Kallim̦ur eo an Jepta

RiIsrael ro rar bar bõjrak jãn aer kabuñ ñan Jeova im jino kabuñ ñan anij ko rewaan. Anij kein rar jab jipañ er ñan jidik ke RiAmon ro rar tarin̦aeik er. Elõñ iiõ in an kar RiIsrael ro eñtaan. Kõn men in, rar ba ñan Jeova: ‘Kõmar jerawiwi. Jouj im lo̦mo̦o̦ren kõm jãn rũkõjdat ran̦.’ Innem rar jol̦o̦k ekjab ko aer im bar jino kabuñ ñan Jeova. Jeova ear jab kõn̦aan loe aer wõnm̦aanl̦o̦k im eñtaan.

Jepta ear juon rũttarin̦ae, im kar kããlõte e bwe en tõl RiIsrael ro ilo aer naaj tarin̦aeik RiAmon ro. Ear ba ñan Jeova: ‘El̦aññe kwõnaaj jipañ eõ bwe in bõk anjo̦ ilo tarin̦ae in, ij kallim̦ur bwe ñe inaaj ro̦o̦l ñan m̦weo im̦õ, inaaj ajewaj armej eo m̦oktata me enaaj diwõj nabõjtak ñan wõnm̦aik eõ.’ Jeova ear roñjake jar in an Jepta im ear jipañe ñan bõk anjo̦ ilo tarin̦ae eo.

Ke Jepta ear ro̦o̦l ñan m̦weo im̦õn, armej eo m̦oktata me ear wõnm̦aiki kar jiroñ eo ej make wõt nejin. Ke ej diwõj nabõjl̦o̦k, ej eb im kõjañe kein kõjañjañ eo nejin. Ta eo Jepta enaaj kar kõm̦m̦ane kiiõ? Ear keememeje kallim̦ur eo an im ear ba: ‘Nejũ! Em̦õj am̦ rupe bũruõ. Iar kõm̦m̦ane juon kallim̦ur ñan Jeova im ij aikuj kajejjete. Inaaj jilkinl̦o̦k eok ñan im̦õn kõppãd en̦ ilo Shailo bwe kwõn jerbal ie.’ Ak jiroñ in nejin ear ba ñan jemãn: ‘Baba, ñe em̦õj am̦ kõm̦m̦ane juon kallim̦ur ñan Jeova, eokwe kwõj aikuj kajejjete. Men in wõt, jouj im letok ruo allõñ bwe in etal ippãn lim̦aran̦ m̦õtta ñan ioon tol̦ kan̦. Ãlikin inaaj etal ñan im̦õn kõppãd en̦.’ Jiroñ in nejin Jepta ear tiljek im jerbal ilo im̦õn kõppãd eo toon wõt an mour. Kajjojo iiõ lim̦aro m̦õttan rar jam̦bol̦o̦k ñan ippãn ilo Shailo.