kõn arkool̦. Ñan waanjoñak, ta eo Baibõl̦ eo ej ba kõn men in? Ekkar ñan Baibõl̦ eo, el̦aññe juon armej ej kõm̦m̦an joñan an idaak wain ak arkool̦, eokwe ejjel̦o̦k jorrããn ilo men in. Baibõl̦ eo ej ba bwe Jeova ear letok wain bwe jen m̦õn̦õn̦õ kake. (Sam 104:14, 15) Bõtab, Baibõl̦ eo ej ba bwe enana kadek ak idaak ãinwõt armej ro me rekauwaroñroñ im jajel̦o̦kjen̦. (Luk 21:34; Rom 13:13) Joñan an nana kadek, Baibõl̦ eo ej laajrake men in ippãn jerawiwi ko jet rel̦l̦ap, ãinwõt lejen im l̦õñ.c​​—1 Korint 6:9, 10.

11. Ta ko jemaroñ kõm̦m̦ani bwe Anij en jipañ kõj kõm̦m̦ane juon pepe em̦m̦an kõn arkool̦?

¹¹ Ñe juon Kũrjin ej lale eoon ko ilo Baibõl̦ eo im kõl̦mãnl̦o̦kjen̦ kaki, enaaj maroñ katakin e make kilen kõjerbal maroñ in an ñan jel̦ã oktak eo ikõtaan em̦m̦an im nana. Kõn men in, m̦okta jãn an idaak arkool̦ emaroñ kajjitõk ippãn make kajjitõk kein: ‘Wõn rein me rekõn̦aan bwe in idaak ippãer? Armej rein renaaj ke idaak el̦ap jãn joñan? Ak ta kõn ña? Ij ke ijol̦ arkool̦? Ij ke idaak kõnke el̦ap aõ inepata? Ijel̦ã ke kõm̦m̦an joñan aõ idaak bwe en jab l̦e jãn joñan?’ Ñe jej kõl̦mãnl̦o̦kjen̦ kõn naan in kakapilõk ko jãn Baibõl̦ im kajjitõk ko ãinwõt kajjitõk kein, jen bareinwõt jar ñan Jeova im kajjitõk bwe en jipañ kõj ñan kõm̦m̦ane juon pepe em̦m̦an. (Sam 139:23, 24) Ñe jej kõm̦m̦ane men in, jej kõtl̦o̦k bwe Jeova en tõl kõj ikijjeen kajoor eo an. Bareinwõt, jej kõm̦m̦an bwe maroñ eo ad ñan jel̦ã em̦m̦an im nana en errã ippãn naan in kakapilõk ko an Anij. Bõtab, ejjab baj men kein wõt jej aikuj l̦õmn̦ak kaki. Ebar wõr juon men me jej aikuj l̦õmn̦ak kake m̦okta jãn ad kõm̦m̦ani pepe ko.

L̦ÕMN̦AK KÕN RO JET

12, 13. Etke jet iien ej oktak l̦õmn̦ak ko an Kũrjin ro jãn doon? Ñe ej oktak l̦õmn̦ak ko an eo juon, ta eo jej aikuj kõm̦m̦ane?

¹² Jet iien kwõnaaj make kile bwe eoktak wãween an Kũrjin ro l̦õmn̦ak jãn doon. Jemaroñ ba bwe eoktak wãween aer kõjerbale maroñ eo aer ñan jel̦ã em̦m̦an im nana jãn doon. Bõlen jet armej emaroñ em̦m̦an ippãer juon men, bõtab ro jet remaroñ l̦õmn̦ak bwe enana men eo. Ñan waanjoñak, jet iien jet armej remaroñ idaak arkool̦ ippãer make ak ippãn bar ro jet. Meñe ejjel̦o̦k jorrããn ñe juon ej idaak arkool̦, bõtab ro jet remaroñ l̦õmn̦ak bwe ejakkar men in. Etke eoktak wãween aer l̦õmn̦ak jãn doon? Im ewi wãween jemaroñ l̦õmn̦ak kõn ro jet ñe jej kõm̦m̦ani pepe ko?

