Jum̦ae Tepil̦ eo im Jab Po ilo Kõm̦m̦an ko an Retao

1, 2. Wõn ro rej m̦õn̦õn̦õ ilo iien peptaij ko?

EL̦AÑÑE kwõj juon eo me eto an karejar ñan Jeova, joñan in elukkuun lõñ alen am̦ roñjake katak in peptaij ko ilo iien kweilo̦k ko ad rel̦l̦ap. Aolep iien ñe kwõj pãd ilo iien kweilo̦k kein, el̦ap am̦ m̦õn̦õn̦õ ñe kwõj reil̦o̦k im loe an ro me rej pojak in peptaij jutak ñan aer uwaaki kajjitõk ko. Im ilo iien eo me rej wal̦o̦k lõñtak jãn dãn eo, aolep rej kabbokbok kõnke relukkuun m̦õn̦õn̦õ. Joñan am̦ kar m̦õn̦õn̦õ kõn an armej rein rekããl kããlõt Jeova bwe en aer irooj, bõlen ear to̦o̦r dãnnin kõmjaal̦al̦ jãn mejam̦. Elukkuun l̦ap ad lañlõñ ilo iien rot kein!

² Bõlen elukkuun lõñ alen am̦ kar pãd ilo iien peptaij ko ilo ijo kwõj pãd ie. Enjel̦ ro rej lukkuun bar m̦õn̦õn̦õ bwe rej alwõj im lale aolep iien peptaij ko me rej wal̦o̦k ipel̦aakin lal̦ in. Kajjojo wiik, elõñ to̦ujin armej ro rej peptaij. Joñan in el̦ap “lañlõñ ilañ” ñe armej rein wõj rekããl rej kobatok ilo doulul eo an Jeova. (Luk 15:7, 10) Enjel̦ ro rej lukkuun m̦õn̦õn̦õ ñe rej loe bwe elõñl̦o̦k wõt uwaan armej ro an Anij!​—Haggeai 2:7.

TEPIL̦ EO EJ “ITOITAK ÃINWÕT JUON L̦AIÕN EO ERORROR”

3. (1) Etke Baibõl̦ ej ba bwe Setan ej ãinwõt “juon l̦aiõn eo erorror”? (2) Ta eo Setan ekõn̦aan kõm̦m̦ane?

³ Ñe armej ro rej peptaij, ewõr ro me rejjab m̦õn̦õn̦õ ñan jidik. Wõn rein? Setan im enjel̦ ro an renana. Jetõb rein renana rej lukkuun illu ñe rej loe an elõñ to̦ujin armej ro jab bõk kun̦aaer ilo jukjuk im pãd in enana. Setan elukkuun illu kõnke em̦õj an kar ba bwe ejjel̦o̦k juon armej emaroñ karejar ñan Jeova kõn aolepen bũrueer. Ear bar ba bwe ejjel̦o̦k juon armej emaroñ tiljek ñan Anij ñe rej iioon mãlejjoñ ko ak apañ ko rel̦l̦ap. (Job 2:4, 5, UBS) Kajjojo iien ñe juon armej ej make aje mour eo an ñan Jeova, armej in ej kaalikkar bwe eriab naan kein an Setan. Kõn men in, to̦ujin armej ro rej kaalikkar ñan Jeova kajjojo wiik bwe Setan ej juon ri riab. Eñin unin Baibõl̦ ej ba bwe Setan ej “itoitak ãinwõt juon l̦aiõn eo erorror, im ej reito reitak im lale wõn eo emaroñ kañe.” (1 Piter 5:8, UBS) Setan ekõn̦aan ko̦kkure kõj im ekõn̦aan bwe jen bõjrak jãn ad karejar ñan Jeova.​—Sam 7:1, 2, UBS; 2 Timote 3:12, UBS.

4, 5. (1) Ta men ko ruo Anij ear kallim̦ur kaki me rej kaalikkar bwe ewõr joñan maroñ eo an Setan? (2) Ta eo Baibõl̦ ej rõjañ kõj bwe jen kõm̦m̦ane?

