Rar Jeje kõn Jijej

Kwõj ke loe l̦õm̦arã ilo pija in?​— Etaer in Matu, Mark, Luk, Jon, Piter, Jemes, Jud, im Paul. Aolep l̦õm̦arein rar mour ilo raan ko an Jijej, im rar je bwebwenato ko kõn Jijej. Jen kal̦apl̦o̦k ad katak kõn er.

Ewõr jilu rijjilõk ro me rar jeje kõn Jijej, im rein rekar kwal̦o̦k naan ippãn Jijej. Kwõjel̦ã ke wõn rein?​— Ej Matu, Jon, im Piter. Ear l̦ap an Matu im Jon jel̦ã kajjien Jijej, im erro kar jeje kõn bwebwenatoun mour eo an. Rijjilõk Jon ear bar jeiki bok in Revelesõn im bok in Juon Jon, Ruo Jon, im Jilu Jon. Rijjilõk Piter ear je ruo bok ilo Baibõl̦, etan bok kein ej Juon Piter im Ruo Piter. Ilo bok in Ruo Piter, Piter ear jeje kõn iien eo me Jeova ear kõnnaan lal̦tak jãn lañ kõn Jijej im ba: ‘L̦addik eo nejũ in, im el̦ap aõ yokwe im m̦õn̦õn̦õ kake.’

L̦õm̦arein jet ilo pija in rar bar je elõñ men ko kõn Jijej me jemaroñ katak jãni. Juon iaaer ej Mark. Bõlen ear pãd ilo iien eo me rar kalbuuji Jijej im ear loi aolep men ko rar wal̦o̦k. Bar juon ej Luk, e kar juon taktõ im bõlen ear erom juon Kũrjin ãlikin an kar Jijej mej.

Bar ruo ri jeje Baibõl̦ me kwõj loe er ilo pija in ej l̦õm̦aro ruo jatin Jijej. Kwõjel̦ã ke etaer?​— Jemes im Jud. Kar m̦okta, l̦õm̦arein rar jab tõmak ilo Jijej. Rar bar l̦õmn̦ak bwe Jijej ebwebwe. Ak tokãlik, erro kar tõmak ilo Jijej im erom Kũrjin.

Ri jeje Baibõl̦ eo ãliktata me kwõj loe ilo pija in ej Paul. M̦okta jãn an kar erom Kũrjin, kar etan in Saul. Ekar lukkuun dike aolep Kũrjin ro im nana an kõm̦m̦an ñan er. Kwõjel̦ã ke ta eo ar kõm̦m̦an bwe Paul en erom Kũrjin?​— Juon raan, Paul ear etetal ilo juon ial̦, ej baj etetal wõt ak ekajju roñ juon ainikien ej kõnnaanl̦o̦k ñane jãn lañ. Ainikien kar Jijej eo! Im ear kajjitõk ippãn Paul im ba: ‘Etke enana am̦ kõm̦m̦an ñan armej ro rej tõmak ilo ña?’ Ãlikin iien in, Paul ear oktak im erom Kũrjin. Paul ear je 14 bok ko ilo Baibõl̦, jino jãn bok in Rom l̦o̦k ñan bok in Hibru.

Ejim̦we ke jej riiti Baibõl̦ eo aolep raan?​— Ilo ad riiti Baibõl̦ eo elõñ men ko jej katak kõn Jijej. Kokõn̦aan ke katak kõn Jijej?​—