Mel̦el̦e ko jãn Baibõl̦ kõn Jepel

Jeova ej kõtmãne bwe ri m̦are ro ren tiljek ñan doon ãinwõt aer kar kallim̦ur. Ke Jeova ear kõm̦areik em̦m̦aan im kõrã eo m̦oktata, ear ba: “L̦eo enaaj . . . eddãp n̦a ippãn lio pãleen; im erro naaj juon wõt kanniõk.” Tokãlik, Jijej ear bar ãliji mel̦el̦e in ke ear ba: “Men eo Anij ear kobaik, armej en jab kõjepele.” (Jenesis 2:24; Matu 19:3-6) Jeova im Jijej rej watõk pãd eo an ri pãlele ro ãinwõt juon bujen ak kallim̦ur me eban rup, m̦ae iien juon iaerro emej. (1 Korint 7:39) Kõnke pãd eo an ri m̦are ro ej juon karõk ekwõjarjar jãn Anij, jen jab bõk l̦õmn̦ak in bwe jepel ej juon men jidikdik. Ilo m̦ool, Jeova edike ñe armej ro rej jepel kõn un ko me rejjab pedped ioon Baibõl̦.​—Malakai 2:15, 16, UBS.

Ekkar ñan Baibõl̦, ta wãween ko wõt me ruo ri pãlele remaroñ jepel? Eokwe, Jeova elukkuun dike ñe juon ri pãlele ej bar ellolo ak l̦õñ. (Jenesis 39:9; 2 Samuel 11:26, 27; Sam 51:4) Joñan an Anij dike l̦õñ, ej kõtl̦o̦k an juon ri pãlele kõm̦m̦an an peba in jepel el̦aññe eo pãleen ear bar ellolo. (Ñan bõk mel̦el̦e ko rel̦l̦apl̦o̦k kõn ta mel̦el̦ein naan in l̦õñ, jouj im lale pãrokõrããp 7 ilo Katak 9.) Jeova ej lel̦o̦k maroñ eo ñan ri pãlele eo me ear tiljek wõt bwe en make kããlõt el̦aññe ekõn̦aan jepel jãn eo pãleen ak jab. (Matu 19:9) Kõn men in, el̦aññe ri pãlele in ej pepe in jepel jãn eo pãleen, eokwe Jeova ejjab dike pepe in an. Bõtab, ej aikuj keememej bwe doulul in an Anij eban rõjañ jabdewõt armej bwe ren jepel. Ilo m̦ool, jet iien ri pãlele ro rej kõn̦aan pãd wõt ippãn eo pãleer meñe armej in pãleer ear l̦õñ el̦aññe rej kile bwe armej in pãleer ej lukkuun m̦ool ilo an jol̦o̦k an bõd. Bõtab, armej in me ejjel̦o̦k ruõn ej aikuj make kõm̦m̦ane pepe eo an im ej aikuj pojak ñan jabdewõt men ko me remaroñ wal̦o̦k itok wõt jãn pepe in an.​—Galetia 6:5.

Ñe ej wal̦o̦k jet kain apañ ko me rel̦l̦ap im ejeja aer wal̦o̦k, jet Kũrjin rej pepe in ilo̦k jãn eo pãleer ak kõm̦m̦an aer peba in jepel meñe eo pãleer ear jab l̦õñ. Ñe ej wal̦o̦k wãween rot in, Baibõl̦ ej ba bwe eo me ear ilo̦k ak jepel jãn eo pãleen ej aikuj “pãd make iaan, ak bar juon, en jepl̦aak ñan l̦eo pãleen.” (1 Korint 7:11, UBS) Kũrjin in ejjab maroñ kappok bar juon pãleen. (Matu 5:32, UBS) Jen etale jilu wãween ko me rar kõm̦m̦an bwe jet Kũrjin ren pepe in ilo̦k jãn eo pãleer ak kanne aer peba in jepel. Bõtab, kõnke eo pãleer ear jab l̦õñ, Kũrjin rein rejjab maroñ bar kappok pãleer.