⁴ Meñe Setan ej illu ippãd, ejjel̦o̦k unin ad mijak. Etke? Kõnke ewõr joñan maroñ eo an Setan. Etke jejaam̦ ba men in? M̦oktata, Jeova ear kallim̦ur bwe enaaj wõr juon “jar el̦ap” in armej ro doon me renaaj mour im el̦l̦ã jãn eñtaan eo el̦ap. (Revelesõn 7:9, 14) Aolep iien ej jejjet kitien kallim̦ur ko an Anij. Kõn men in, Setan ebar jel̦ã bwe eban ko̦kkure aolep armej ro an Anij.

⁵ Wãween eo kein karuo jejel̦ã bwe Setan eban ko̦kkure aolep armej ro an Anij ej alikkar ilo naan ko an ri kanaan Azaraia. Ri kanaan in etiljek an Jeova ear ba ñan Kiiñ Esa: “Jeova ej ippemi el̦aññe kom̦ Ippãn.” (2 Kronikel 15:2; 1 Korint 10:13, UBS) Elukkuun lõñ bwebwenato ko ilo Baibõl̦ im rej kam̦oole naan kein. Jekdo̦o̦n ta eo Setan enaaj kõm̦m̦ane, ak bwebwenato kein rej kam̦ool bwe Setan ejamin ko̦kkure armej ro me rej kate er bwe ren epaake wõt Anij. (Hibru 11:4-40) Rainin, armej ro doon Anij remaroñ jum̦ae Tepil̦ eo im anjo̦ ioon el̦aññe rej pãd epaake wõt Anij. Naan in Anij ej rõjañ kõj: “Kom̦win jum̦ae Tepil̦, im enaaj ko jãn kom̦.”​—Jemes 4:7.

JEJ IRE AK OKTAAK IPPÃN JETÕB RO RENANA

6. Ta wãween ko jilu Setan ej kõjerbali ñan ko̦kkure kõj kajjojo?

⁶ Setan ejjab maroñ ko̦kkure aolep ro doon Jeova. Bõtab, emaroñ ko̦kkure kõj kajjojo el̦aññe jejjab kõjparok. Setan ejel̦ã bwe enaaj lo tõprak el̦aññe ej kam̦õjn̦o̦l̦o̦k kõtaan eo ad ippãn Jeova. Ewi wãween Setan ej kõm̦m̦ane men in? Kein kajuon, Setan ejjab bõjrak ilo an tarin̦ae kõj. Kein karuo, Setan ej kajenolo̦k kõj kajjojo innem kajjioñ ko̦kkure kõj. Im kein kajilu, Setan ej kõjerbale wãween ko retao. Jen kiiõ etale wãween kein jilu me ekkã an Setan kõjerbali.

7. Etke el̦apl̦o̦k an Setan kate kiiõ ñan ko̦kkure ro doon Jeova?

⁷ Setan ejjab bõjrak. Rijjelõk Jon ear ba: “Aolep[en] lal̦ in ej pãd ium̦win pein Ri Nana eo.” (1 Jon 5:19, UBS) Naan kein rej kakkõl aolep ro doon Anij. Kõnke em̦õj kadede an aolepen lal̦ in pãd ium̦win maroñ eo an Setan, kiiõ ej kamaat aolepen maroñ ko an ñan tarin̦aek ro doon Jeova. (Maika 4:1; Jon 15:19; Revelesõn 12:12, 17) El̦ap an Setan illu kiiõ kõnke ejel̦ã bwe jidik wõt iien ippãn. Kõn men in, ej kab baj l̦apl̦o̦k wõt an kaeñtaan armej ro doon Anij. Rainin, Setan ej lukkuun kate kõnke eñin ej iien eo ãliktata in an naaj kajjioñ in ko̦kkure im rupe jem̦jerã eo ad ippãn Anij. Eñin unin ej aikuj l̦apl̦o̦k wõt ad kate kõj ñan jel̦ã ta ko jej aikuj kõm̦m̦ani bwe jen jab jorrããn.​—1 Kronikel 12:32.

