Joshua im RiGibeon Ro

Armej ro ilo aelõñ ko jet ilo Kenan rar roñ kõn ta eo ear wal̦o̦k ilo Jeriko. Kõn men in, kiiñ ro an aelõñ kein rar pepe in koba ippãn doon ñan aer tarin̦aeik RiIsrael ro. Ak RiGibeon ro rar kõm̦m̦ane juon pepe eoktak jãn er. Rar kõn̦ak nuknuk ko rem̦or im etal ñan ippãn Joshua, im rar ba ñane: ‘Kõmij itok jãn juon ãne ettol̦o̦k. Kõmar roñ kõn Anij eo ami, Jeova, im aolep men ko ear kõm̦m̦ani ñan kom̦ ilo Ijipt im Moab. Kallim̦ur bwe kom̦ ban ko̦kkure kõm, im kõm naaj ami rijerbal.’

Joshua ear tõmak er im ear ba bwe reban ko̦kkure er. Ak jilu raan tokãlik, ear roñ bwe l̦õm̦arein rar jab itok jãn juon ãne ettol̦o̦k. Ear roñ bwe rar itok jãn Kenan. Kõn men in, Joshua ear kajjitõk ippãer im ba: ‘Etke kom̦ar riabe kõm?’ Rar uwaake im ba: ‘Kõnke kõmar mijak! Kõm jel̦ã bwe Jeova ami Anij ej tarin̦ae ñan kom̦. Jouj im jab m̦an kõm.’ Joshua ear kajejjet kallim̦ur eo an ñan er im ear jab m̦an er.

Ejjabto tokãlik, kiiñ ro l̦alem an Kenan im rũttarin̦ae ro aer rar pojakin m̦an RiGibeon ro. Ak Joshua im rũttarin̦ae ro an rar m̦aaj ilo aolepen boñõn eo bwe ren maroñ lo̦mo̦o̦ren er. Ilo jimmarokin raan eo tok juon, rar jino tarin̦ae. RiKenan ro rar ko im jeplõklõk jãn doon. Ak Jeova ear ko̦wõtlo̦k dekã ko rekkillep jãn lañ im rar buñut er ilo aolep jikin ko rar ko ñani. Innem Joshua ear kajjitõk ippãn Jeova bwe en kabõjrake al̦ jãn an tulo̦k. Etke ear kajjitõk ippãn Jeova kõn men in me ejjañin kar wal̦o̦k m̦okta? Kõnke Joshua ear lõke im tõmak ilo Jeova. Kõn men in, al̦ ear pãd wõt im jab m̦akũtkũt ium̦win aolepen raan eo m̦ae iien RiIsrael ro rar anjo̦ ioon kiiñ ro an Kenan im rũttarin̦ae ro aer.