Un eo kein kajuon jet rar pepe in jepel ej kõnke eo pãleer ejjab kõn̦aan kabwe aikuj ko an baam̦le eo. Jet iien, baam̦le ko rej lukkuun jeram̦õl im jerata kõnke jemen baam̦le eo ejjab kabwe aikuj ko aer, meñe ewõr an maroñ ñan kõm̦m̦ane men in. Baibõl̦ ej ba: “El̦aññe jabdewõt ejjab kabwe aikuj ko an . . . ro ri lowaan m̦weo im̦õn, ear kariab an tõmak im ej nana jãn ri jab tõmak.” (1 Timote 5:8) El̦aññe em̦m̦aan in ejjab kõn̦aan oktak jãn kõm̦m̦an kein an, kõrã eo ej aikuj make lale el̦aññe ekkar bwe en ilo̦k jãne ak kanne an peba in jepel bwe en maroñ kõjparok mour eo an im ajri ro nejin. Bõtab ekkar ñan Baibõl̦ eo, kõrã in ejjab maroñ bar kappok pãleen. Em̦m̦aan ro rej lale eklejia eo rej aikuj jijet ippãn juon Kũrjin ñe ejjab kõn̦aan kabwe aikuj ko an baam̦le eo an. El̦aññe juon ej m̦akoko in kabwe aikuj ko an eo pãleen ak ajri ro nejin, eokwe emaroñ bukwel̦o̦k.

Un eo kein karuo jet rar pepe in jepel ej kõnke eo pãleer ej m̦ane er im elukkuun lãj. Joñan an jet ri pãlele lukkuun kaamijak im lãj, rej kajorrããn ãjmour eo an eo pãleer ak likũt mour eo an eo pãleer ilo kauwõtata. El̦aññe ri pãlele in me elãj ej juon Kũrjin, em̦m̦aan ro rej lale eklejia eo rej aikuj jijet ippãn. El̦aññe juon ej m̦ane ak emminene in lãj ñan eo pãleen, eokwe emaroñ bukwel̦o̦k.​—Galetia 5:19-21.

Un eo kein kajilu jet rar pepe in jepel ej kõnke eo pãleer ej kajjioñ ko̦kkure aer karejar ñan Anij. Jet iien, ri pãlele ro rej kõm̦m̦an bwe en lukkuun pen an eo pãleer karejar ñan Jeova. Jet iien, rej iuuni eo pãleer ñan rupi kien ko an Anij. El̦aññe ri pãlele ro rej iioon wãween in, bõlen remaroñ pepe bwe wãween eo wõt remaroñ “pokake Anij el̦ap jãn armej” ej ilo aer ilo̦k jãn eo pãleer ak kõm̦m̦an aer peba in jepel.​—Jerbal 5:29.

Ilo aolep kar wãween kein jilu me jaar etali, ejjel̦o̦k juon ej aikuj iuuni ri pãlele eo ejjel̦o̦k ruõn bwe en jepel ak pãd wõt ippãn eo pãleen. Meñe em̦m̦aan ro me rej lale eklejia eo ak ro jet me ekajoor tõmak eo aer rej kajjioñ lel̦o̦k naan in kakapilõk ko jãn Baibõl̦, armej rein aolep rejjab jel̦ã kõn aolep tipdikin men ko me rej wal̦o̦k ikõtaan l̦eo im kõrã eo pãleen. Jeova wõt ejel̦ã kõn men kein. Ñe juon Kũrjin ej kõl̦l̦apl̦ap kõn apañ ko an ippãn eo pãleen kõnke ejjab kõn̦aan jokwe ippãn, eokwe Anij ejjab buñbũruon kake men in. Jeova ejel̦ã el̦aññe juon armej ej riab ak etao bwe en maroñ jepel. Anij ejel̦ã kõn men kein meñe armej eo emaroñ kajjioñ n̦ooji. Aet, men otemjej “rej wal̦o̦k im alikkar im̦aan mejãn; im jenaaj kwal̦o̦k wãween aolepen ad mour ñane.” (Hibru 4:13, UBS) Bõtab, el̦aññe Kũrjin in ej iioone wãween kein rekauwõtata jãn eo pãleen im eto aer wal̦o̦k, eokwe ro jet ren jab ekajete Kũrjin in. Ren jab ekajete Kũrjin in kõn pepe eo an ñan ilo̦k jãn eo pãleen ak kõm̦m̦an an peba in jepel kõnke elõñ men ko ear kõm̦m̦ani ñan kakõm̦anm̦anl̦o̦k pãd eo aerro, bõtab ear jab lo tõprak. Jej aikuj keememej bwe kõj aolep “jenaaj jutak im̦aan tũroon in ekajet an Anij.”​—Rom 14:10-12.