8. Ta mel̦el̦ein an kar Paul ba bwe jej “oktaak” ak ire ippãn enjel̦ ro renana?

⁸ Setan ej kajenolo̦k kõj innem ire ak oktaak ippãd kajjojo. Rijjelõk Paul ear kakkõl ri tõmak ro m̦õttan im ba bwe jej “oktaak” ippãn enjel̦ ro ak jetõb ro renana. (Epesõs 6:12) Etke Paul ear kõjerbal naan in “oktaak”? Kõnke ekõn̦aan kaalikkar bwe kajjojo iaad ej ire ippãn enjel̦ ro renana. Jej aikuj keememej bwe el̦aññe em̦õj ad ajel̦o̦k mour ko ad ñan Jeova, jej kaalikkar bwe jepojak in ire im jum̦aeik jetõb ro renana. Jej aikuj pojak iien otemjej meñe armej ro ilo jikin ko jej pãd ie rej tõmak ilo jetõb ro renana ak jab. Ãlikin an kajjojo armej ajel̦o̦k mour eo an ñan Jeova, armej in ej oktaak ippãn enjel̦ rein renana. Eñin unin Paul ear make kile bwe ej aikuj rõjañ Kũrjin ro ilo Epesõs jilu alen bwe ren “jutak” pen im jab ebbeer.​—Epesõs 6:11, 13, 14.

9. (1) Etke Setan im enjel̦ ro an renana rej kõjerbal elõñ wãween ko retao ñan ko̦kkure kõj? (2) Ta ko jenaaj etali kiiõ ilo katak in?

⁹ Setan ej kõjerbal wãween ko retao. Paul ear rõjañ ri tõmak ro m̦õttan bwe ren jutak pen im jab po ilo kõm̦m̦an ko retao an Setan. (Epesõs 6:11) Naan kein an Paul rej kaalikkar bwe Setan im enjel̦ ro an renana rej kõjerbal elõñl̦o̦k jãn juon wãween ko retao ñan aer ko̦kkure kõj. Im ewõr unin aer kõjerbal elõñl̦o̦k jãn juon wãween ko. Ñan waanjoñak, jet Kũrjin rar lukkuun jutak pen im kate er ñe rej iioon juon apañ. Bõtab, el̦ak wal̦o̦k bar juon kain apañ, em̦õkaj aer ebbeer. Kõn men in, Setan im enjel̦ ro an renana rej lale im etale kõj kajjojo bwe ren jel̦ã kõn m̦õjn̦o̦ ko ad. Innem, rej kõjerbal m̦õjn̦o̦ kein ad ñan ko̦kkure kõtaan eo ad ippãn Jeova. Bõtab, el̦ap ad m̦õn̦õn̦õ kõnke em̦õj an Baibõl̦ eo kakkõl kõj kadede kõn elõñ iaan wãween kein retao me Tepil̦ eo ej kõjerbali. (2 Korint 2:11, UBS) Ãinwõt ad kar katak l̦o̦k im̦aan ilo bok in, jet iaan wãween kein rej arõk m̦weiuk, kõm̦m̦ao ko renana, im mour in l̦õñ. Jen kiiõ bar etale jet iaan wãween ko retao me Setan ej kõjerbali ñan ko̦kkure kõj. Men kein rej anijnij, kajjetõbtõb, ekkõpãl, jal̦jal̦, im men ko ãierl̦o̦kwõt.

RO REJ ANIJNIJ REJJAB TILJEK ÑAN JEOVA

10. (1) Ta ko enjel̦ ro renana rej kõjerbali ñan aer ko̦kkure kõj? (2) Ta l̦õmn̦ak eo an Jeova kõn anijnij, kajjetõbtõb im men ko ãierl̦o̦kwõt? (3) Ta l̦õmn̦ak eo am̦ kõn men kein?

¹⁰ Ñe juon ej anijnij ak kajjetõbtõb, armej in ej kajjioñ in tõpar ak kajjitõk jipañ jãn jetõb ro renana. Bar jet wãween ko me armej rej kõm̦m̦ane men in ej ilo aer bubu, ekkõpãl, jal̦jal̦, kaulibobo, ekkõnak kein karwaan ak kõjparok im men ko ãierl̦o̦kwõt. El̦ap ad jel̦ã bwe Jeova elukkuun “jõjõik” aolep men kein. (Duteronomi 18:10-12; Revelesõn 21:8) Kõnke jej bar aikuj “jõjõik” men ko renana, jeban kõm̦m̦ani jabdewõt men ko me rej ekkejell̦o̦k ippãn jetõb ro renana. (Rom 12:9) El̦aññe jenaaj kõm̦m̦ane jabdewõt iaan men kein, enaaj lukkuun alikkar bwe jej ilo̦k jãn Jemeduij ilañ, Jeova, im jejjab kõn̦aan tiljek ñan e!