¹³ Ewõr unin an oktak l̦õmn̦ak ko an armej ro jãn doon. Ej ãindein kõnke eoktak aelõñ ak m̦anit ko aer. Ro jet ear oktak wãween aer kar mour m̦okta im bõlen ewõr aer m̦õjn̦o̦. (1 Kiiñ 8:38, 39, UBS) Kõn wõt men kein, jet armej renaaj lukkuun l̦õmn̦ak m̦okta el̦aññe ekkar bwe ren idaak. Eñin unin el̦aññe armej rot in ej lowõj eok, emaroñ jab idaak el̦aññe kwõj baj lel̦o̦k jidik limen. Maroñ eo an ñan jel̦ã em̦m̦an im nana ej jiroñe bwe ejjab ekkar an idaak. El̦aññe kwõj lel̦o̦k limen bõtab ejjab kõn̦aan, kwõnaaj ke l̦õkatip? Kwõnaaj ke akwel̦ap ak iuuni wõt bwe en idaak?

14, 15. Ta apañ eo ear wal̦o̦k ñan Kũrjin ro ilo iien ko etto? Ta eo Paul ear jiroñ er bwe ren kõm̦m̦ane?

¹⁴ Rijjelõk Paul ear kile bwe ear oktak wãween an Kũrjin ro ilo iien ko etto l̦õmn̦ak jãn doon. Ear oktak wãween aer kõjerbale maroñ eo aer ñan jel̦ã em̦m̦an im nana. Ilo kar iien kein, jet iaan Kũrjin ro rar l̦õkatip ke rar loe an Kũrjin ro jet wia im kañi m̦õñã ko me em̦õj an ro jet kar aji ñan ekjab ko. (1 Korint 10:25) Paul ear l̦õmn̦ak bwe ejjel̦o̦k jorrããn ñan kañi m̦õñã kein. Etke? Kõnke Paul ear jel̦ã bwe ejjel̦o̦k tokjãn ekjab ko. Jeova ear kõm̦m̦an m̦õñã ñan armej ro im jab ñan ekjab ko. Kõn men in, ejjel̦o̦k jorrããn ilo m̦õñã kein. Bõtab, Paul ear mel̦el̦e bwe ro jet eoktak l̦õmn̦ak ko aer kõn m̦õñã kein. Bõlen jet iaan Kũrjin rein rekõn kabuñ ñan ekjab ko ilo jinoin. Eñin unin relukkuun jõjõik m̦õñã kein me em̦õj aer kar aje ñan ekjab ko. Ekkar ñan l̦õmn̦ak eo an armej rein, jabdewõt men ko me rej ekkejell̦o̦k ñan kabuñ ñan ekjab rettoon im rejakkar. Ta eo Paul ear kõm̦m̦ane kiiõ?

¹⁵ Paul ear ba: “Kõj ro jekajoor ilo tõmak jen jipañ ro rem̦õjn̦o̦ kõn menin eddo ko aer, im jab kabuñbũruod make. Bwe Kũraij ear jab kabuñbũruon make.” (Rom 15:1, 3, UBS) Paul ear kalikkar bwe jej aikuj l̦õmn̦ak kõn ro jet el̦apl̦o̦k jãn ad l̦õmn̦ak kõn kõj make, ãinwõt kar Kũraij. Paul ear bar ba bwe meñe ejjel̦o̦k jorrããn ilo m̦õñã kein, bõtab eban wõnm̦aanl̦o̦k wõt im kañi. Etke? Kõnke ejjab kõn̦aan kal̦õkatip jabdewõt armej eo me Kũraij ear ajel̦o̦k mour eo an ñane.​​—1 Korint 8:13; 10:23, 24, 31-​33.

16. Etke ro me epidodo aer l̦õkatip ren jab ekajete ro jet el̦aññe eoktak l̦õmn̦ak ko aer jãn doon?

¹⁶ Bareinwõt, ro me epidodo aer l̦õkatip ren jab ekajete ro jet el̦aññe eoktak l̦õmn̦ak ko aer jãn doon. Jen jab kõtõmene bwe armej ro ren l̦oore men eo jej ba bwe ejim̦we im ekkar. (Rom 14:10) Anij ear letok maroñ eo ñan jel̦ã em̦m̦an im nana bwe jen kõjerbale ñan ekajete kõj make im ejjab ñan ekajete pepe im kõm̦m̦an ko an ro jet. Jen bareinwõt keememej naan kein an Jijej: “Kom̦win jab ekajete ro jet, bwe Anij en jab ekajete kom̦.” (Matu 7:1, UBS) Aolep ro ilo eklejia eo ren jab ekajete ro jet el̦aññe eoktak l̦õmn̦ak ko aer ak wãween aer kõjerbale maroñ eo aer jãn Anij ñan jel̦ã em̦m̦an im nana. Jej aikuj kate kõj bwe en wõr wõt yokwe im bõrokuk. Jen jipañ im kakajoor doon im jab kabbeer doon.​​—Rom 14:19.

