KAJJITÕK 10
Elemen an Baibõl̦ Maroñ Jipañ Ña?
TA EO KWÕNÃJ KAR KÕM̦M̦ANE?
L̦õmn̦ak m̦õk kõn waanjoñak in: David ej etetal ñan juon bukwõn ak elukkuun marok im ejjab maroñ lo m̦aan. Im kõnke eboñ im emarok, ejaje ia eo epãd ie. Innem ej kile an jebwãbwe. Bõlen ebõd ial̦ eo ejeer ñane ke ej etetal ñan jikin eo ej etal ñane.
El̦aññe en kar kwe David, ta eo kwõnãj kar kõm̦m̦ane?
BÕJRAK IM L̦ÕMN̦AK!
Ewõr jet men ko kwõmaroñ kõm̦m̦ani:
Kajjitõk ippãn ro jet ewi wõt ial̦ eo ejim̦we.
Kõjerbal juon teeñki.
Wõnm̦aanl̦o̦k wõt im etetal kõnke kwõj tõmak bwe kwõnaaj baj lo wõt ial̦ eo ejim̦we.
Alikkar bwe Nõm̦ba 3 enãj jidik wõt an jipañ eok.
Im Nõm̦ba 2 el̦apl̦o̦k an naaj jipañ jãn Nõm̦ba 1. Unin ej kõnke teeñki eo enaaj pãdwõt ippam̦ jãn jinoin ñan jem̦l̦o̦kin ial̦ eo am, im enaaj jipañ rome ial̦ eo am̦ l̦o̦k ñan jikin eo kwõj etal ñane.
Baibõl̦ emaroñ jipañ kwe ilo ejja wãween in wõt!
Bok eo em̦m̦antata im l̦aptata an armej wiaiki emaroñ
tõl eok ñe ewõr bũraabl̦õm̦ ko kwõj iiooni
jipañ kwe ñan kal̦apl̦o̦k am̦ jel̦ã kõn kain armej rot kwe im bwe kwõn juon armej em̦m̦an
kwal̦o̦k ñan kwe kilen am̦ maroñ mour ilo wãween mour eo em̦m̦antata
UWAAKI KAJJITÕK KO KÕN MOUR
Jen ke jaar ajri, aolep iien ej wõr ad kajjitõk.
Ejaam̦ blue lañ?
Wõn ear kõm̦anm̦an iju ko?
Tokãlik jej jino ad kajjitõk kõn men ko rej wal̦o̦k ipel̦aakin lal̦ in.
Etke ej wal̦o̦k men ko renana?
Etke armej ro rej mej?
Ta el̦aññe uwaak ko ñan kajjitõk kein etto wõt ke rar pãd ilo Baibõl̦ eo?
Elõñ armej rej ba, Baibõl̦ eo ej juon bok in ino̦ñ bajjek, mel̦el̦e ko ie rej ñan rijem̦aan ro wõt, epen ñan mel̦el̦e kõn an lukkuun m̦wilal̦. Ak m̦ool ke bwe ãindein Baibõl̦, ejim̦we ke l̦õmn̦ak ko an armej kõn Baibõl̦?
Ñan Waanjoñak, armej rej l̦õmn̦ak bwe Baibõl̦ ej ba bwe lal̦ in ej pãd ium̦win pein Anij. Ak m̦ool ke men in? Elukkuun l̦ap poktak ilo lal̦ in. El̦ap bũrom̦õj im eñtaan, nañinmej im mej, jeram̦õl im jorrããn ko rel̦l̦ap. Ak m̦ool ke bwe juon Anij in yokwe ej kõm̦m̦an bwe men kein ren wal̦o̦k?
Kokõn̦aan ke jel̦ã uwaak eo ñan kajjitõk in? Kwõnãj lukkuun bwilõñ ñe kwõj loe jãn Baibõl̦ kõn wõn eo ej irooj in lal̦ in!
Kwõnaaj kile bwe mel̦el̦e ko ilowaan bok in rej pedped wõt ioon Baibõl̦ eo. Ri Kõnnaan ro an Jeova rej lukkuun tõmak bwe naan ko ilo Baibõl̦ rej naanin tõl ko rem̦ool im el̦ap tokjãer. Etke? Kõnke Baibõl̦ ej ‘letokin Jitũbõn Anij, im el̦ap tokjãn ñan katakin kõn m̦ool eo im ñan kauwe nana, im kajim̦we bõd ko.’ (2 Timote 3:16, 17, UBS) Jekdo̦o̦n ñe Baibõl̦ ej juon bokin etto, ak elukkuun jejjet ñan raan kein ad. Innem em̦m̦an kwõn riiti bok in!