11. Etke enaaj l̦ap an Setan m̦õn̦õn̦õ el̦aññe jej bõk kun̦aad ilo anijnij, kajjetõbtõb im men ko ãierl̦o̦kwõt? Jouj im kwal̦o̦k juon waanjoñak.

¹¹ Meñe jemaroñ ba bwe jidik wõt ad anijnij ak kajjetõbtõb, men in ej kaalikkar wõt bwe jejjab tiljek ñan Jeova. Setan ejel̦ã kõn men in. Eñin unin enaaj kate joñan wõt an maroñ bwe jen kõm̦m̦ani men kein renana, meñe jidik wõt. El̦aññe juon iaan armej ro an Anij rej bõk kun̦aaer ilo jabdewõt iaan men kein, Setan ej lukkuun m̦õn̦õn̦õ kõnke etõprak kõn̦aan eo an. Etke jejaam̦ ba men in? Eokwe, jen lale juon waanjoñak. Jen ba bwe ruo aelõñ rej tarin̦aek doon. Juon raan, juon iaan ri tarin̦ae ro ear ilo̦k jãn jarin tarin̦ae eo an im kobal̦o̦k ippãn jarin tarin̦ae eo an aelõñ eo juon. Jejel̦ã bwe enaaj l̦ap an m̦õn̦õn̦õ ri tõl eo ilo jarin tarin̦ae eo an aelõñ in. Kõn men in, ri tõl in enaaj kakitõtõik ri tõl eo juon kõnke em̦õj an juon iaan ri tarin̦ae ro an ilo̦k jãn e. Ta eo jemaroñ katak jãn waanjoñak in? El̦aññe jej bõk kun̦aad ilo anijnij, kajjetõbtõb, im men ko ãierl̦o̦kwõt, jej ilo̦k jãn Jeova im kobal̦o̦k ippãn Setan. Setan enaaj lukkuun m̦õn̦õn̦õ im enaaj kõjerbale kõj ñan an kaillu Jeova. Jejjab kõn̦aan bwe en wal̦o̦k men in. Jeban ãindein kõnke jekõn̦aan tiljek wõt ñan Jeova.

SETAN EJ KÕJERBAL KAJJITÕK KO BWE JEN PERE ANIJ

12. Ta wãween eo Setan ej kõjerbale bwe en pok ad l̦õmn̦ak kõn anijnij, kajjetõbtõb im men ko ãierl̦o̦kwõt?

¹² Setan eban lo tõprak toõn wõt ad jõjõik anijnij, kajjetõbtõb im men ko ãierl̦o̦kwõt. Bõtab, enaaj kate im kajjioñ kõm̦m̦an bwe en oktak wãween ad l̦õmn̦ak. Ewi wãween? Eokwe, ej kajjioñ kapok armej ro doon Anij ñan “likũt men ko renana bwe rem̦m̦an, im men ko rem̦m̦an bwe renana.” (Aiseia 5:20, UBS) Ta eo ej kõm̦m̦ane ñan kapok kõj? Eokwe, ej kõjerbal kajjitõk ko bwe jen jino ad pere men ko Anij ekõn̦aan bwe jen kõm̦m̦ani. Eñin ej juon iaan wãween ko retao me eto an Setan kõjerbale.