JERAAM̦M̦AN KO REJ WAL̦O̦K ÑE EJIM̦WE AD KÕJERBALE MAROÑ EO AD JÃN JEOVA

17. Ta eo ej wal̦o̦k ñan maroñ eo an elõñ armej rainin ñan jel̦ã em̦m̦an im nana?

¹⁷ Rijjelõk Piter ear rõjañ kõj bwe en wõr ippãd “juon bõro erreo.” (1 Piter 3:16, NW) El̦aññe jej make kile bwe jej erreo im̦aan mejãn Jeova Anij, men in ej juon jeraam̦m̦an el̦ap. Ejjab aolep armej rej bõk jeraam̦m̦an in el̦ap. Paul ear kõnnaan kõn jet armej ro me “ejjel̦o̦k aer jook ñan jidik; el̦ap aer nana, im rej kõm̦m̦an aolep men ko rekajjõjõ im ejjel̦o̦k aer kõmmaanwa.” (Epesõs 4:19) Ekkar ñan eoon in, elõñ armej rainin rej kõm̦m̦ani men ko renana im rejjab jook kaki. Ej ãinwõt ñe maroñ eo aer ñan jel̦ã em̦m̦an im nana ejjab jerbal ñan jidik. Kõnke maroñ in aer ejjab jerbal, armej rein rej m̦õn̦õn̦õ in kõm̦m̦ani wõt men ko renana.

18. El̦aññe jej kõm̦m̦ane juon men im tokãlik jej ajl̦o̦k kake, ta mel̦el̦ein men in?

¹⁸ El̦aññe jej kõm̦m̦ane juon men im tokãlik jej ajl̦o̦k kake, ta mel̦el̦ein men in? Eokwe, maroñ eo am̦ ñan jel̦ã em̦m̦an im nana ej jiroñ eok bwe ebõd men eo kwaar kõm̦m̦ane. Ñe juon armej ej bõk eñjake rot kein im ej ukel̦o̦k im etal jãn bõd eo an, Anij enaaj m̦õn̦õn̦õ in jol̦o̦k an bõd, jekdo̦o̦n ewi joñan an kar nana men eo ear kõm̦m̦ane. Ñan waanjoñak, jen lale bwebwenato eo kõn Kiiñ Devid. Meñe ear kõm̦m̦ane juon bõd ekanooj l̦ap im nana, Anij ear jol̦o̦k an bõd kõnke ear ukel̦o̦k jãn aolepen bũruon. Devid ear make kile im kitõtõik men eo enana me ear kõm̦m̦ane. Bareinwõt, ear peek jãn bũruon bwe enaaj wõnm̦aanl̦o̦k wõt im pokake kien ko an Jeova. Aolep men kein rar kamaroñ Devid bwe en kam̦ool bwe Jeova ‘em̦m̦an, im ekõn̦aan jol̦o̦k bõd.’​—Sam 51:1-19; 86:5.

19. Ta eo jej aikuj kõm̦m̦ane el̦aññe jej l̦õmn̦ak bwe ej lõñ wõt ruõd meñe em̦õj ad kar ukel̦o̦k?

¹⁹ Ak ta el̦aññe kwõj l̦õmn̦ak bwe ej lõñ wõt ruõm meñe em̦õj am̦ kar ukel̦o̦k jãn aolepen bũruom̦? Eokwe, jet iien bũruod emaroñ wõnm̦aanl̦o̦k wõt im n̦aruod kõn juon bõd me em̦õj ad kar ukel̦o̦k jãne. Men in emaroñ kõm̦m̦an bwe jen ebbeer im bõjrak jãn ad kõm̦m̦ani men ko rejim̦we. El̦aññe ej wal̦o̦k men in, jej aikuj keememej bwe meñe el̦ap an eddo bũruod, Jeova emel̦el̦e kõn eñjake ko ad. El̦aññe jej ba ñan ro jet bwe Anij ej yokwe er im ej jol̦o̦k aer bõd, kõj bareinwõt jej aikuj tõmake men in. (1 Jon 3:19, 20) Juon bõro eo erreo enaaj kõm̦m̦an bwe jen ineem̦m̦an wõt im jab abn̦õn̦õ ak inepata kõn bõd ko ad kar m̦okta. Elõñ armej ro rekõn kar kõm̦m̦ani men ko renana ilo mour ko aer. Bõtab, rar ukel̦o̦k jãn bõd ko aer im kiiõ rej jerbal ñan Jeova Anij im rejel̦ã bwe ejjab watõki bõd ko aer kar m̦okta.​​—1 Korint 6:11.

