Juon Menin Bwilõñ Ear Wal̦o̦k ilo Lom̦al̦o Ekilmir

Pero ear kõtl̦o̦k RiIsrael ro, ak ke ear roñ bwe em̦õj aer diwõjl̦o̦k jãn Ijipt, ear bar oktak l̦õmn̦ak eo an. Ear jiroñ rũttarin̦ae ro an im ba: ‘Kõpooji aolep jariot ko waad, im jen kõbel er! Jen kar jab kõtl̦o̦k aer etal.’ Innem e im rũttarin̦ae ro an rar kõbel RiIsrael ro.

Jeova ear kwal̦o̦k ial̦ eo ñan armej ro an ilo an kõjerbal juon kõdo̦ ilo raan im juon kijeek ilo boñ. Ear tõl er ñan Lom̦al̦o Ekilmir, innem ear jiroñ er bwe ren kajutak em̦ nuknuk ko aer.

Innem RiIsrael ro rar reilo̦k im lo an Pero im rũttarin̦ae ro an kõbel tok er. Kiiõ RiIsrael rein rar pãd ikõtaan RiIjipt ro im lom̦al̦o eo. Kõn aer kar mijak, rar ba ñan Moses: ‘Jenaaj mej! Kwõn kar likũt wõt kõm ilo Ijipt.’ Ak Moses ear ba ñan er: ‘Kom̦win jab mijak. Kom̦win kõttar wõt bwe kom̦ naaj lo wãween an Jeova lo̦mo̦o̦ren kõj.’ Kwõj ke kile an kar Moses lukkuun lõke Jeova?

Innem Jeova ear jiroñ RiIsrael ro bwe ren pojak in em̦m̦akũt. Ilo jo̦teen eo, ear kõm̦akũt kõdo̦ eo bwe en pãd ikõtaan RiIjipt ro im RiIsrael ro. Ijo RiIjipt ro rar pãd ie, ear marok. Ak ijo RiIsrael ro rar pãd ie, ear meram.

Innem Jeova ear jiroñ Moses bwe en erl̦o̦ke pein ioon lom̦al̦o eo. Im ke ear kõm̦m̦ane men in, Jeova ear kõm̦m̦an bwe en wal̦o̦k juon kõto el̦ap ilo aolepen boñõn eo. Innem lom̦al̦o eo ear jepel l̦o̦k ñan ruo m̦õttan, im ilo iol̦apl̦ap ear wõr juon ial̦ ejjel̦o̦k dãn ie im em̦õrã. Elukkuun kar lõñ RiIsrael ro rar etal ikõtaan dãn ko me rar jutak ãinwõt wõrwõr ko bwe ren tõpar ijo rãjet.

Rũttarin̦ae ro an Pero rar kõbele l̦o̦k RiIsrael ro ilo ial̦ eo ikõtaan dãn ko. Innem Jeova ear kõm̦m̦an bwe ren pok im wiwijet. Ear jino tũm̦ im jorrããn neen jariot ko waer. Innem rũttarin̦ae rein rar lam̦õj im ba: ‘Jen ko jãn ijin! Jeova ej tarin̦ae ñan er.’

Jeova ear jiroñ Moses im ba: ‘Kwõn erl̦o̦ke peim̦ ioon lom̦al̦o n̦e.’ Im ke ear kõm̦m̦ane men in, dãn ko rar m̦õkaj im buñut rũttarin̦ae ro an Ijipt. Innem Pero im aolep em̦m̦aan ro ippãn rar mej. Ejjel̦o̦k juon iaaer ear mour.

Ilo ijo turãjet, armej ro an Anij rar nõbare kõn juon al. Rar al im ba: ‘Al ñan Jeova, bwe em̦ool ekanooj utiej; kidia im riuwe ro ioer, Ear jol̦o̦k er n̦a ilo̦jet.’ Ke rej al, kõrã ro rar eb im kõjañi kein kõjañjañ ko nejier. Aolep rar lukkuun m̦õn̦õn̦õ kõnke kiiõ rar anemkwõj jãn Ijipt.