13. Ilo kar iien ko etto, ewi wãween an kar Setan kõjerbal naan ko ñan kõm̦m̦an bwe en wõr pere?

¹³ Jen lale wãween an kar Setan kõjerbale men in etao ilo kar iien ko etto. Ilo kar jikin kallib in Iden, ear kajjitõk ippãn Iv: “Em̦ool ke Anij ear ba, ‘Kom̦win jab m̦õñã jãn wõjke otemjej ilo jikin kallib eo’?” Ilo kar tõre ko an Job, Setan ear bar kwal̦o̦k juon kajjitõk ke enjel̦ ro rar kweilo̦k ilañ. Ear ba: “Ejjel̦o̦k unin an Job mijak Anij ke?” Im ilo kar jinoin an kar Jijej kwal̦o̦k naan ilo lal̦ in, Setan ear mãlejjoñe Jijej im ba: “El̦aññe Nejin Anij kwe, Kwõn jiroñ dekã kein bwe ren erom pilawã.” Baj l̦õmn̦ak m̦õk, unin an kar Setan ba naan kein ñan Jijej ej kõnke ear kõn̦aan kajjirere kõn an kar Jeova ba, “E in Nejũ jitõnbõro ippa, Ij m̦õn̦õn̦õ kake.”​—Jenesis 3:1; Job 1:9; Matu 3:17; 4:3.

14. (1) Tepil̦ eo ej bar kajjioñ m̦on̦e kõj bwe en bõd wãween ad l̦õmn̦ak kõn men ko me ewõr anijnij im kajjetõbtõb ie. Ewi wãween? (2) Ta men ko ruo im jenaaj etali kiiõ?

¹⁴ Rainin, Tepil̦ eo ej bar kajjioñ m̦on̦e kõj bwe en bõd wãween ad l̦õmn̦ak kõn men ko me ewõr anijnij im kajjetõbtõb ie. Ewi wãween? Ilo an kõm̦m̦an bwe armej ro doon Anij ren jino aer pere. Ej kõm̦m̦an bwe ren jino aer l̦õmn̦ak bwe ewõr jet m̦antin anijnij im kajjetõbtõb ko me rejjab lukkuun nana. Ñe ej jino wal̦o̦k l̦õmn̦ak rot kein, ej ãinwõt ñe armej rein rej ba, ‘Ejjel̦o̦k jorrããn ilo men kein.’ (2 Korint 11:3, UBS) Ta ko jemaroñ kõm̦m̦ani ñan jipañ armej rein bwe ren kajim̦we l̦õmn̦ak kein aer? Ta ko jemaroñ kõm̦m̦ani bwe Setan en jab tõlpiloik kõj im ukot wãween ad l̦õmn̦ak? Ñan uwaake kajjitõk kein, jen etale ruo men ko me eto an Setan kõjerbali me robrak kõn m̦antin anijnij im kajjetõbtõb. Ta kein? Kein kajuon, ej kõjerbal menin kam̦õn̦õn̦õ ko. Kein karuo, ej kõjerbal uno ko ak kilen kõm̦adm̦õde nañinmej ko.

SETAN EJ KÕJERBALE AIKUJ IM KÕN̦AAN KO AD ÑAN KO̦KKURE KÕJ

15. (1) Ta l̦õmn̦ak eo an armej ro ilo lal̦ ko rel̦l̦ap kõn anijnij, kajjetõbtõb im men ko ãierl̦o̦kwõt? (2) Ewi wãween jet Kũrjin rar jino bõk l̦õmn̦ak ko an armej in lal̦ in kõn anijnij im kajjetõbtõb?

¹⁵ Ilo lal̦ ko rel̦l̦ap, ekkã an armej ro l̦õmn̦ak bwe ejjel̦o̦k jorrããn ilo anijnij, kajjetõbtõb im men ko ãierl̦o̦kwõt. Ekkã aer ba bwe men kein rej men dikdik wõt. Etke? Kõnke el̦apl̦o̦k wõt an pija ko, bok ko, im mijjin ko kõm̦m̦an bwe armej ro ren l̦õmn̦ak bwe anijnij im kajjetõbtõb rej jet men ko relimo im ejjel̦o̦k jorrããn ie. Jet iaan pija kein im bok kein relukkuun buñbuñ ipel̦aakin lal̦ in. Em̦õj ke an jetõb rein renana lo tõprak ilo aer kõm̦m̦an bwe armej ren l̦õmn̦ak bwe ejjel̦o̦k jorrããn ilo men kein? Aet. Em̦õj ke an jet iaan armej ro doon Anij bõk l̦õmn̦ak in bwe ejjel̦o̦k jorrããn ilo jet iaan men kein? Aet. Ewi wãween? Eokwe, jouj im lale waanjoñak in. Juon iaan ro doon Anij ear alwõje juon pijain anijnij ak kajjetõbtõb. Ãlikin an armej in alwõje pija eo, ej ba ñan armej ro jet im ba: “Iar alwõje pija eo, bõtab ejjab mel̦el̦ein bwe iar anijnij ak kajjetõbtõb.” L̦õmn̦ak rot in elukkuun kauwõtata. Etke?

