Ta Eo Enaaj Wal̦o̦k ñan Kabuñ Ko?

1. Aolep kabuñ ko rem̦m̦an ke?

Elõñ armej ro rem̦m̦an im em̦ool bũrueer ilo aolep kabuñ ko. Anij ej lo armej rein im ej yokwe er. Men in ej juon ennaan em̦m̦an. Bõtab, ekabũrom̦õjm̦õj bwe elukkuun lõñ men ko renana rej wal̦o̦k ilo lal̦ in kõn wõt kabuñ ko. (2 Korint 4:3, 4, UBS; 11:13-15, UBS) Ekkar ñan nuuj ko jãn ipel̦aakin lal̦ in, jet kabuñ ko rej jipañ ri nana ro m̦ane armej ro ejjel̦o̦k rueer. Bar jet kabuñ relukkuun dike armej ro jãn jet aelõñ ak bwij im rej bõk kun̦aaer im kajjioñ m̦ane aolep armej rein. Elõñ kabuñ ko rej bõk kun̦aaer ilo tarin̦ae im bar jet elukkuun nana aer kõm̦m̦an ñan ajri ro. Men kein aolep rej kainepataik im kabũrom̦õj aolep armej ro rem̦m̦an me rej tõmak ilo Anij!​—Riit Matu 24:3-5, 11, 12, UBS.

Kabuñ eo em̦ool ej bõktok nõbar ñan Anij. Kabuñ ko reriab rejjab kam̦õn̦õn̦õik Anij. Rej kwal̦o̦k katak ko me rejjab itok jãn Baibõl̦ eo. Ñan waanjoñak, rej kwal̦o̦k katak ko rejjab m̦ool kõn Anij im kõn ro remej. Bõtab, Jeova ekõn̦aan bwe armej ro ren jel̦ã m̦ool eo kõn E.​—Riit Ekklisiastis 9:5, 6, 10; 1 Timote 2:3-5.

2. Ta eo enaaj wal̦o̦k ñan kabuñ ko?

Anij ej loe an kabuñ ko etao im ba bwe rej yokwe e, bõtab ilo m̦ool rej yokwe lal̦ in an Setan. (Jemes 4:4) Baibõl̦ eo ej n̦aetan aolep kabuñ ko reriab “Babilon El̦ap.” Etke? Kõnke eñin ej etan jikin eo me kabuñ ko reriab rar jebar im wal̦o̦ktok jãn e ãlikin kar Ibwijleplep eo ilo raan ko an Noa. M̦õttan jidik Anij enaaj jol̦o̦k aolep kabuñ ko reriab me rej tõlpiloik im ko̦kkure armej ro.​—Riit Revelesõn 17:1, 2, 5, 16, 17; 18:8.

Bõtab, Jeova eban mel̦o̦kl̦o̦k armej ro rem̦m̦an im em̦ool bũrueer me rej pãd ilo kabuñ ko reriab ipel̦aakin lal̦ in. Anij ej kadiwõjl̦o̦k armej rein jãn kabuñ ko reriab ilo an katakin er kõn katak ko rem̦ool.​—Riit Maika 4:2, 5.

3. Ta ko armej ro em̦ool bũrueer rej aikuj kõm̦m̦ani?

Jeova ej yokwe armej ro me rekõn̦aan kõm̦m̦ani men ko rejim̦we im rekõn̦aan jel̦ã m̦ool eo. Ej akwel̦ap ñan armej rein bwe ren ilo̦k jãn kabuñ ko reriab. Armej ro me rej yokwe Anij rej m̦õn̦õn̦õ in kõm̦m̦an oktak ko ilo mour ko aer bwe ren maroñ kabuñbũruon Anij.​—Riit Revelesõn 18:4.

Ilo kar iien ko etto, ke jet armej ro me em̦ool bũrueer rar roñ ennaan eo em̦m̦an jãn rijjelõk ro, armej rein rar lukkuun m̦õn̦õn̦õ. Jeova ear katakin er kõn juon wãween mour eoktak im ear katakin er kilen aer maroñ m̦õn̦õn̦õ ilo mour ko aer. Ear bareinwõt katakin er bwe ewõr tokjãn aer mour im bwe ewõr juon jeraam̦m̦an me remaroñ bõke. Armej rein rej juon joñak em̦m̦an ñan kõj rainin kõnke rar roñjake ennaan eo em̦m̦an im rar likũt Jeova m̦oktata ilo mour ko aer.​—Riit 1 Tessalonika 1:8, 9; 2:13.

Jeova ej karwaineneik armej ro ñan baam̦le eo an el̦aññe rej diwõjl̦o̦k jãn kabuñ ko reriab. El̦aññe kwõj m̦õn̦õn̦õ in eo̦roñ kũr in an Jeova, kwõnaaj erom jeran. Kwõnaaj m̦õttan baam̦le eo el̦ap an Jeova me el̦ap yokwe ippãer. Bareinwõt, kwõmaroñ bõk jeraam̦m̦an eo ñan mour indeeo.​—Riit Mark 10:29, 30; 2 Korint 6:17, 18.

4. Ta eo Anij enaaj kõm̦m̦ane bwe aolep armej ro ioon lal̦ in ren m̦õn̦õn̦õ?

Jej m̦õn̦õn̦õ bwe m̦õttan jidik kabuñ ko reriab renaaj jako. Kabuñ kein renana reban bar kaeñtaan armej ro. Ejjel̦o̦k bar juon kabuñ eriab enaaj bar tõlpiloik im kõjepel armej ro. Aolep armej ro me renaaj mour renaaj bõrokuk ippãn doon ilo aer kabuñ ñan Anij eo em̦ool.​—Riit Revelesõn 18:20, 21; 21:3, 4.