Kar Lel̦o̦k Jetõb Kwõjarjar ñan Korniliõs

Ilo Seseria, ekar wõr juon em̦m̦aan etan Korniliõs im ear juon rũtõlin tarin̦ae eutiej an Rom. Meñe ear jab juon RiJu, ak RiJu ro rar kautieje. Ear m̦õn̦õn̦õ in jipañ ro rejeram̦õl ak ro ejabwe men ko ippãer. Korniliõs ear tõmak ilo Jeova im ear jar ñane aolep iien. Juon raan, juon enjel̦ ear wal̦o̦k ñane im ba: ‘Anij ear roñjake jar ko am̦, kiiõ kwõn jilkinl̦o̦k jet armej ñan Joppa im pukot juon em̦m̦aan etan Piter, im kajjitõk bwe en iwõj ñan ippam̦.’ Ilo m̦õkaj, Korniliõs ear jilkinl̦o̦k jilu em̦m̦aan ñan Joppa, juon jikin iturõk me enañin 30 m̦ail̦ ettol̦o̦k jãn ijo ej pãd ie.

Kiiõ ilo Joppa, Piter ear lo juon pijen. Ilo pijen in, ear lo menninmour ko me ear jab mãlim an RiJu ro m̦õñã, ak ear roñ an juon ainikien ba ñane bwe en m̦õñã. Bõtab Piter ear jab kõn̦aan, ear ba: ‘Ijjañin kar m̦õñã juon men ejjab erreo ilo mour e aõ.’ Ainikien eo ear bar ba ñane: ‘Kwõn jab kattoon men eo em̦õj an Anij kaalikkar bwe erreo.’ Ainikien eo ear bar ba ñane: ‘Ewõr jilu em̦m̦aan ilo nabõjin kõjãm en̦ am̦. Kwõn etal ñan ippãer.’ Innem Piter ear etal ñan kõjãmin m̦weo im̦õn im ear kajjitõk ippãer ta unin aer itok ñan ippãn. Rar uwaak im ba: ‘Korniliõs, juon rũtõlin tarin̦ae an Rom, ear jilkintok kõm bwe kõmin ãñinl̦o̦k eok ñan m̦weo im̦õn ilo Seseria.’ Innem Piter ear kadel̦o̦ñ em̦m̦aan rein ñan m̦weo im̦õn bwe ren kiki ñan raan eo tok juon, innem ear etal ippãerl̦o̦k ñan Seseria ippãn bar jet rũttõmak jãn Joppa.

Ke Korniliõs ej lo Piter, ear bukwelõlõ. Ak Piter ear ba ñane: ‘Jutak! Ña juon armej ãinwõt kwe. Meñe emo an RiJu ro del̦o̦ñ ilo m̦õko im̦õn armej ro jãn aelõñ ko jet, ak Anij ear jilkintok eõ bwe in itok ñan m̦wiin im̦õm̦. Jouj im kwal̦o̦k etke kwaar kũrtok eõ ñan ippam̦.’

Korniliõs ear ba ñan Piter: ‘Emãn raan remootl̦o̦k, iar jar ñan Anij im juon enjel̦ ear ba in kũrtok eok ñan ijin. Jouj im katakin kõm kõn naan ko an Jeova.’ Piter ear ba: ‘Ij kab lukkuun mel̦el̦e bwe Anij ejjab kalijekl̦o̦k . . . Im ej buñbũruon ippãn jabdewõt eo ekõn̦aan kabuñ ñane.’ Elõñ men ko Piter ear katakin er kõn Jesus. Innem Anij ear lel̦o̦k jetõb kwõjarjar eo an bwe en itok ioon Korniliõs im ro me rar pãd im roñjake. Im aolepen armej ro ilo iien in rar peptaij.