16. Etke ekauwõtata ñan riiti bok ko ak alwõji pijain anijnij im kajjetõbtõb ko?

¹⁶ Ewõr oktak ikõtaan juon eo me ej anijnij im kajjetõbtõb jãn juon eo me ej baj alwõji wõt men kein. Bõtab, jen jab l̦õmn̦ak bwe ejjab kauwõtata ñan baj alwõji wõt pijain anijnij ak kajjetõbtõb ko. Etke? Jouj im kõl̦mãnl̦o̦kjen̦ kõn men in. Baibõl̦ ej ba bwe ejjel̦o̦k an Setan im enjel̦ ro an maroñ ñan jel̦ã kõn l̦õmn̦ak ko ad.a Eñin unin rej lukkuun etale kõj im lale ta ko jej kõm̦m̦ani, ekoba men ko jej alwõji, roñjaki im riiti. Rej kõm̦m̦ane men in bwe ren jel̦ã kõn l̦õmn̦ak ko ad im kõn m̦õjn̦o̦ ko ad. Ñe armej ro doon Anij rej kaalikkar ilo kõm̦m̦an ko aer bwe rej m̦õn̦õn̦õ kõn bok ak pijain anijnij, kajjetõbtõb ak men ko ãierl̦o̦kwõt, ej ãinwõt ñe rej kwal̦o̦k kõn er make im m̦õjn̦o̦ ko aer ñan jetõb rein renana. Innem, ñe jetõb rein renana rejel̦ã kõn men kein, renaaj kõjerbali ilo aer ire ippãn Kũrjin rein m̦ae iien eo armej rein relukkuun jorrããn. Jet iaan armej rein rej kiiõ anijnij im kajjetõbtõb itok wõt jãn aer kar riiti bok ko ak alwõji pijain anijnij ak kajjetõbtõb ko.​—Galetia 6:7, UBS.

17. Ta wãween eo etao Setan ej kõjerbale ñan ko̦kkure ro me renañinmej?

¹⁷ Setan ekõn̦aan kõjerbali menin kam̦õn̦õn̦õ ko im bar ãjmour ko ad ñan ko̦kkure kõj. Ewi wãween? Jen lale juon waanjoñak. Jen ba bwe juon Kũrjin elukkuun nañinmej im elõñ alen an etal ñan aujpitõl̦ im taktõ bõtab ejjañin em̦m̦anl̦o̦k an mour. Kõn men in, armej in ej jino an ebbeer im bũrom̦õj. (Mark 5:25, 26) Ak emaroñ jino an l̦õmn̦ak bwe unin an nañinmej ej kõnke rar kõpãle ak ko̦kkure. El̦aññe armej in ej bõk l̦õmn̦ak im eñjake rot kein, Setan im enjel̦ ro an renana rejel̦ã bwe eñin ej juon iien em̦m̦an ñan aer kapo armej in. Setan im enjel̦ rein an rejel̦ã bwe Baibõl̦ ej kakkõl armej ro im ba: “Kom̦win jab m̦adm̦õd ak anijnij.” (Livitikõs 19:26) Jetõb rein renana rekõn̦aan bwe armej in en kõjekdo̦o̦n naan in kakkõl in. Kõn men in, remaroñ kajjioñ kapoiki bwe en ilo̦k ñan ippãn juon ri uno ak bõk kilen kõm̦adm̦õd ko me ewõr m̦antin anijnij im kajjetõbtõb ie. El̦aññe armej in enaaj po, eokwe emaroñ jorrããnl̦o̦k kõtaan eo an ippãn Anij. Ewi wãween?