20, 21. (1) Kar kõm̦m̦ane bok in bwe en jipañ eok ñan ta? (2) Kain anemkwoj rot eo Anij ear lel̦o̦k ñan aolep Kũrjin ro? Bõtab, ewi wãween jej aikuj kõjerbale anemkwoj in ad jãn Anij?

²⁰ Kar kõm̦m̦ane bok in ñan jipañ eok lo lañlõñ ilo am̦ jerbal ñan Jeova Anij im kõm̦m̦an bwe maroñ eo am̦ ñan jel̦ã em̦m̦an im nana en jim̦we wõt an jerbal ilo raan kein ãliktata an jukjuk im pãd in enana an Setan. Bok in ejjab tipdiki tok aolep kien ko ilo Baibõl̦ im naan in jiroñ ko me jemaroñ kõl̦mãnl̦o̦kjen̦ kaki im jerbali raan otemjej. Bareinwõt, bok in eban kajju kwal̦o̦k ta ko kwõj aikuj kõm̦m̦ani ñe ej itok ñan pepe ko me kwe make kwõj aikuj kõm̦m̦ani. Unin kar kõm̦m̦ane bok in ej ñan jipañ eok katak kõn Baibõl̦ eo bwe en jim̦we im jejjet wãween am̦ kõjerbale maroñ eo am̦ jãn Anij ñan jel̦ã em̦m̦an im nana. Ilo Kien Moses, Ri Israel ro rar mour im l̦oore kien ko em̦õj jeiki. Bõtab ium̦win “kien Kũraij,” jelukkuun anemkwoj kõnke jej mour ekkar ñan naan in kakapilõk ko jãn Baibõl̦ eo im jej l̦oore maroñ eo ad ñan jel̦ã em̦m̦an im nana. (Galetia 6:2) Men in ej kaalikkar bwe Jeova ear lel̦o̦k ñan Kũrjin ro rem̦ool anemkwoj in. Bõtab, Naan eo An ej kakeememej kõj bwe jen jab kõjerbale anemkwoj in ãinwõt juon “kein kalibubu jerawiwi.” (1 Piter 2:16) Anemkwoj in ad ej letok juon iien em̦m̦an bwe jen make kaalikkar ñan Jeova bwe jej lukkuun yokwe e.

²¹ Kwõj aikuj jar im kajjitõk ippãn Jeova bwe en jipañ eok l̦oore naan in kakapilõk ko an. Innem, kwõj aikuj jerbali naan in kakapilõk kein. Ilo wãween in, kwõnaaj wõnm̦aanl̦o̦k wõt im kabuñbũruon Anij ãinwõt am̦ kar jino kõm̦m̦ane ke kwaar jino am̦ katak kõn Jeova. Bareinwõt, men in enaaj jipañ eok ñan kõjerbale maroñ eo am̦ jãn Anij ñan kile oktak eo ikõtaan “em̦m̦an im nana.” (Hibru 5:14) El̦aññe maroñ in am̦ ej pedped wõt ioon Baibõl̦ eo, enaaj jipañ eok ilo am̦ kõm̦m̦ani pepe ko rejim̦we raan otemjej ilo mour eo am̦. Ãinwõt juon eo m̦õttam̦ im ej tõl eok ilo ial̦ eo am̦, maroñ in am̦ ñan jel̦ã em̦m̦an im nana enaaj jipañ eok bwe kwõn kõm̦m̦ani pepe ko me rej kabuñbũruon Jemedwõj ilañ. Eñin ej juon wãween im enaaj jipañ eok bwe kwõn pãd wõt ilo yokwe eo an Anij.