Ta Jerbal ko an Em̦m̦aan ro me Rej Lale Eklejia?

Ejjel̦o̦k amim ri kaki im ejjel̦o̦k juon ej kõl̦l̦ã ilo doulul in am. Bõtab, ãinwõt kar iien ko an Kũrjin ro etto, em̦õj jitõñ jet em̦m̦aan ro bwe ren “jabõt ñan eklejia eo an Anij.” (Jerbal 20:28, UBS) Em̦m̦aan rein relukkuun epaake Jeova im rej lale im jipañ eklejia eo ‘jab ilo m̦akoko, ak kõn aer kõn̦aan, ekkar ñan ankilaan Anij; jab kõn on̦ean tal̦a, ak kõn aer kõn̦aan jipañ.’ (1 Piter 5:1-3) Ta jerbal ko em̦m̦aan rein rej kõm̦m̦ani ñan jipañ kõj?

Rej lale kõj im kõjparok kõj. Em̦m̦aan rein rej letok naan in tõl ko jãn Baibõl̦ im jipañ eklejia eo bwe ren epaake wõt Jeova. Em̦m̦aan rein rejel̦ã bwe Anij ear lel̦o̦k ñan er eddo kein. Rejjab irooj ioon armej ro doon Anij. Rej jipañ kõj bwe jen jab jorrããn im jen m̦õn̦õn̦õ. (2 Korint 1:24, UBS) Juon jabõt ej lukkuun lale aolep jiip ko nejin. Ãindeinl̦o̦k wõt, em̦m̦aan rein rej kate er bwe ren jel̦ã kajjien aolep ro ilo eklejia eo.​—Jabõn Kõnnaan 27:23.

Rej katakin kõj kilen ad maroñ kõm̦m̦ani men ko Anij ekõn̦aan. Kajjojo wiik, em̦m̦aan rein rej tõl ilo kweilo̦k ko an eklejia eo bwe en maroñ kajoorl̦o̦k tõmak ko ad. (Jerbal 15:32, UBS) Em̦m̦aan rein retiljek rej bar tõl ilo jerbal in kwal̦o̦k naan, im rej jerbal ippãd im katakin kõj kilen kwal̦o̦k naan ilo elõñ wãween ko.

Rej kõm̦m̦an aer iien ippãd ñan kakajoor kõj. Em̦m̦aan ro me rej lale eklejia eo rekõn̦aan jipañ kõj kajjojo bwe kõmin epaakel̦o̦k Jeova. Eñin unin jet iien rej lotok kõj ilo m̦oko im̦õd ak bwebwenato ippãd ilo Im̦õn Kweilo̦k eo. Ñe rej kõm̦m̦ane men in, rej kõjerbal eoon ko ilo Baibõl̦ ñan jipañ im kaenõm̦m̦an kõj.​—Jemes 5:14, 15.

Ebar lõñ eddo ko an em̦m̦aan rein. Enañin aoleper ewõr aer jerbal. Rej aikuj kabwe aikuj ko an kõrã eo im ajri ro nejier im bar kõm̦m̦an aer iien ippãer. Elukkuun l̦ap an em̦m̦aan rein poub. Jej aikuj kwal̦o̦k ad kautiej ñan er.​—1 Tessalonika 5:12, 13, UBS.

• Ta eddo ko an em̦m̦aan ro me rej lale eklejia eo?

• Etke jejel̦ã bwe em̦m̦aan ro me rej lale eklejia rekõn̦aan jel̦ã kajjied im rekõn̦aan jipañ kõj?