18. (1) Ta uno ko ak kilen kõm̦adm̦õd ko me Kũrjin ro rem̦ool rej aikuj kõjparok er jãni? (2) Etke jej aikuj kõjparok kõj jãn men kein?

¹⁸ Jeova ej kakkõl ro im rej rupi kien ko an: “El̦aññe kwõjjab pokaki kien ko an Anij, innem enaaj kitõtõik jar ko am̦.” (Jabõn Kõnnaan 28:9, UBS) Jej aikuj kate kõj bwe ejjel̦o̦k juon men en kõm̦m̦an menin an Jeova jab roñjake jar ko ad im dikl̦o̦k an jipañ kõj. Im el̦aññe jej nañinmej, iien ko kein me jelukkuun aikuji Jeova bwe en jipañ kõj. (Sam 41:3) Eñin unin jej aikuj kajjitõk ippãd make: Ri uno in ej ke juon eo me ekkã an anijnij ak kajjetõbtõb? Uno kein an ak kein kõm̦adm̦õd in rej ke itok jãn l̦õmn̦ak eo bwe unin aõ nañinmej ej kõn aõ kar kaillu jitũbõn ro nukũ me rar mej? Ri uno in ej ke tõmak bwe unin aõ nañinmej ej kõnke rar kõpãle eõ ak ko̦kkure eõ? Ri uno in ej ke kõm̦m̦an menin katok ko, ak m̦antin anijnij ko jet ñe ej kõpooje ak kõjerbale uno eo? El̦aññe kwõjel̦ã ak kwõj kile bwe ewõr m̦antin anijnij ak kajjetõbtõb ilo jabdewõt iaan uno kein ak kilen kõm̦adm̦õd nañinmej eo, kwõn jab kõjerbali ak bõk kun̦aam ie ñan jidik.b (Matu 6:13) Ñe jenaaj kõjparok kõj jãn men kein, Jeova enaaj jipañ kõj.​—Jouj im lale bo̦o̦k eo etan “Ewõr Ke M̦antin Anijnij ak Kajjetõbtõb ilo Men In?”

BWEBWENATO KO REKABWINMAKEKE

19. (1) Ta eo em̦õj an Setan m̦on̦e elõñ armej bwe ren tõmake kõn joñan kajoor eo an? (2) Kain bwebwenato rot ko me armej ro doon Jeova rej kõjparok er jãni?

¹⁹ Ilo jet lal̦ ko rel̦l̦ap, elõñ armej ro rejjab kile ak tõmak bwe ewõr an Setan maroñ ñan ko̦kkure er. Bõtab, ejjab ãindein wãween an armej ro l̦õmn̦ak ilo aelõñ ko jet. Ilo aelõñ kein, em̦õj an Tepil̦ eo m̦on̦e elõñ armej bwe ren tõmak bwe elukkuun kajoor. Bõtab, rejaje ke ewõr joñan maroñ ko an Setan. Joñan an jet armej mijak jetõb ro renana, rej abwinmake raan im boñ. Elõñ wõt im lõñ bwebwenato ko rekaabwinmakeke kõn jetõb ro renana. Im joñan an em̦m̦an an armej ro bwebwenato kaki men kein, ro jet relukkuun bwilõñ im l̦o̦kjenaer. Ekkar ke bwe jen kõnono kake bwebwenato rot kein? Ejjab! Etke? Ewõr ruo un ko raorõk unin an armej ro doon Jeova jab kajeededi bwebwenato rot kein.

