Jihoiada Ear Kwal̦o̦k An Peran

Atalaia ear juon kõrã enana ãinwõt Jezebel, lio jinen. Ear m̦are im pãleek kiiñ eo an Juda. Ke ear mej kiiñ in pãleen, l̦adik eo nejierro ear kiiñ ioon ãneo. Ak ke ear mej l̦adik in nejierro, Atalaia ear kairooj e make ioon aelõñin Juda. Innem ear kajjioñ jol̦o̦k aolep ro rar itok jãn baam̦le eo an kiiñ eo kõnke ear jab kõn̦aan bwe jabdewõt iaaer en bõk jikin im irooj ioon ãneo. Joñan, ear bar m̦ane l̦adik ro jibwin. Aolep armej ro rar mijake Atalaia.

Bũrij L̦apl̦ap eo etan Jihoiada im lio pãleen etan Jihosheba, rar jel̦ã bwe men ko Atalaia ej kõm̦m̦ani rar lukkuun nana. Meñe elukkuun kar kauwõtata, ak erro kar bõk Joash, juon iaan l̦adik ro jibwin Atalaia, im n̦ooje jãn lel̦l̦ap nana in jibwin. Innem erro kar kõjparoke im lale l̦adik in ilo tampel̦ eo.

Ke ekar 7 an Joash iiõ, Jihoiada ear kũr aolep rũtõl ro im RiLivai ro im ba: ‘Kom̦win baare kõjãm ko ilo tampel̦ in. Jab kõtl̦o̦k an jabdewõt del̦o̦ñ.’ Innem Jihoiada ear kairooj Joash bwe en kiiñ ioon aelõñin Juda, im ear likũt juon crown ioon bõran. Armej ro ilo Juda rar lam̦õj im ba: ‘Jeraam̦m̦an ñan kiiñ in ad!’

Ke lerooj Atalaia ear roñ ainikien an armej ro lam̦õj, ear m̦õkaj im etal ñan tampel̦ eo. Ke ear loe kiiñ eo rar kairooje, ear lam̦õj im ba: ‘Rijum̦ae! Rijum̦ae!’ Ak rũtõl ro rar jibwe lerooj in im bõke im m̦ane, im ear mej. Ak ta kõn m̦anit ko renana Atalaia ear kõm̦m̦an bwe ren wal̦o̦k ilo ãneo?

Eokwe Jihoiada ear jipañ armej ro bwe ren kõm̦m̦ane juon bujen ippãn Jeova bwe renaaj kabuñ ñan E wõt. Jihoiada ear bar ba bwe ren rupe tampel̦ eo an Beal im ekjab ko an. Innem ear kõm̦m̦an bwe bũrij ro im RiLivai ro ren jerbal ilo tampel̦ eo an Anij kõnke armej ro ren bar maroñ kabuñ ie. Ear bar kããlõt jet bwe ren rũlale kõjãm ko ilo tampel̦ eo ñan lale bwe jabdewõt eo ejjab erreo en jab del̦o̦ñ. Innem Jihoiada im rũtõl ro rar bõkl̦o̦k Joash ñan m̦weo im̦õn kiiñ im kajijete ilo tũroon eo an kiiñ. Armej ro ilo Juda rar lukkuun m̦õn̦õn̦õ. Rar maroñ karejar ñan Jeova kõnke kiiõ ejako lel̦l̦ap nana eo Atalaia im kabuñ eo an Beal. Kwõj ke lo wãween an kar Jihoiada maroñ jipañ armej ro kõn an kar peran?