20. Ewi wãween jet armej rej kajeeded riab ko an Setan meñe remaroñ jab make kile?

²⁰ M̦oktata, ñe juon ej kajeeded bwebwenato ko kõn kõm̦m̦an ko an jetõb ro renana, eokwe armej in ej jipañ Setan. Ewi wãween? Baibõl̦ ej ba bwe ewõr an Setan maroñ ñan kõm̦m̦ani menin bwilõñ ko. Bõtab, Baibõl̦ ej bar kakkõl kõj bwe Setan ej kõjerbal “kakõl̦l̦e ko, im menin bwilõñ ko reriab.” (2 Tessalonika 2:9, 10) Setan ejel̦ã kilen m̦on̦e armej ro me rej itoklimo kõn anijnij im kajjetõbtõb kab men ko ãierl̦o̦kwõt. Ebar jel̦ã kõm̦m̦an bwe armej rein ren tõmake men ko rejjab m̦ool. Etke? Kõnke e eo me etao tata ijoko otemjej. Joñan an armej rein tõmaki men ko me rar loi ak roñ kaki, eokwe rej bwebwenato kaki ñan ro jet ãinwõt ñe rar lukkuun wal̦o̦k. Im ñe armej ro jet rej kwal̦o̦ki bwebwenato kein ñan bar ro jet, ej jino an oktakl̦o̦k im l̦apl̦o̦k bwebwenato kein. El̦aññe juon Kũrjin ej kajeeded bwebwenato rot kein, ej ãinwõt ñe ej jipañ Tepil̦, eo me ej “jemen riab.” Armej in ej kajeedede bwebwenato im mel̦el̦e kein reriab an Setan.​—Jon 8:44; 2 Timote 2:16.

21. Ta ko jej aikuj kate kõj im bwebwenato wõt kaki?

²¹ Kein karuo, meñe juon Kũrjin ear iioone apañ ko kõn jetõb ro renana ilo kar m̦okta, eban kõnono kaki men kein ñan ri tõmak ro jet. Etke? Kõnke Baibõl̦ ej kakkõl kõj bwe jen “kalimjek wõt Jijej” Ri Tõl eo ad, im eo ej jipañ kõj bwe en kajoor tõmak ko ad. (Hibru 12:2, UBS) Jej aikuj “kalimjek wõt” ak kõl̦mãnl̦o̦kjen̦ wõt kõn jerbal ko me Jijej ear kõm̦m̦ani. Jen jab jol̦o̦k iien ko ad im bwebwenato kõn jerbal ko an Setan. Ke Jijej ear pãd ioon lal̦ in, ear jab bwebwenato ñan rũkal̦oor ro an kõn jetõb ro renana. Ear jab kwal̦o̦k bwebwenato rot kein meñe elukkuun jel̦ã ta ko Setan emaroñ kõm̦m̦ani im ta ko ejjel̦o̦k an Setan maroñ ñan kõm̦m̦ani. Jijej ear kõjerbal iien im maroñ ko an ñan kwal̦o̦k naan kõn ennaan eo em̦m̦an kõn Aelõñ eo an Anij. Kõn men in, jen l̦oore joñak eo an Jijej im rijjelõk ro an. Jen kate kõj ñan bwebwenato wõt kõn jerbal ko “rel̦l̦ap an Anij.”​—Jerbal 2:11; Luk 8:1; Rom 1:12, UBS.

22. Ta eo jemaroñ wõnm̦aanl̦o̦k wõt im kõm̦m̦ane bwe aolep ro ilañ ren lañlõñ?

²² Setan ekõn̦aan ko̦kkure jem̦jerã eo ad ippãn Jeova. Bwe en maroñ tõprak kõn̦aan in an, ej kõjerbal elõñ wãween ko retao. Jet iaan wãween kein me Setan ej kõjerbali ej anijnij, kajjetõbtõb, ekkõpãl, jal̦jal̦ im men ko ãierl̦o̦kwõt. Em̦õj ad peek ilo bũruod bwe jeban bõk kun̦aad ilo jabdewõt men ak wãween ko me ewõr anijnij im kajjetõbtõb ie. Jen kate kõj bwe Setan en jab kapo kõj im kõm̦m̦an bwe jen kõjekdo̦o̦ne pepe in ad. Ewi wãween jemaroñ kõm̦m̦ane men in? Ilo ad jõjõiki men ko renana im kate wõt kõj joñan wõt ad maroñ ñan kõm̦m̦ani men ko rem̦m̦an. (Epesõs 4:27) El̦aññe jenaaj wõnm̦aanl̦o̦k wõt im “jutak im jum̦ae etao ko an Tepil̦,” enaaj lukkuun l̦ap an aolep ro ilañ lañlõñ. Kõn men in, jen wõnm̦aanl̦o̦k wõt im jum̦ae Setan m̦ae iien eo enaaj jako.​—Epesõs 6:11, UBS.